Ish-ministri i Jashtëm i Maqedonisë së Veriut, Bujar Osmani, ka deklaruar se Shkupi është duke u larguar nga Bashkimi Evropian dhe po afrohet drejt botës serbe.

Në emisionin “Rubikon” në Klan Kosova, ai ka pohuar se është zhdukur krejtësisht diskursi publik për BE-në në Maqedoninë e Veriut.

“Maqedonia e Veriut vërtet është në një udhëkryq serioz edhe në gjeopolitikë, shumë keq janë punët. Për shkak se diskursi publik me Bashkimin Evropian është zhdukur krejtësisht, unë kam thënë gjithmonë se problemet e Maqedonisë së Veriut do të fillojnë kur BE-ja nuk do të jetë më kartë fituese për zgjedhje,” tha Osmani.

I njëjti shtoi se shqiptarët janë pro BE-së në Maqedoninë e Veriut dhe se partitë politike maqedonase i ikin kësaj teme.

“VLEN-i i ik, sepse ka dështuar nga premtimet e saj se do të bëjë një shtytje në këtë proces dhe kemi mbetur vetëm ne, të cilët jemi një zë i vetëm që tentojmë ta mbajmë gjallë si temë. Problemi i vetëm është se largimi nga BE-ja nuk të fut në vakuum, në status quo, të fut në drejtim tjetër. Prandaj, alternativa është BE ose bota serbe, pa asnjë milimetër vakuum ndërmjet. Një hap më pak drejt BE-së është një hap më shumë drejt botës serbe. Andaj gjithmonë shqiptarët kanë qenë më pro-evropianë.”

“Për shkak se ata, edhe në vetëdije edhe në nënvetëdije, e dinë se ndërprerja e rrugës andej të dërgon këndej. Këtë po e shohim në jetën praktike, ne krejtësisht jemi ulur në prehrin e botës serbe, politikisht dhe në të gjitha aspektet,” tha Osmani. /Klankosova.tv

Aleanca Kombëtare për Integrim (AKI) ka hapur zyrtarisht sonte shtabin zgjedhor në Lagjen e Re në Gostivar, në një atmosferë madhështore dhe me pjesëmarrje masive të qytetarëve, aktivistëve dhe përkrahësve.

Në këtë ngjarje morën pjesë kryetari aktual i Komunës së Gostivarit dhe kandidati për një mandat të ri, z. Valbon Limani, bartësi i listës për këshilltarë komunal, z. Valdet Xhaferi, si dhe kandidatët tjerë të koalicionit AKI për këshillin komunal.

Gjatë fjalimeve të tyre, kryetari Limani dhe z. Xhaferi falënderuan banorët e Lagjes së Re për përkrahjen e jashtëzakonshme, duke theksuar se kjo lagje, si një ndër zonat me numrin më të madh të votuesve, do të luajë rol kyç në fitoren e AKI-së që në raundin e parë më 19 tetor.

“Këto zgjedhje nuk janë vetëm lokale – ato janë një referendum kombëtar për shqiptarët në Maqedoninë e Veriut. Është koha të dërgojmë një mesazh të fuqishëm dhe të qartë ndaj qeverisë monoetnike: përfaqësuesit e vërtetë të shqiptarëve janë këtu, në mesin e popullit, dhe janë gati ta çojnë vendin drejt zgjedhjeve të parakohshme parlamentare,” – u shprehën ndër të tjera Limani dhe Xhaferi.

Ata bënë thirrje për mobilizim të plotë dhe angazhim maksimal, duke theksuar se fitorja e AKI-së në Gostivar do të jetë sinjali i parë i një ndryshimi më të madh në nivel shtetëror.

Kandidati i Aleancës për Kombëtare për Integrim (AKI) për kryetar të Komunës së Vrapçishtit, Isen Shabani, së bashku me kundërkandidatin e tij, nënshkroi sot në ambientet e Komisionit Komunal Zgjedhor – Vrapçisht Kodin për zgjedhje të ndershme, demokratike dhe transparente, njofton Top24

Shabani e cilësoi këtë akt si një zotim serioz për një proces zgjedhor me standarde të larta demokratike dhe ftoi qytetarët të marrin pjesë masivisht në votime.

“Sot, në ambientet e Komisionit Komunal Zgjedhor – Vrapçisht, së bashku me kundërkandidatin tim, nënshkruam Kodin për zgjedhje korrekte, demokratike dhe transparente. Ky akt nuk është vetëm një formalitet, por një zotim i qartë se e gjithë fushata dhe procesi zgjedhor do të zhvillohet me ndershmëri, respekt dhe barazi për çdo qytetar. Ftoj të gjithë qytetarët që më 19 tetor të dalin masivisht dhe të votojnë sipas bindjes së tyre, me vendosmëri që askush – as kryeministri e as ndonjë politikan tjetër – të mos ua caktojë të ardhmen. E ardhmja e Vrapçishtit vendoset vetëm nga qytetarët e tij, me votë të lirë dhe demokratike. Uroj që të kemi një garë të ndershme dhe demokratike. Shëndet dhe sukses për të gjithë!”