Connect with us

Lajme

Snopçe për Frontline: Përderisa te partitë tjera po ndodh një orgji e vërtetë politike, Aleanca për Shqiptarët mbetet e vetmja parti kompakte dhe unike

Published

on

1. Zoti Snopçe, ndryshimet kushtetuese hynë në procedurë parlamentare, a po prisni që VMRO-DMNE të reflektojë dhe ti votojë?

– Nuk mund të them a do ti votojnë apo jo. Në mbledhjen e Komisionit kushtetues votuan kundër nevojës. Do të shohim si do të vendosin. Unë vetëm mund të bëj ftesë të mendojnë në interes të shtetit. Në këtë moment votimi për ndryshimet kushtetuese dhe nisja e bisedimeve për antarsim në UE paraqesin një konjuksion logjik që shkojnë së bashku. Këto dy gjëra nuk mund ta përjashtojnë njëra tjetrën. Do të thotë nuk janë disjunkte. Nuk mund të nisin bisedimet nëse nuk votohen ndryshimet kushtetuese. Nëse ka mënyrë tjetër për nisjen e bisedimeve le të tregojnë nga VMRO-ja. Edhe në komision thanë se nuk do të përkrahin ndryshimet nën diktatin bullgar, por nuk treguan se çka është alternativa. VMRO deri më tash në të gjitha argumentet që i përdor po imponon një qasje disjunktive. Ose rezistenca ndaj ndryshimeve kushtetuese do të mbrojë identitetin nacional, ose votimi i ndryshimeve kushtetuese do të rezikojë identitetin nacional. Pra, kjo është teza e tyre që këto dy gjëra nuk shkojnë bashkë. Unë jam idhtar dhe fuqishëm besoj në qasjen konjuktive, e ajo është që këto dy gjëra po shkojnë bashkë. Pse? Për arsye se mendoj që antarsimi në UE është garancë për forcimin e shtetit. Nëse forcohemi si shtet atëherë edhe identiteti në asnjë mënyrë nuk mund të rezikohet. Do të hyjmë në shoqërinë e shteteve të tjera të forta dhe kur të antarsohemi edhe Gjuha maqedone do të jetë njëra nga gjuhët zyrtare e Unionit Europian. Unë nuk shoh garancë më të madhe se kjo.

Shikoni, ne si shtet asnjëherë nuk kemi qenë në pozitë më të mirë nga këndvështrimi ndërkombëtar. Unë jam deputet dhe kam përshtypjen se e gjithë bota po meret me ne. Gati se çdo javë na vijnë kryetarë, kryeministra, ministra të punëve të jashtme duke na dhënë përkrahje dhe duke na inkurajuar për të sjellur këtë vendim të rëndësishëm. A kemi pyetur veten ndonjëherë për pozitën tonë në këto raporte botërore, për “peshën tonë specifike” në kuadër të problemeve globale, për gjeopolitkën globale, bile edhe për pozicionin tonë në raportet globale por edhe Ballkanike dhe Europiane. Nëse shohim kështu, asnjëherë nuk kemi qenë në qendër të vëmendjes. Me fjalë të tjera kemi qenë jashta fokusit të tyre. Por tani është ndryshe. Po vijnë të gjithë, na japin përkrahje. Kur kryetari i Komisionit Europian të thotë se Gjuha maqedone nuk është e rezikuar, kur kryetarë dhe kryeminstra vijnë tek ti dhe të japin garanca të ngjashme, atëherë unë nuk mendoj se ato nuk po thonë të vërtetën, por e shoh si një angazhim dhe garancë, prandaj edhe duhet tu besojmë.

2. Çka nëse nuk votohen?

Tek unë ende mbizotëron shpresa që ndryshimet kushtetuese do të votohen sepse nuk shoh alternativë tjetër për të ardhmen e shtetit. VMRO-DPMNE në radhët e saj ka shumë njerëz të mençur dhe mendoj që ato do të arrijnë ti bindin të tjerit që për momentin mendojnë ndryshe.

