Sipas pretendimeve të Kryetares së Qytetit së Shkupit, Danella Arsovska, në Komunën e Çairit ka një legalizim masiv ilegal të objekteve që janë ndërtesa shumëkatëshe, komplekse banimi elitare, e jo ndërtesa të vogla dhe rikonstruime. Por, ajo thotë edhe se kjo është komuna e vetme në të cilën ka një numër kaq të madh falsifikimesh për legalizimin e ndërtesave pa leje, shkruan Radio Evropa e Lirë, transmeton Portalb.mk.

Në një deklaratë Arsovska thotë se garanton se një gjë të tillë nuk ka askund tjetër, por se nëse do kishte dokumentacion edhe për komunat e tjera, ajo do i raportonte menjëherë.

“Ja edhe këtu në Qytetin e Shkupit, nëse doni të flisni për këtë, do të ishte politikisht e përshtatshme të thuhej se ndonjë kryetar komune nga radhët e VMRO DPMNE-së e ka bërë këtë ose se ndonjë kryetar komune nga radhët e LSDM-së e ka bërë këtë, por ja që nuk e kanë bërë. Askush nuk ka falsifikuar dokumente ashtu siç bën Visar Ganiu dhe askush në vitin 2024 nuk ka lejuar që të ndërtohen ndërtesa 12, 13-katëshe me 70, 80 apartamente ashtu siç bën Visar Ganiu. Më besoni kur ju them se unë jam vënë kundër një bande të organizuar kriminale siç ishte BDI-ja, ndërsa tani përballë meje është VLEN-i dhe që po përpiqen të më heshtin me të gjitha format e kërcënimeve kundër meje dhe familjes sime”, thotë Arsovska.

Nga ana tjetër kryetari i Komunës së Çairit, Visar Ganiu e akuzoi Arsovskën se po punon për BDI-në që ka frikë nga disfata në zgjedhjet lokale.

“Arsovska po punon për BDI-në, ajo nuk komunikon me asnjë kryetar komune përveç kryetarit të Komunës së Sarajit. Bujar Osmani dhe Blerim Bexheti, mjaft u fshehët pas Arsovskës. Ajo që po bëni e bëni nga paniku sepse e dini se do të humbni në zgjedhjet lokale në Çair”, tha Ganiu më 25 maj të vitit 2025.

Danella Arsovska erdhi në postin e kryetares së Qytetit të Shkupit si kandidate e pavarur e mbështetur nga partia në pushtet VMRO-DPMNE dhe kryeministri Hristijan Mickoski. Por për një kohë të shkurtër midis tyre shpërtheu zënkë dhe filluan me akuza të ndërsjella. Në ndërkohë ajo u akuzua se kishte formuar koalicion me BDI-në, pasi kishte bërë disa ndryshime në postet e drejtorëve në ndërmarrjet e qytetit.

Ajo njoftoi se nuk do të kandidojë në zgjedhjet e ardhshme lokale, por se do t’i zbulojë të gjitha krimet e garniturës aktuale në pushtet të udhëhequr nga koalicioni i VMRO DPMNE dhe VLEN, ku bëjnë pjesë edhe ish-zyrtarë të BDI-së.

Njëri prej tyre është zëvendëskryeministri aktual Izet Mexhiti, tani kryetar i partisë Lëvizja Demokratike, i cili ishte kryetar i Komunës së Çairit nga viti 2005 deri në vitin 2017. Disa afera për ndërtimet e paligjshme në këtë komunë për të cilat raportuan mediat, lidheshin pikërisht me atë.

Arsovska thotë se për çdo ditë pranon kërrcënime se nuk ka mbrojtje dhe nuk ndihet e sigurt. Thotë se ajo, familja e saj dhe punonjësit e Qytetit të Shkupit do të jenë të sigurt kur të arrestohet Visar Ganiu.

Luftë e sinqertë apo e targetuar kundër krimit?

Pothuajse të gjithë mandatin Danella Arsovska e kaloi me kritika nga publiku për shkak se shumë shpesh e linte dhe po e len qytetin pa transport publik, ndërsa ajo u grind edhe me transportuesit privatë edhe me punonjësit e NQP-së. Gjatë mandatit të saj ndodhi edhe që qyteti të ngulfatet në mbeturina për shkak se Ndërmarrjet Komunale refuzuan t’i binden.

