Zëvëndëskryeministri i parë, Izet Mexhiti, në emisionin “Dialog te Lajmi”, ka folur mbi punësimet dhe përfaqësimin adekuat sipas të cilit kjo çështje është e paprekshme dhe askush nuk guxon ta cënoj.

“Sa i përket punësimit, heqja e Balancuesit nuk është faji ynë, pasi ka qenë një iniciativë nga Gjykata Kushtetuese, e cila është zgjedhur nga përbërja e kaluar qe Qeverisë. Përfaqësimi adekuat është kategori kushtetuese dhe askush nuk guxon ta cenoj këtë. Mendoj se në këtë periudhë po bëhen më shumë punësime të shqiptarëve sesa janë bërë në tetë vitet e kaluara edhe pse kanë pasur pozita vendimmarrëse. Këtë mund ta konstatoj me rastin ku diku 1.500 punësime në shëndetësi që gjysma e tyre janë shqiptarë të cilët fatkeqësisht kanë mbetur për një periudhë të gjatë me kontratë deri në 7-10 vite. Me të njëjtën dinamikë do të vazhdojmë edhe në institucionet tjera”, tha zëvëndëskryeministri Mexhiti.

Sulejmani: Koalicioni qeverisës është stabil

Driton Sulejmani zëdhënës i Koalicionit VLEN, në intervistën e fundit në TV Alsat, duke komentuar përplasjet e fundit brenda koalicionit qeverisës tha se është normale që brenda qeverisë të ketë mosmarrëveshje për çështje të caktuara.

“Kjo edhe është vlera e demokracisë për të pasur mendime të ndryshme për çështje të caktuara dhe nuk mendoj se kacafytjet e tilla dhe mendimet e ndryshme brenda koalicionit qeverisës mund të sjellin edhe deri në përkeqësimin e situatës në Qeveri. Ne kemi një koalicion qeverisës mjaftë stabil dhe jemi duke punuar që pas gjithë ndodhive të japim një mesazh që shteti po vendoset në binar të drejtë dhe shumë çështje të pazgjidhura për vite me radhë do të fillojnë të shohin dritë”, u shpreh Sulejmani.

Ai shtoi se shpeshherë edhe brenda familjeve kemi kur ka mosmarrëveshje, por kur punohet për tejkalimin e situatës gjithsesi se do të gjendet rruga.

Ministri i Shëndetësisë, Arben Taravari, ka informuar se me rritje lineare të pagave të punëtorëve shëndetësor është një mesazh i qartë për përkushtimin e kësaj qeverie për dinjitetin e të gjithë punonjësve shëndetësor. Ministri Taravari, ka shkruar se kjo nuk është vetëm një rritje e pagës – kjo është një mesazh i qartë se puna, përkushtimi dhe dinjiteti i punëtorëve shëndetësorë më në fund po vlerësohen!

“Me rritjen lineare prej 2.500 denarëve dhe rritjen e nëntorit, rritja totale për të gjithë të punësuarit në shëndetësinë publike arrin në 4.815 denarë, ndërsa për infermierët madje 6.200 denarë. Kjo do të thotë një pagë mesatare prej rreth 50.200 denarësh! Me rritjen e tetorit prej 10.49%, në mënyrë kumulative këtë vit kemi një rritje prej 17.18%. Dhe ajo që është më e rëndësishme – rritja reale e pagave për vitin 2024/25 është 9.4%, që është më shumë se dyfishi i rritjes gjatë gjithë periudhës 2021–2023”, ka shkruar Taravari.

Ai ka shtuar se kjo është një epokë e re për shëndetësinë publike – një epokë e respektit, e stabilitetit dhe e sigurisë! Dhe kjo është vetëm fillimi!