Pavarësisht përpjekjeve për të krijuar iluzionin e barazisë dhe përfaqësimit, të dhënat konkrete zbulojnë të vërtetën e hidhur për qeverisjen e VLEN-it. Vetë drejtuesit e tyre krenohen me faktin se në Shoqërinë Aksionare për Ushtrimin e Veprimtarisë Energjetike – NOMAGAS Shkup, në konkursin e fundit publik janë punësuar 8 shqiptarë nga 18 vende pune.

Nëse kësaj i shtojmë edhe statistikat e mëparshme – nga 84 punësime, vetëm 11 shqiptarë, rezulton se tani janë 102 punësime, prej të cilave vetëm 19 shqiptarë. Kjo do të thotë jo më shumë se 18.6% përfaqësim shqiptar, një përqindje që nuk e përmbush as minimumin e garantuar me ligj, e jo më të jetë sukses.

Ndërkohë, VLEN mashtron publikisht duke pretenduar se ka arritur përfaqësim 44.4%. Në të vërtetë, ka dështuar të korrigjojë padrejtësinë shumëvjeçare dhe diskriminimin etnik në këtë ndërmarrje shtetërore, edhe pse kishte mundësinë dhe kompetencën ta bënte.

Ky është realiteti: edhe aty ku VLEN është në krye, nuk guxon të sfidojë strukturat e vërteta të pushtetit, pasi kufijtë e veprimit i ka të përcaktuar nga patronët e tyre politikë – Hristijan Mickoski dhe Stojançe Angelov.

VLEN nuk është qeveri e shqiptarëve, por është vegël në duart e politikave që i shohin shqiptarët si numra për vota dhe jo si qytetarë me të drejta të barabarta.

Për këtë arsye, Aleanca për Shqiptarët ka braktisur këtë qeveri diskriminuese, sepse nuk mund të jetë pjesë e një pushteti që simbolikisht emëron shqiptarë drejtorë, por realisht ua mohon të drejtën për të barazuar përfaqësimin në institucionet që drejtojnë.

Ne do të vazhdojmë të denoncojmë çdo shkelje të barazisë, çdo manipulim me opinionin, dhe çdo përpjekje për ta shitur padrejtësinë si sukses.

Barazi nuk ka, kur shqiptarët nuk përfaqësohen denjësisht. Barazi nuk është shifër false, por standard real, që me VLEN nuk përkon as për së afërmi.

Aleanca për Shqiptarët

Nga sot, 14 qershor deri më 17 qershor në mesnatë, zgjat afati i parë për regjistrim elektronik të nxënësve që do të fillojnë mësimin në vitin e parë të shkollave të mesme publike në shtator për vitin akademik 2025/2026.

Regjistrimi kryhet përmes sistemit të shërbimeve elektronike të Ministrisë së Arsimit dhe Shkencës, i disponueshëm në https://e-uslugi.mon.gov.mk, duke u kyçur përmes llogarive të tyre të përdoruesit në platformën schools.mk.

Pas përfundimit të regjistrimit elektronik, nxënësit duhet të dorëzojnë dokumentacionin e nevojshëm në shkolla më 18 qershor (nga ora 8:00 deri në 19:00) dhe më 19 qershor (nga ora 8:00 deri në 17:00).

Lista përfundimtare e renditjes me rezultatet e regjistrimit dhe vendeve të lira do të publikohet më 20 qershor 2025, jo më vonë se ora 12:00, në hapësirat e shkollave ose në faqen e saj të internetit.

Në shkollat ​​ku është planifikuar testimi kualifikues, ai do të kryhet më 23 qershor, kur do të shpallen rezultatet.

Afati i dytë për regjistrim elektronik në periudhën e regjistrimit të qershorit do të mbahet më 30 qershor 2025, nga ora 00:00 deri në orën 23:59.

Dokumentacioni do të dorëzohet më 1 korrik, nga ora 10:00 deri në orën 19:00. Lista përfundimtare e renditjes do të publikohet më 2 korrik, dhe testimi kualifikues për këtë periudhë do të mbahet më 4 korrik 2025.

Periudha e regjistrimit të gushtit do të realizohet më 21 gusht 2025, nga ora 00:00 deri në orën 15:00 elektronikisht, kur dokumentacioni i nevojshëm do të dorëzohet në shkolla në të njëjtën kohë. Lista përfundimtare e renditjes do të publikohet më 22 gusht 2025.

Aleanca për Shqiptarët, e udhëhequr nga kryetari Arben Taravari, ka reaguar ashpër ndaj asaj që e cilëson si një fushatë të organizuar diskriminimi dhe spastrimi etnik të shqiptarëve nga institucionet shtetërore në Maqedoninë e Veriut. Sipas partisë, koalicioni VLEN po përpiqet të mbulojë dështimet politike dhe administrative me njoftime për punësime selektive, duke propaganduar disa punësime të shqiptarëve si suksese, ndërsa realiteti tregon një tablo krejtësisht të ndryshme.

Në reagim Aleanca për Shqiptarët thekson se, pavarësisht njoftimeve të VLEN-it për punësimin e rreth 50 shqiptarëve në institucione si NOMAGAS (8), Dogana (19), MEPSO (15) dhe QSHP (8), numri i maqedonasve të punësuar në dy javët e fundit arrin në rreth 250. Sipas ASH-së, këto shifra janë vetëm një fasadë për të fshehur diskriminimin sistematik dhe largimin e shqiptarëve nga administrata publike.
Të dhënat e publikuara nga Aleanca për Shqiptarët zbulojnë një sërë shkeljesh alarmante:

• Në Agjencinë për Ushqim dhe Veterinari janë punësuar 21 maqedonas dhe asnjë shqiptar.
• Në ndërmarrjen publike “Pyjet e Maqedonisë” në Strugë, 11 shqiptarë janë pushuar nga puna pa shpjegime ligjore.
• Në Policinë e Tetovës, qytet me shumicë shqiptare, janë punësuar 12 maqedonas dhe vetëm 1 shqiptar.
• Në Ministrinë e Financave, nga 40 vende pune të shpallura, 19 u mbushën me maqedonas, ndërsa 21 pozita u anuluan për të shmangur punësimin e shqiptarëve.

ASH-ja tjekson se, që nga qershori 2024, kur VMRO-DPMNE dhe aleatët e saj morën pushtetin, mbi 800 shqiptarë janë larguar ose detyruar të largohen nga administrata publike, si pjesë e një politike të qëllimshme për të krijuar një administratë etnikisht të pastër.
Aleanca për Shqiptarët ka bërë thirrje për:
1. Hetim të pavarur të rasteve të punësimeve dhe largimeve nga puna mbi baza etnike.
2. Ndërprerjen e menjëhershme të politikave të spastrimit etnik në institucionet shtetërore.
3. Përfshirjen e përfaqësuesve ndërkombëtarë për të monitoruar barazinë në punësim.

“Shqiptarët nuk janë qytetarë të dorës së dytë. Heshtja përballë këtij diskriminimi është bashkëfajësi. Aleanca për Shqiptarët nuk do të heshtë!”, thuhet në reagimin e ASH-së.

Ky reagim vjen në një kohë kur tensionet politike dhe etnike në Maqedoninë e Veriut mbeten të larta, me opozitën që vazhdimisht akuzon qeverinë për politikanizim të institucioneve dhe shkelje të parimeve të barazisë dhe gjithëpërfshirjes.