Limani: Data e përsëritjes së zgjedhjeve duhet të ishte 28 dhjetori, qytetarët do ta thonë fjalën e fundit më 11 janar

Kryetari i Komunës së Gostivarit, Valbon Limani, ka deklaruar se në bazë të afateve ligjore, data e përsëritjes së zgjedhjeve në Gostivar do të duhej të ishte 28 dhjetori. Ai u pyet nga gazetarët në lidhje me shpalljen e datës së zgjedhjeve nga kryeparlamentari Afrim Gashi. Limani theksoi se qytetarët do ta kenë fjalën e fundit, pavarësisht datës së vendosur për mbajtjen e votimeve.

“Edhe më 11 janar do të shihemi përsëri, qytetarët do të vendosin,” u shpreh ai.

Ai tha se nuk ka informacione nëse Qeveria do të emërojë një person të besuar në krye të komunës deri në mbajtjen e zgjedhjeve. Sipas tij, një vendim i tillë pritet të merret nesër, pasi Qeveria ka paralajmëruar seancë për të martën, ku pritet të diskutohet edhe kjo çështje.

I pyetur nëse do të mbetet kandidat i AKI për Gostivarin, Limani u përgjigj shkurt:

“Po, mbetem kandidat!”.

Më herët, Limani kishte paralajmëruar se nëse Qeveria vendos të emërojë një të besuar të saj në krye të komunës, ai do ta ankimojë vendimin në Gjykatën Kushtetuese.