3. Në partinë tuaj ka dallime në lidhje me partneritetin me BDI-në. A mund të presim bashkëpunim zgjedhor me BDI-në?

– Hyrja jonë në qeveri ka qenë me qëllim të nxitjes së procesit Eurointegrues. Po qe se nuk hynim në qeveri, atëherë viti 2023 në vend që të ishte viti i nisjes së negociatave, do të ishte vit zgjedhor dhe gjithçka do të ishte e bllokuar. Këtë na sugjeronin edhe miqtë tanë ndërkombëtar. Ne kemi qenë kritikues të ashpër të qeverisë. Ne jemi të vetëdishëm se ka afera koruptive, skandale, dhe të ngjashme, por përsëri vlerësuam se orientimi Europian është e rëndësisë primare. Siç kam thënë edhe me një rast tjetër, vendosëm që nëpërmjet patriotizmit institucional të inicojmë dhe të mundohemi të zgjedhim çështje të interesit të përgjithshëm. Të tregojmë se me ndershmëri dhe profesionalizëm, respektivisht me dije të vërtetë disa çështje që në shiqim të parë duken të komplikuara, mund të zgjidhen në mënyrë shumë të thjeshtë. Mendoj që ka edhe shembuj konkret në këtë periudhë katër mujore nga ana e ministrave tanë. Pra, të përfundoj, ne nuk kemi hyrë në qeveri për të patur partneritet me BDI-në, por ne kemi marrë disa përgjegjësi për të ardhmen e shtetit që të mos na përsëriten skenarë si ajo e Bukureshtit gjatë regjimit udhëhequr nga Gruevski. Në lidhje me zgjedhjet e radhës aspak nuk kemi menduar si parti dhe do të përmbahem nga përgjigja. Prioritet e kemi agjendën Europiane dhe disa rezultate konkrete në resoret që udhëhiqen nga ana e ministrave tonë. Nëse ju duhet mendimi im personal, atëherë ai për momentin është se duhet të dalim në zgjedhje vet si parti. Nga përvoja e së kaluarës, si Aleancë për Shqiptarët, edhe pse kemi sakrifikuar duke dalë në koalicion me parti të tjera, por realisht nuk ka rezultuar si e dobishme. Prandaj, personalisht mendoj se është koha të dalim vet në zgjedhje. Por nënkuptohet, Aleanca për Shqiptarët e ka liderin e saj, ka organe partiake dhe forume partiake që do ta sjellin vendimin kur të vjen koha për të.

4. A mund të ndhodhë „zjarr“ edhe në Alenacën për Shqiptarët?

– Ka një thënie që thotë mos gjykoni dhe mos sillni përfundime për dikë sipas asaj çka thotë, por shihni se si e ka sjelljen dhe si vepron. Unë mendoj se gjithsecili, pra edhe ju si gazetar, keni pasur mundësi që konkretisht për Aleancën për Shqiptarërt të shihni se pavarsisht thashethemeve, ne kemi qenë partia e vetme kompakte dhe e unifikuar. Kjo ka qenë ashtu edhe gjatë kohës kur ishim në opozitë edhe tash kur kemi marrë përgjegjësitë tona edhe në qeveri. Pa asnjë lloj problemi e bëmë tranzicionin në lidershipin e partisë. Zoti Sela si ish lider i partisë vazhdon të jetë një ndër shtyllat krysore të partisë. Grupi parlamentar ka qenë dhe vazhdon të funksionojë në mënyrë kompakte si një trup i unifikuar. Por nënkuptohet se pyetja është legjitime për shkak se jemi të prirur të besojmë që asnjë parti nuk mund të jetë imune nga ndodhitë nëpër partitë tjera politike tek ne. Çka është ajo që po ndodh tek partitë tjera politike? Unë do të kisha thënë një orgji e vërtetë politike.

Partinë tonë e akuzojnë se e kemi shpëtuar BDI-në, por arkivat historike e vërtetojnë të kundërtën. Lëvizja BESA pati mundësi ta çojë në opozitë BDI-në në vitin 2020, por atëherë doli me listë të përbashkët me LSDM-në dhe nuk u reshtua me opozitën dhe vnedosi ta mbajë në pushtet BDI-në. Kur mblodhëm 61 nënshkrime për ta çuar përsëri BDI-në në opozitë, ishte deputeti Kastriot Rexhepi i cili shkoli mbi nënshkrimin e tij. Tani ky i njëjti po bashkohet me Izet Mexhitin për ta çuar BDI-në në opozitë. E njëjta vlen edhe për Izet Mexhitin. Ai disa herë ka patur mundësinë që ta “rrëzojë” Artan Grubin, por asnjëherë nuk e ka shfrytëzuar atë mundësi. Kur në parlament opozita dhe pushteti ngelën me numër të njëjtë deputetësh, 60 me 60, ishte Alternativa që vendosi të hyjë në qeveri duke e thyer marrëveshjen koalicionuese me ne. Edhe kësaj radhe përsëri në favor të BDI-së. Pastaj deputeti Skender Rexhepi si deputet i Alternativës doli i pavarur. Lëvizja BESA e përjashton Kastriot Rexhepin nga partia. E dimë se si u ndanë BESA me Alternativën dhe se si ishte e pamundur për ti bashkuar për të dalur bashkë në zgjedhjet e vitit 2020. Ndërsa tani çka ndodh? BESA, Alternativa dhe grupi i Izet Maxhitit po bashkohen në një front opozitar dhe menjëherë kemi distancim nga sekretari gjeneral i lëvizjes BESA dhe vednimin e deputetit të tyre Bastri Bajrami se në të ardhmen do të veprojë si i pavarur. E gjithë kjo a nuk ju duket si një orgji politike? Një mishmash i vërtetë. A keni parë diçka të ngjashme tek Aleanca për Shqiptarët? Sigurisht që jo. Ne edhe si pjesë e qeverisë po vazhdojmë të jemi kritikues i fenomeneve negative dhe nuk do të hekim dorë nga kjo.

