Valbon Limani në terren: Inspekton ecurinë e punimeve në disa lokacione në qytet

Kryetari i Komunës së Gostivarit, Valbon Limani, ka inspektuar sot nga afër ecurinë e punimeve infrastrukturore që po realizohen në disa lokacione të qytetit.

Inspektimi ka nisur në rrugën “Ilja Anteski – Smok”, ku aktualisht po zhvillohen punime për rindërtimin e saj të tërësishëm. Gjatë vizitës, Limani është njoftuar për dinamikën e realizimit të punimeve dhe ka ndjekur nga afër procesin e ndërhyrjeve, me qëllim që ky aks rrugor t’u rikthehet qytetarëve me standarde bashkëkohore infrastrukturore.

Më pas, kryetari Limani ka vazhduar inspektimin edhe në disa lokacione të tjera në pjesën qendrore të qytetit, ku janë duke u realizuar projekte dhe ndërhyrje me rëndësi për përmirësimin e infrastrukturës publike.

Nga Komuna e Gostivarit bëjnë të ditur se mbikëqyrja dhe monitorimi i punimeve në terren do të vazhdojnë edhe në periudhën në vijim, me fokus të veçantë në garantimin e cilësisë, respektimin e standardeve dhe përfundimin e projekteve brenda afateve të parapara.