Nga ana tjetër, ditëve të fundit ajo ka filluar të postojë edhe video në rrjetet sociale ku është duke gjurmuar për kyçje të paligjshme në rrjetin e ujësjellësit. Këtë fundjavë raportoi për një kyçje të paligjshme në Komunën e Sarajit, ndërsa dje njoftoi se çdo ditë identifikohen nga 30 kyçje të paligjshme, nga të cilat ujiten ara të tëra, për ndërtime të paligjshme, për të mbushur pishina.

Ajo thotë se si pasojë e kësaj nuk ka ujë të mjaftueshëm, kështu që këto ditë në kryeqytet ose nuk ka presion në zonat më të larta ose ka kufizime të ujit në disa nga vendbanimet. Sipas këshilltarit të pavarur në Qytetin e Shkupit nga Qyteti i Gjelbër Human, Gorjan Jovanovski, duhet të respektohet lufta kundër çdo krimi, por se duhet të jepet një përgjigje se pse po fillohet pikërisht tani.

“Është shumë e rëndësishme që të ketë vazhdimësi në luftë. Nëse nuk ka vazhdimësi, atëherë është e pamundur të dihet nëse ajo luftë është e sinqertë apo e targetuar. Por nëse është shumë e fiksuar dhe e fokusuar në një moment të caktuar, duhet të shpjegohet pse”, thotë Jovanovski.

Megjithatë, sipas tij,është mirë që të bëhet një luftë e këtillë me krimin, por kjo duhet të ndodhë çdo vit, gjë që do të dëshmojë se qëllimi për ta eliminuar krimin nga shoqëria është kristal i qartë.

Inspektorati Shtetëror në vitin 2024 ka lëshuar një kumtesë të veçantë për Çairin, ndërkohë që sot po hesht

Kryetarët e Komunës së Çairit nuk i kanë përmbushur kompetencat e tyre ligjore dhe kanë lejuar ndërtim kaotike të paligjshëm. Ky është titulli i kumtesës së lëshuar nga Inspektorati Shtetëror për Ndërtim dhe Urbanizëm në prill të vitit 2024. Sipas inspektoratit, për periudhën nga viti 2013 deri në vitin 2020 në komunë më shumë janë ndërtuar ndërtime të paligjshme sesa që janë lëshuar leje ndërtimi sipas ligjit.

“Është lejuar ndërtimi i një numri të madh ndërtesash dhe objektesh afariste, me çka është shkaktuar dëm ndaj interesit publik duke mos paguar shërbime komunale për to, dhe duke lejuar që individë të caktuar të përfitojnë në kurriz të qytetarëve të ndershëm duke i anashkaluar ligjet. Këtu nuk bëhet fjalë për shkelje të vogla të Ligjit për Ndërtimin, të cilat gjithsesu duhet të sanksionohen, por bëhet fjalë për shkelje të rënda të të gjitha ligjeve duke lejuar ndërtimin e ndërtesave kolektive të banimit pa leje përkatëse dhe në vende ku ato nuk parashikohen nga Plani i Detajuar Urbanistik”, thuhet në raportin e inspektoratit të muajit prill të vitit 2024.

Inspektorati ka kryer mbikëqyrje inspektuese të jashtëzakonshme në Çair sepse ka pranuar 327 parashtresa nga kompani ose nga individë, që kanë bërë denoncimin e ndërtimeve pa leje. Nga Inspektorati kanë theksuar se Komuna nuk ka inspektor komunal të ndërtimit, i cili do ta zbatonte Ligjin për Ndërtim dhe do të parandalonte ndërtimet e paligjshme në vetë komunën.

Sipas Inspektoratit Komuna ka pasur mundësi ligjore të lidhë një marrëveshje ndërkomunale me një nga komunat fqinje që kanë inspektorë komunal të ndërtimit ose të autorizojë një punonjës administrativ për t’i kryer detyrat e një inspektori, por nuk e ka bërë një gjë të tillë.