5. A ekziston mundësia që Aleanca të kyçet në bllokun opozitar me Besën, Alternativën dhe grupin e Izet Mexhitit?

– Në lidhje me zgjedhjet e radhës aspak nuk kemi menduar si parti dhe do të përmbahem nga përgjigja. Prioritet e kemi agjendën Europiane dhe disa rezultate konkrete në resoret që udhëhiqen nga ana e ministrave tonë. Nëse ju duhet mendimi im personal, atëeherë ai për momentin është se duhet të dalim në zgjedhje vet si parti. Nga përvoja e së kaluarës, si Aleancë për Shqiptarët, edhe pse kemi sakrifikuar duke dalë në koalicion me parti të tjera, por realisht nuk ka rezultuar si e dobishme. Prandaj, personalisht mendoj se është koha të dalim vet në zgjedhje. Por nënkuptohet, se Aleanca për Shqiptarët e ka liderin e saj, ka organe partiake dhe forume partiake që do ta sjellin vendimin kur të vjen koha për të.

6. „Fronti Europian“ me SDSM-në apo pa SDSM-në?

– „Fronti Europian“ me secilin që sinqerisht angazhohet për instalimin e vlerave Europiane në shtetin tonë.

Continue Reading

Lajme

Hoxha lidh hallkat në zinxhirë: Ndikimi rus në RMV vjen përmes Serbisë, me Beogradin afërsi ka VMRO -ja e cila dëshiron izolimin e shtetit

Published

on

 

Me ndryshimet kushtetuese mirë do ishte të vinte edhe heqja e 20 përqindëshit nga Kushtetuta. Por, peshën pse nuk është kështu duhet ta mbajë propozuesi, Qeveria, gjegjësisht partitë që janë pjesë e kësaj qeveria. Kështu thotë Arjanit Hoxha, kryetari i subjektit të sapoformuar, Partia Demokratike Evropiane. Në emisionin “Politica” në televizionin Globi, ai tha se nuk kanë kushtëzime për mbështetje të ndryshimeve kushtetuese, aq më pak tani, pasi sipas tij, mosndryshimi i Kushtetutës do të lejonte ndikimin rus në Maqedoni.

“Unë them që është mirë të kalojnë ndryshimet kushtetuese sepse nuk është vetëm çështja e pozicionimit politik brenda në Maqedoninë e Veriut sa është edhe kjo që po ndodh në rajon. E shihni situatën në përgjithësi dhe mos flas për rajonin më të gjerë, pra në Evropë kemi luftë aktive me një agresion rusë në Ukrainë. Sado që të duken utopike këto çështje, janë të ndërlidhura dhe në vete ngërthejnë procese politike. Sa më gjatë zvarritet çështja e ndryshimeve kushtetuese dhe mos hapja e rrugëtimit të Maqedonisë së Veriut në strukturat evropiane, aq më shumë rriten gjasat për një ndikim anti-perendimor në RMV dhe prandaj flas që është shumë e rëndësishme të kalojnë”, deklaroi Arjanit Hoxha, kryetari i PDE.

Ai tha se do t’i bashkangjitej të a.q. “Fronti evropian” nëse i njejti formohet dhe garnton rrugëtimin evropian të vendit pavarësisht se kush i fiton zgjedhjet te blloku maqedonas.

