Kryetari i Alternativës, Zeqirija Ibrahimi ka njoftuar se është nënshkruar në Librinë e Zisë, e hapur në Kuvend, për viktimat e tragjedisë së Koçani.

Sot u nënshkrova në Librin e Zisë, që është hapur në kuvendin republikan.

Me këtë rast shkrova:

“Tragjedia në Koçani është përtej kufijve të fjalëve që mund të shprehin dhimbje. Ngushëllime familjarëve, që i humbën të dashurit e tyre, si dhe të gjithë qytetarëve të vendit tonë, që janë mbërthyer në pikëllim. Vetëm së bashku mund ta kalojmë këtë dhimbje. Ngushëllime!”, ka shkruar Ibrahimi.

Ekipet mjekësore të institucioneve shëndetësore në vend vazhdojnë të jenë plotësisht të angazhuara për të ofruar kujdesin e nevojshëm për pacientët e hospitalizuar, ka bërë të ditur Ministri i Shëndetësisë, Arben Taravari.

Sipas të dhënave zyrtare, aktualisht në klinikat dhe spitalet e vendit po trajtohen dhjetëra pacientë, ndërsa disa janë dërguar jashtë për kujdes të specializuar. Në klinikat vendase, situata paraqitet si më poshtë:

Klinika e Kirurgjisë Plastike – 10 pacientë
Klinika e Toksikologjisë – 10 pacientë
Klinika e Kirurgjisë Torakale – 4 pacientë
Traumatologjia – 2 pacientë
Kirurgjia Pediatrike – 4 pacientë
KARIL – 13 pacientë
Klinika e Pulmologjisë – 2 pacientë
Spitali i Përgjithshëm në Shtip – 2 pacientë
Spitali “8 Shtatori” – 17 pacientë
Klinika e Kirurgjisë “Shën Naum Ohri” – 11 pacientë
Sa i përket pacientëve të dërguar jashtë vendit, gjendja e tyre raportohet të jetë e qëndrueshme. Në Austri po trajtohen gjashtë pacientë, pesë prej të cilëve janë në terapi intensive, ndërsa një është transferuar në repartin e mjekësisë së brendshme.

Në Lituani, katër pacientë janë në terapi intensive dhe në gjendje stabile. Pesë pacientët e lënduar nga zjarri në Koçan, të cilët po trajtohen në Ankara, kanë filluar të marrin frymë vetë.

Gjithashtu, në Serbi ndodhen 30 pacientë nën kujdesin intensiv, ndërsa në Bullgari po trajtohen 15 të tjerë, nga të cilët shtatë janë në gjendje më të rëndë. Në Greqi, tetë pacientët po shënojnë përmirësim.

Ministri i Shëndetësisë, Arben Taravari, përmes një postimi në Facebook ka shprehur mirënjohje për mbështetjen e ofruar nga partnerët ndërkombëtarë, duke theksuar se gjatë natës pritet transferimi i disa pacientëve të tjerë në qendra mjekësore evropiane.

Deputeti i Koalicionit VLEN, Halil Snopçe, në një intervistë për MCN-TV, ka deklaruar se emëruesi i përbashkët i aksidenteve me Besa Transin, spitalin modular dhe rasti i fundit në Koçan, është paaftësia në menaxhim, korrupsioni i nivelit të lartë dhe mosfunksionimi i sistemit.

Në të kaluarën, siç tha Snopçe, jemi marrë me imazhin. Derisa shtoi se neve na duhet një riparim të sistemit.

“Në një shtet ku mbizotëron korrupsioni, instancat janë inekzistente. Nëse instancat janë inekzistente ato nuk kontribuojnë në interesin publik. Përgjegjësinë kryesore për tragjedinë e ka sistemi i trashëguar korruptues nga ish-pushtetet, por nuk mund të amnistohen edhe përgjegjësit të pushtetit aktual të cilët kanë pas obligim të ndërmarrin masa aq sa kanë mundur dhe jo vetëm të konstatojnë. Ne konstatojmë pa mos ndërmarrë hapa konkret. Si pasojë shembet edhe gjithë sistemi dhe kemi tragjedi të këtyre përmasave. Faktori njeri është faktori kryesor. Në Kroaci kishte një raport ku thuhet se gjasat janë minimale që atje të ndodh fatkeqësi të kësaj natyre. Pse? Sepse atje janë ndërmarrë masat e nevojshme nga ana e sistemit. Pra, sistemi është funksional. Nëse në zinxhirin e vendimmarrjes vijnë njerëz të korruptuar, atëherë humbim të gjithë dhe na ndodhin raste të tilla”, tha Snopçe.

Sipas Snopçes, tani mbetet vetëm me hapa të vendosur, pa kalkulime të meren masat e nevojshme për të hetuar rastin.

“Vetëm me një hetim transparent dhe objektiv mund ta zbusim mllefin e qytetarëve. Qytetarët sa më shpejt duhet të binden se do të ketë epilog. Pra, të gjithë që janë fajtorë, edhe prej ish pushtetit, por edhe nga pushteti aktual duhet të përgjigjen dhe të ndëshkohen nëse konstatohet fajësia”, shtoi në fund deputeti Snopçe.