“Kryetarët e Komunës së Çairit nuk i kanë përmbushur përgjegjësitë ligjore të parashikuara me Ligjin për Vetëqeverisjen Lokale, me çka në territorin e Komunës së Çairit janë lejuar ndërtime kaotike të paligjshme pa i sanksionuar ato në përputhje me dispozitat ligjore të Ligjit për Ndërtimin dhe Ligjit për Mbikëqyrjen Inspektuese, ndërsa në lidhje me Kodin Penal, më saktësisht në përputhje me nenin 244-a të të njëjtit ligj”, shkruajnë nga Inspektorati.

Pranë Inspektorati kanë arritur edhe kallëzime penale për ndërtime të paligjshme që janë kryer ose po kryhen në Komunën e Çairit, të cilat iu janë dorëzuar autoriteteve, thuhet në kumtesë.

REL dërgoi pyetje te inspektorati dhe tentoi të kontaktojë me drejtorin, por pa sukses kështu që nuk mori përgjigje për pyetjet.

Prokuroritë hapën lëndë për ndërtime të paligjshme dhe falsifikim në Çair

Në Prokurorinë Themelore Publike Shkup dhe në Prokurorinë për Ndjekjen Penale të Krimit të Organizuar dhe Korrupsionit janë hapur disa lëndë lidhur me ndërtimet e paligjshme në Komunën e Çairit. Nga Prokuroria Themelore Publike Shkup thonë se menjëherë pas pranimit të lëndës të cilën e dorëzoi Kryetarja e Qytetit të Shkupit, Danella Arsovska, është kryer kontroll dhe identifikim i parcelave konkrete.

“Më 5 qershor, prokurori publik lëshoi ​​një urdhër të detajuar drejtuar Drejtorisë së Policisë Financiare, duke kërkuar që në përputhje me ingerencat e saj ligjore, të marrë të gjithë dokumentacionin nga Komuna e Çairit për parcelat në fjalë, të marrë dokumentacion për procedurat për legalizimin e objekteve në fjalë, të marrë dokumentacion nga Qyteti i Shkupit dhe Agjencia e Kadastrës së Pasurive të Patundshme, të kryejë bisedime me personat e emëruar konkretisht, si dhe të kryejë verifikime të tjera dhe të ofrojë prova lidhur me statusin e ndërtimit në lokacionet e përmendura nga viti 2010 deri më sot”, thuhet në përgjigjen e Prokurorisë.

Në të njëjtën Prokurori është hapur edhe lëndë pas zërit të arrirë pas publikimit në media për dyshime lidhur me legalizimin e ndërtimeve të paligjshme që në kohën e legalizimit as që kishin filluar të ndërtoheshin. E tillë ishte kronika që u transmetua në emisionin “360 Gradë” në shtator të vitit 2023, në të cilën flitej për disa ndërtesa që nuk ekzistonin para miratimit të ligjit për ndërtimet e paligjshme, por që u legalizuan pikërisht sipas atij ligji, edhe pse nuk mund të përfshiheshin me të. Si dëshmi për këtë u përdorën imazhe satelitore.

Nga Prokuroria thonë se edhe ata përdorin imazhe të tilla në proceset, por se gjykata shpesh i refuzon ato si prova.

Përndryshe, sipas Prokurorisë, janë urdhëruar inspektime edhe në kompani të caktuara, si dhe në Ministrinë e Transportit dhe Lidhjeve për zbulimin e krimeve dhe autorëve. Ende po veprohet sipas tij, thonë nga atje.

Maqedonia, e cila i mbijetoi luftërave ballkanike të viteve 90-të të shekullit të kaluar pa dhunë masive dhe në të cilën jetojnë njerëz të ndryshëm dhe grupe të ndryshme etnike dhe fetare që arritën të ndërtojnë një shoqëri paqësore, dikur ishte lidere në rajon kur, 20 vjet më parë, e filloi procesin e anëtarësimit në BE së bashku me Slloveninë, tha eurodeputeti austriak Tomas Vajc në fjalimin e tij para Parlamentit Evropian gjatë një debati mbi raportin e tij për vendin për vitin 2023 dhe 2024 sonte.

