Mbrëmë, 24 vjet pas Marrëveshjes Kornizë të Ohrit – dokumentit që shpëtoi vendin nga gjakderdhja dhe hapi rrugën për të drejtat politike e kulturore të shqiptarëve – dy nga figurat të skenës politike shqiptare, Afrim Gashi dhe Orhan Murtezani, vendosën të na tregojnë një pamje tjetër: jo të kujtesës, jo të dinjitetit, por të servilizmit politik.

Në vend që të nderonin sakrificën e atyre që firmosën marrëveshjen, Gashi dhe Murtezani u gëzuan si “fëmijë” në ditëlindje për praninë e Ivan Stoilkoviçit – një politikan i njohur jo për respektin ndaj shqiptarëve, por për qëndrimet e tij të hapura anti-shqiptare dhe për përqafimin politik me Beogradin dhe Moskën. Në foto, njëri ia shtrëngon dorën me një buzëqeshje që të bën të pyesësh nëse po nderohej Marrëveshja e Ohrit apo po niste ndonjë marrëveshje tjetër… ndërsa tjetri shikon me syrin e tij “magjik” “liderin e madh”.

Stoilkoviç është i njëjti njeri që, sapo mori drejtimin e Ministrisë për Marrëdhënie mes Bashkësive, largoi dhjetëra shqiptarë nga puna. Ai ka të njëjtin mendim për luftën e UÇK-së si Mickoski – se luftëtarët tanë nuk janë heronj, por problem. Dhe pikërisht këtë njeri, dy politikanë shqiptarë zgjedhin ta admirojnë në një natë që supozohej të ishte përkujtim i sakrificës shqiptare.

Marrëveshja e Ohrit nuk u bë që pas 24 vitesh të shndërrohej në skenë ku shqiptarët e pushtetit rrinë të buzëqeshur krah atyre që u kanë hequr bukën nga goja dhe dinjitetin nga institucionet. Ky është përbuzim për çdo qytetar shqiptar që e ka ndjerë në shpinë diskriminimin.

E nëse Gashi e Murtezani menduan se mbrëmë po bënin diplomaci, në fakt po bënin vetëm një gjë: po i dërgonin mesazh shqiptarëve se kujtesa historike mund të shitet lirë, mjafton të ketë një karrige në pushtet. Dhe ky mesazh nuk ka nevojë për përkthim – është fyerje në çdo gjuhë.

Në kohën kur mbante postin e ministrit të Punëve të Jashtme të Maqedonisë së Veriut, Bujar Osmani – sot kandidat i Beslidhjes Aleanca Kombëtare për Integrim për komunën e Çairit – ishte një nga zërat më aktivë në Këshillin e Evropës për mbështetjen e anëtarësimit të Kosovës, shkruan PressOnline.al

Gjatë një fjale të mbajtur në Strasburg, Osmani theksoi rëndësinë e mos-hezetimit për të pranuar anëtarë të rinj që ndajnë të njëjtat vlera dhe angazhime me Evropën.

“Ne kemi mbështetur vazhdimisht përpjekjen e Kosovës për anëtarësim në Këshillin e Evropës dhe mirëpresim opinionin e APKE-së që i rekomandon Komitetit të Ministrave të ftojë Kosovën të bashkohet me organizatën. Qytetarët e Kosovës meritojnë të mbrohen nga Konventa Evropiane e të Drejtave të Njeriut dhe instrumente të tjera,” – deklaroi atëherë Osmani.

Kjo deklaratë e tij mbetet një nga momentet më të qarta të angazhimit diplomatik të Shkupit për integrimin e Kosovës në strukturat evropiane, duke e pozicionuar Maqedoninë e Veriut si një përkrahëse të vendosur të fqinjit të saj.(PressOnline.al)

Në Ditën Ndërkombëtare të Rinisë, kryetarja e Forumit Rinor të Aleancës për Shqiptarët (FRASH), Viola Ramadani, ka reaguar me një mesazh të fuqishëm në rrjetet sociale, duke kritikuar gjendjen e rëndë me të cilën përballen të rinjtë në Maqedoninë e Veriut, informon Presidentja

“Të rinjtë nuk festojnë as sot, në ditën e tyre, sepse nuk kanë arsye për të festuar. Sot që flasim, Maqedonia e Veriut përballet me regres në arsim, politikat rinore dhe largimin masiv të trurit nga vendi. Krejt çka u ofrohet të rinjve janë premtime të rreme për punësime partiake e të përkohshme.”

Ramadani shpreh bindjen se ky realitet do të ndryshojë, duke u mbështetur në fuqinë e vetë të rinjve për t’i bërë ballë padrejtësive dhe pabarazive.

“Në mesin e krejt kësaj pasigurie, një gjë është shumë e sigurt! Ditët që ky realitet do të ndryshojë janë të numëruara. Po, ka dritë në fund të tunelit. Sepse askush më mirë se të rinjtë nuk din t’i thotë stop nëpërkëmbjes.”