“Ne duhet të jemi sy çelë dhe shqiptarët të jenë faktori determinues se ku do të shkojë shteti. VMRO-ja, hipotetikisht nëse i fiton zgjedhjet dhe nga ana tjetër ballafaqohet me një front shqiptarë që i ka 25-30 deputetë që e kanë përcaktuar rrugëtimin evropian të vendit, atëherë e ka patjetër nëse dëshironë qeverisje t’i respektojë këto parime. Prandaj flas se kjo është ajo që duhet të ndodh dhe çdo ndasi të formave të tjera, vetëm se do t’i ndihmonë edhe maqedonasit por edhe politikave indirekte ruse që mundohen të mos ketë qetësi në rajon, vetëm e vetëm për t’i arritur interesat e tyre, ashtu si ka qenë gjithmonë në historinë e tyre”, deklaroi Arjanit Hoxha, kryetari i PDE.

I pyetur nëse Rusia ka ndonjë qendër në Maqedoni për ndikimin e saj, ai tha se ndikimi mund të vijë përmes Serbisë e me shtetin fqinjë, sipas Hoxhës, afërsi sot ka VMRO-DPMNE-ja.

“Nuk dua të hy në konsekuenca të cilat mund të kenë ndikim edhe në aspektin e sigurisë sepse nuk kam ashtu informacione dhe qasje, por mendësia e instaluar e tregon atë se Serbia e ka pasur hallkën në disa qarqe për t’u futur brenda për të ndikuar në një farë forme për prishjen e balanceve të orientimit të vendit. Për fat të keq sot ajo që shihet në opozitën maqedonase, ka një ndikim jashtëzakonisht të madh. Tash ndoshta flas hapur mbi atë që nuk e ka folur dikush edhe pse jam i ri në moshë, por i kam ndjekur proceset politike. Deri në vitin 2011-të betej në opinion ka qenë se si të hiqet LSDM-ja nga ndikimet serbe në Maqedoni, dhe sot e keni ju sesi të hiqet në VMRO e cila ka qenë pastër pro bullgare, sot nga ndikime serbe.

Gazetari: Pra, ju thoni se VMRO është qendra, apo?

Unë tregova sinjalet se si janë, për baza nuk mund të them, nuk mund të mbajë përgjegjësi për diçka të tillë, mirëpo për momentin, veprimtaria politike e izolimit të rrugëtimit të Maqedonisë së Veriut i ndikon vetëm Serbisë për pazare rajonale, asgjë më tepër”, deklaroi Arjanit Hoxha, kryetari i PDE.

Megjithatë, Hoxha nuk sheh ndonjë rrezik nëse tani nuk kalojnë ndryshimet kushtetuese nga ndikimet rajonale, pasi thotë, Maqedonia e Veriut sot është vend anëtarë i NATO-s.

Ndryshe, ditë më parë nga Maqedonia e Veriut u dëbuan tre diplomat rusë, të cilët, sipas Agjencisë për kundërzbulim, ata kanë punuar për të ndarë strukturën nacionale maqedonase. Së bashku me diplomatët rusë, u dëbua edhe një prift i Kishës Ortodokse Ruse, i cili ishte pjesë e dioqezës së Sofjes në Bullgarinë fqinje. Dihet se ai ka pasur kontakte dhe ka bashkëpunuar me peshkopë nga sinodi i KOM-it, por nuk ka detaje të tjera pse prift rusë ka ardhur shpesh në Maqedoni dhe çfarë aktivitetesh ka pasur.

Continue Reading

Lajme

“Dënimet për pedofilët u ulën kur Besa, Alternativa dhe Mexhiti ishin në Qeveri”, kështu Lloga i demanton akuzat e opozitës

Published

on

Ministri i Drejtësisë, Krenar Lloga në Facebook ka demantuar akuzat e opozitës, ku thuhet se Kodi i ri Penal do t’i dënojë më pak personat që abuzojnë seksualisht me fëmijët nën moshën 14 vjeçare. Sipas Llogës, ligji në fjalë është propozuar në 2021 kur në Qeveri ka qenë Lëvizja Besa me Izet Mexhitin dhe ka vazhduar përsëri me Izet Mexhitin dhe me Alternativën përsëri në Qeveri 2022/2023 dhe është votuar në Kuvend në kohën kur ai nuk ka udhëheqë me Ministrinë e Drejtësisë, përcjell Nistori.