“Ku ndodhet Sllovenia sot dhe çfarë i ndodhi Maqedonisë së Veriut? Pati disa pengesa gjatë rrugës. Pengesa që ndërlidhen me historinë, pengesa që ndërlidhen me luftërat e shekullit të kaluar, pengesa me mënyrën e ndërtimit të marrëdhënieve të mira dypalëshe me fqinjët. Por marrëdhëniet e fqinjësisë së mirë duhet të ndërtohen gjithmonë nga të dyja palët”, kjo është shumë e qartë, shtoi Vajc.

Ai theksoi se, megjithëse vendi ka qenë në rrugën e anëtarësimit në BE tashmë 20 vjet dhe ka zbatuar një pjesë të konsiderueshme të legjislacionit evropian, ai ende nuk ka filluar zyrtarisht negociatat për anëtarësim në BE, edhe pse duhet ta kishte bërë këtë.

“Nëse i shikoni si partnerë të Bashkimit Evropian, ata janë partneri ynë i besuar. E ndajnë politikën tonë të përbashkët të jashtme dhe të sigurisë njëqind për qind, janë anëtarësuar në NATO, janë bashkuar me përpjekjet e përbashkëta që kemi në Bashkimin Evropian. Sot, kur ne evropianët e kuptojmë se duhet të mbrojmë fatin tonë dhe se ne evropianët duhet të qëndrojmë së bashku në dritën e asaj që po ndodh globalisht, mendoj se duhet të shqyrtojmë përshpejtimin e procesit të pranimit të Maqedonisë së Veriut”, tha eurodeputeti austriak.

Vajnc theksoi se Raporti jep një pamje të plotë të gjendjes së vendit dhe mirëpret disa arritje, por gjithashtu bën thirrje për reforma dhe flet për gjuhën e urrejtjes, krimet e urrejtjes, nevojën për sundimin e ligjit, luftën kundër korrupsionit dhe jo vetëm për miratimin e ligjeve, por edhe për rezultatet që do të ndihen nga qytetarët.

“Në Raport flitet shumë për ndryshimet kushtetuese që kërkohen për të filluar negociatat e aderimit. Ndryshimet kushtetuese që përfshijnë edhe pakica të tjera në Kushtetutë, ndër të cila edhe atë bullgare”, tha Vajc.

Ai theksoi se në dokument diskutohet edhe për gjendjen ekonomike, e cila, siç tha ai, ka anët pozitive, por edhe mangësitë, si dhe për shfrytëzimin e pamjaftueshëm të mbështetjes që vjen nga Bashkimi Evropian, në kushte kur është shumë e rëndësishme që vendi të investojë në staf profesional dhe t’i mbajë ata që kanë treguar se janë të aftë.

“Ai vend është plot me trashëgimi natyrore të jashtëzakonshme, male, liqene, monumente kulturore, por për fat të keq, vendi është gjithashtu plot me mbeturina, deponi të paligjshme dhe ndotje. Po, ka një përmirësim të situatës, por ka ende shumë për të bërë”, përfundoi Vajc.

Ai theksoi se shoqëria civile në vend ka kushte për të punuar, por se është i dukshëm edhe ndikimi negativ, i cilit duhet të luftohet, pavarësisht nëse është rus, kinez, saudit, serb apo nga kudo tjetër, sepse njerëzit duhet të vendosin vetë për fatin e tyre. Në atë kontekst, sipas tij, dokumenti flet edhe për mediat, nevojën për transparencë në pronësinë e medias, si dhe për potencialin që ka vendi.

“Ky Raport përfaqëson një hap të rëndësishëm drejt anëtarësimit në BE dhe shpresoj që shumë prej jush do ta mbështesin atë në votimin nesër. Ata do të mbështesin pranimin e Maqedonisë së Veriut në Bashkimin Evropian ose të paktën hapin tjetër që mund të ndërmarrim në një mënyrë konstruktive, të përbashkët dhe proevropiane”, shtoi Vajc.

Kryetari i Aleancës për Shqiptarët, Arben Taravari përmes një postimi ka akuzuar VLEN-im se po qëndron në një qeveri ku nuk janë të barabartë dhe janë rë robëruar, shkruan Top24

“Partneriteti pa barazi është robëri e maskuar me shtrëngime duarsh e buzëqeshje të ngrira. S’bëhet se nuk vlen!”