Bashkimi Demokratik për Integrim dënon me ashpërsinë më të madhe mashtrimin publik të kryer nga Ministri i Shëndetësisë, Azir Aliu, i cili ka manipuluar me vendimet për punësime në Spitalin Klinik të Tetovës, duke mashtruar 155 punonjës dhe gjithë opinionin publik.

Dje kemi dëshmuar një absurditet skandaloz: Azir Aliu e demanton Azir Aliun! Fillimisht njoftoi për punësime, pastaj i mohoi ato, duke dëshmuar se i gjithë procesi ishte një gënjeshtër politike për të fituar pikë elektorale mbi kurrizin e qytetarëve dhe punëtorëve të shëndetësisë.
Nuk mund të relativizojmë gënjeshtrën dhe mashtrimin. Duhet ta hedhim poshtë këtë teori të rrezikshme të manipulimit politik, ku një ministër hapur deklaron se çështja është kryer, madje akuzon të tjerët në atë kohë për gënjeshtarë, për të thënë sot se asgjë nuk është kryer, por “pas prolongimit do të kryhet”. Kjo nuk është politikë e përgjegjshme, kjo është tallje me qytetarët.
Ky duhej të ishte një akt i paprecedent, por fatkeqësisht po bëhet i përditshëm për funkionarët shqiptarë të cilët pa legjitimitet po rrijnë në qeveri, gjë që tregon për mungesë përgjegjësie, mungesë transparence dhe përbuzje ndaj qytetarëve dhe gjithë Maqedonisë së Veriut. Ministri Aliu ka humbur çdo kredibilitet dhe nuk mund të qëndrojë më asnjë ditë në krye të Ministrisë së Shëndetësisë.
BDI kërkon dorëheqjen e menjëhershme të Azir Aliut!
Shëndetësia nuk mund të udhëhiqet nga njerëz që mashtrojnë hapur dhe luajnë me fatin e qytetarëve dhe të punonjësve shëndetësorë.

Lëvizja Demokratike e udhëhequr nga Izet Mexhiti po përballet me një valë të re pakënaqësish dhe largimesh në radhët e saj, vetëm pak ditë pas përvjetorit të dytë të themelimit, shkruan Flaka

Edhe një nga figurat themeluese të partisë, Naim Salihu – anëtar i Këshillit Themelues dhe i Kryesisë Qendrore – njoftoi publikisht dorëheqjen nga Lëvizja Demokratike dhe rikthimin në Bashkimin Demokratik për Integrim (BDI). Në një deklaratë të ashpër, Salihu akuzoi drejtimin aktual se, pas hyrjes në qeveri me VMRO-DPMNE, nuk ka sjellë avancim të pozitës së shqiptarëve, por “degradim të plotë” dhe “fshirje të arritjeve të 20 viteve”.

“Unë nuk mund të jem pjesë e kësaj faqeje të errët të historisë. Kthehemi aty ku duhet të jemi, në radhët e BDI-së, për të ndalur përdhosjen e arritjeve tona,” deklaroi Salihu, duke shtuar se vendimi i tij është “i menduar thellë dhe i ndershëm ndaj vetes dhe kombit”.

Largimi i tij vjen në një atmosferë të tensionuar brenda LD-së, ku zërat kritikë po shtohen edhe nga figura të tjera të njohura. Bashkim Saiti, anëtar nga Kumanova, shprehu hapur pakënaqësinë për mungesën e strukturave funksionale, pavarësisht dy viteve nga themelimi:

“Dy vjet nuk janë pak – e hala pa struktura, pa organe që punojnë, pa drejtim të kjartë ku po shkojmë. Rinia ka prit me durim, por pritja e gjatë kthehet në zhgënjim. O veprojmë sot burrnisht, o e mbyllim me faqe të bardhë,” tha Saiti.

Në të njëjtën linjë reagoi edhe Muhamet Ameti, një tjetër themelues i Lëvizjes, i cili përvjetorin e dytë e quajti “përvjetorin e fundit pa organe, pa llogaridhënie dhe vetëm me fjalë por pa vepra”. Mesazhin e tij e mbështeti publikisht edhe Fejzulla Kovaçi, kushëri i vetë liderit Mexhiti, i cili shkroi: “Shumë e vërtetë, po kur mundin që e dham mos ju qoftë hallall.”

Këto reagime, që vijnë jo vetëm nga baza por edhe nga rreth i afërt i drejtimit të partisë, po e thellojnë perceptimin e një krize të brendshme serioze në Lëvizjen Demokratike, me pasoja të mundshme në skenën politike shqiptare në vend.

Aleanca për Shqiptarët shpreh shqetësim të thellë për të dhënat e publikuara nga Byroja për Prokurime Publike, ku kompania “Markovski Kompani” nga Manastiri, në pronësi të Borçe Markovskit – konsull nderi i Bjellorusisë dhe biznesmen që shmang opinionin publik – rezulton përsëri lider absolut në vlerën e tenderëve shtetërorë të fituar për vitin 2024, me mbi 75 milionë euro kontrata, kryesisht me ndërmarrjen shtetërore AD ESM.

Ky biznesmen ka qenë i lidhur me kompani bjelloruse të sanksionuara nga SHBA për afërsi me regjimin autoritar të Aleksandër Lukashenkos, ndërsa në Serbi bashkëpunon me struktura të lidhura me ish-drejtorë të doganave dhe kompani publike të pyjeve. Këto lidhje paraqesin jo vetëm rrezik ekonomik e korrupsion institucional, por edhe rrezik për sigurinë kombëtare dhe orientimin euroatlantik të vendit.

Edhe pse vitin e kaluar u anulua një kontratë prej 46 milionë eurosh dhe pati hetime të Prokurorisë dhe Policisë financiare për tenderë të dyshimtë, “Markovski” sërish kryeson listat, me një diferencë prej 32 milionë eurosh nga kompania e dytë në renditje.

Qeveria aktuale e VMRO-së, me mbështetjen e heshtur të partnerëve shqiptarë të VLEN-it, jo vetëm që nuk ka marrë masa për të ndaluar këtë praktikë të dyshimtë, por ka vazhduar të nënshkruajë kontrata të reja, duke u justifikuar me çmimet “më të ulëta” – një alibi e vjetër për kontratat e mëdha të pakontrolluara.

VLEN, e cila premtonte transparencë dhe luftë kundër korrupsionit, as që guxon t’i hapë këto çështje në qeveri dhe as që e llogarit kush në vendimmarrje. Ky është tregues se interesat e qytetarëve dhe orientimi strategjik euroatlantik janë sakrifikuar për interesa të ngushta politike dhe biznesore.

Aleanca për Shqiptarët kërkon të kryhet një hetim i plotë nga Prokuroria dhe institucionet antikorrupsion mbi të gjitha tenderët e “Markovski Kompani”, të bëhet transparencë të plotë mbi lidhjet me kompani dhe persona të sanksionuar nga SHBA dhe BE, dhe ndërprerje të kontratave me subjekte që kanë lidhje me regjime autoritare dhe të dyshimta për korrupsion.

Heshtja është bashkëfajësi. E ardhmja euroatlantike e vendit nuk mund të rrezikohet për tenderë dhe interesa të errëta.

Aleanca për Shqiptarët