“Ligji në fjalë është propozuar në 2021 kur në Qeveri ka qenë Levizja Besa me Izet Mexhitin dhe ka vazhduar përsëri me Izet Mexhitin dhe me Alternativën përsëri në Qeveri 2022/2023 dhe është votuar në Kuvend në kohën kur unë nuk kam udhëheq me Ministrinë e Drejtësisë. Në lexim të parë arritëm të gjejm materialet se kanë votuar PËR: Izet Mexhiti, Kastriot Rexhepi, Fadil Zendeli, Hysni Ismaili etj. Me përgjegjsin me të lartë morale, penale dhe materiale demantoj pretendimet e juaja dhe se gjysëm e verteta nuk i bën nder askujt, përkundrazi dëmton të vërtetën”, shkruan Lloga.

Ndër të tjera, ai shton se ngritja e këtyre temave nga amatorë partiakë në studio televizive pa marrë qëndrime të ekspertëve të fushës jo vetëm se e dëmton kauzën dhe luftën kundër pedofilisë, por i sjellë huti dhe pasiguri opinionit të gjërë.

Continue Reading

Lajme

Reagon sërish Taravari: Qeveria e Serbisë duhet të dënohet për sjelljet kriminale

Published

on

Kryetari i Aleancës për Shqiptarët (ASH), Arben Taravari, me një postim në rrjetin social Facebook ka reaguar për të dytën herë për ngjarjet e ndodhura ditën e djeshme në Veri të Kosovës, ku një grup i armatosur serb i mori jetën efektivit Afrim Bunjaku dhe la të plagosur një tjetër polic.

Taravari shprehet se Kosova nuk mund të jetë një Ukrainë e dytë, sepse një Ukrainë e dytë përkthehet në Luftën e Tretë Botërore. Ai kërkon të ndërrohen negociatorët mes Kosovës dhe Serbisë, të cilët, shton ai, do të mbanin një qëndrim të drejtë që nënkupton ndëshkim të qeverisë serbe për të gjitha sjelljet kriminale që ka bërë deri tani!

“Serbia vazhdon përpjekjet e saj për të ndezur luftën në Kosovë dhe më gjerë. Evropa diplomatike vazhdon dhe i zvogëlon këto sulme ushtarake në “banda” dhe raste të izoluara. Kosova nuk mund të jetë një Ukrainë e dytë, sepse një Ukrainë e dytë përkthehet në Luftën e Tretë Botërore. Që kjo mos të ndodhë duhet ndaluar urgjentisht Serbia në strategjinë e saj pushtuese dhe kriminale! Mjaft më me takime diplomatike që janë benzinë që po shton zjarrin. Ka ardhur koha të ndërrohen negociatorët dhe të mbahet qëndrim i drejtë ndaj të të dy palëve! Qëndrim i drejtë domethënë dënim, ndalim dhe ndëshkim i qeverisë serbe për të gjitha sjelljet kriminale që ka bërë deri tani! Është i domosdoshëm ndalimi i Serbisë në veprimet e saj. Çdo vonesë mund t’i kushtojë botës shumë më shumë”, shkruan i pari i ASH-së.

Ndërkohë ditën e djeshme, pak orë pas ngjarjes, Taravari dënoi me ashpërsi sulmin e kryer ndaj policisë së shtetit të Kosovës nga i cili mbeti i vrarë një efektiv policie dhe një tjetër mbet i plagosur.

“Tani që shkruaj këto rreshta aty ende vazhdojnë të shtënat nga persona të maskuar dhe gjuajtës profesionistë. Ky është një rast alarmant, dramatik dhe kërkoj reagim urgjent nga faktori ndërkombëtar! Duhet Vepruar Tani!”, shprehej Taravari.

Ngjarja e rëndë që riktheu ethet e luftës në Kosovë ndodhi rreth orës 3 të mëngjesit të së dielës në fshatin Banjska të Zveçanit, ku policia e Kosovës u sulmua nga një grup i armatosur prej 30 personash, të veshur me uniforma ushtarake dhe të armatosur me armë të rënda.

Një operacion i Forcave Speciale të Kosovës për kapjen e autorëve e pasoi ngjarjen e rëndë, nga ku në total 3 serbë mbetën të vrarë gjatë shkëmbimit të zjarrit dhe 6 janë arrestuar.
https://www.facebook.com/1265185232/posts/pfbid0QFkcAYwXDAUaSc8ZoxqXW16StAoUKpP1DMgtjmNRFje347Ue9PUHSoyFdutUFS2Wl/?mibextid=cr9u03

Continue Reading

TOP Lajme