Aleanca për Shqiptarët – Dega në Gostivar ka akuzuar publikisht drejtorin e Spitalit të Përgjithshëm të qytetit, Emri Bajramin, për keqpërdorim të funksionit dhe politizim të institucionit.

Sipas ASh-së, drejtori ka organizuar një mbledhje joformale me shefat e reparteve dhe motrat kryesore në restorantin e spitalit, ku më pas është shfaqur edhe kandidati i VLEN-it për kryetar të Gostivarit.

“Ky veprim përbën shembull klasik të politizimit të skajshëm të institucioneve dhe ka shkaktuar revoltë të arsyeshme te personeli i spitalit, të cilët janë detyruar të dëgjojnë ‘përrallat’ e kandidatit në garë,” thuhet në reagimin e Degës së ASH-së në Gostivar.

Partia kërkon reagim urgjent nga institucionet kompetente.
“Kërkojmë nga Komisioni Shtetëror për Parandalimin e Korrupsionit, OSBE, KSHZ, si dhe nga Ministri i Shëndetësisë, Azir Aliu – i cili e ka emëruar këtë drejtor – që të ndërmarrin procedurat e nevojshme ligjore dhe të shqiptojnë sanksionet për këtë abuzim flagrant,” theksohet në komunikatë.

ASH-Gostivar nënvizon se praktikat e tilla nuk do ta frikësojnë kuadrin shqiptar.
“Forma të tilla presioni dhe instrumentalizimi politik nuk e frikësojnë kuadrin shqiptar. Përkundrazi, ato vetëm sa e shtojnë revoltën qytetare dhe e forcojnë bindjen për mobilizim masiv në zgjedhjet e tetorit,” deklaron partia.

Në fund, ASH e cilëson pushtetin aktual si të kapur dhe të bazuar mbi shantazhe e interesa të ngushta.

“Pushteti i kapur, i ndërtuar mbi shantazhe dhe interesa të ngushta, nuk mund të ketë legjitimitet tek shqiptarët. Aleanca për Shqiptarët është e bindur se verdikti i qytetarëve në tetor do të jetë i qartë dhe ndëshkues për këtë mënyrë qeverisjeje,” përfundon reagimi i Degës së ASH-së në Gostivar.

Kryetari i Degës së Aleancës për Shqiptarët në Kumanovë, Huzerir Mustafi, ka reaguar ashpër ndaj mënyrës se si ndahen investimet infrastrukturore në qytet.

Mustafi ka akuzuar pushtetin lokal se po favorizon lagjet me shumicë maqedonase, ndërsa shqiptarët po lihen anash. Mustafi kujtoi rastin e bekatonizimit të hapësirës pas stadiumit të KF Bashkimi, ku sipas tij pati kundërshtime nga kryetarja e Këshillit Komunal, ndërsa sot po promovohen projekte të ngjashme në lagje maqedonase pa asnjë pengesë.

Postimi i plotë i Mustafit:

“Kur unë dhe nënkryetari i ASH-së Gezim Kadriu insistuam dhe vendosëm ta bekatonizonim hapsirën pas stadiumit të KF Bashkimit, kryetarës së këshillit aq shumë ju dhimbsën ato bekatonka sa që para çdo votimi të buxheti e ribalanci e thoshte: “Keni harxhuar shumë bekaton aty, sa që e keni bërë pistë për aeroplana”.

Ndërsa tani po e njejta promovon parking në një lagje që banohet me popullsi maqedonase, po për këtu nuk i dhimbsen bekatonkat e harxhuara.
E për deri sa VLENi vazhdon të FLEN, rikujtoj opinionin e qytetarët shqiptarë të Kumanovës, së këtë periudhë janë bekatonizuar gjithsej 29 rrugë, dhe të gjitha në lagjet e fshatrat me popullsi maqedonase, ndërsa asnjë rrugë në lagjet tona nuk është bekatonizuar.
Tri vite e para të këtij pushteti, tjetër këngë këndohej, gjithçka ndahej në shifrat 30, 40 madje edhe 50% për vendbanimet tona.

Kjo qasje dhe ky nënçmim duhet dhe do të përfundoj sa më shpejtë!”, ka përfunduar Mustafi.

Në drejtim të prioriteteve të veta programore për zhvillim rajonal të qëndrueshëm, perspektivë evropiane për të rinjtë dhe mbështetje të komuniteteve me diasporë bullgare historike, Fondacioni “Kujtesa Bullgare” dhe kryetari i tij, dr. Milen Vrabevski, realizuan edhe një projekt të rëndësishëm në Komunën e Pustecit, Shqipëri, njoftojnë nga Fondacioni.

Me kërkesë të kryetarit të Komunës së Pustecit, z. Pali Kolefski, fondacioni financoi një projekt të madh për ndërtimin dhe zëvendësimin e ndriçimit rrugor në katër vendbanime – fshatrat Zrnovsko, Globoceni, Gorna Gorica dhe Sredna Gorica. Me donacionin u siguruan 100 llamba të reja rrugore, të cilat do të garantojnë më shumë siguri dhe komoditet për banorët.

Dorëzimi simbolik i donacionit u mbajt në fshatin Zrnovsko në praninë e ambasadorit të jashtëzakonshëm dhe fuqiplotë të Republikës së Bullgarisë në Shqipëri, kryetarit Kolefski, nënkryetarit Jani Nikola dhe përfaqësuesve të Fondacionit “Kujtesa Bullgare”.

“Ne e ndjekim me përkushtim misionin tonë në Prespën e Vogël – të mbështesim zhvillimin e qëndrueshëm të rajonit dhe të krijojmë një mjedis më të mirë për jetesë. Me këtë donacion jo vetëm që zëvendësuam ndriçimin e vjetruar dhe jofunksional, por siguruam edhe një numër të mjaftueshëm llambash të reja për të gjitha rrugët. Ne besojmë se përmirësimi i infrastrukturës është një investim në sigurinë dhe komoditetin e njerëzve, por edhe një hap i rëndësishëm për mbajtjen e të rinjve në rajon,” deklaruan nga fondacioni.

Kryetari i Pustecit, z. Kolefski, shprehu mirënjohje për donacionin:
“Me ndihmën e Fondacionit ‘Kujtesa Bullgare’, gjatë viteve të fundit kemi arritur të përmirësojmë ndjeshëm kushtet në komunën tonë dhe shpresojmë që bashkëpunimi i mirë të vazhdojë edhe në të ardhmen.”

Ambasadori i Republikës së Bullgarisë në Shqipëri, Sh. T. Ivajllo Kirov, shtoi se ky donacion e bën Komunën e Pustecit një nga komunat me rritjen më të shpejtë në vend.