Kuvendi i Degës së Çuçer-Sandevës ka mbajtur sot mbledhjen për konstituimin e Shtabit për Zgjedhjet Lokale të tetorit, ku me vota unanime Elham Aliu është zgjedhur në krye të shtabit zgjedhor.

Zgjedhja e Aliut u shoqërua me besim të plotë nga anëtarësia, e cila i dha përkrahje të qartë për udhëheqjen e fushatës në këtë proces zgjedhor të rëndësishëm për komunën.

“Urime Elhamit për detyrën e re! Suksese në punë – na priftë e mbara në këtë proces të rëndësishëm zgjedhor!”, thuhet në njoftimin zyrtar nga Dega.

Kjo lëvizje shënon hapin e parë në organizimin strukturor në prag të fushatës për zgjedhjet lokale të tetorit, me pritshmëri për një angazhim të fuqishëm në terren.

Nga koalicioni VLEN përmes një njoftimi thonë se pas 1 viti qeverisje, rezultatet po ndjehen edhe më shumë nga qytetarët.

Sipas VLEN-it po realizohen 43 projekte madhore në 33 komuna, me vlerë mbi 227 milionë denarë, që synojnë ndërtimin e ujësjellësve, rrjeteve të kanalizimit dhe menaxhimin efikas të ujërave.

“Ujë i pastër, kanalizim modern dhe mjedis i mbrojtur janë tre shtyllat mbi të cilat ndërtohet ky plan ambicioz investimesh që do të prekë qindra mijëra qytetarë nga Kërçova e deri në Sveti Nikollë, nga Ohri e Struga, deri në Tetovë, Haraçinë, Studeniçan, Çair, Radovish, Gradsko e shumë të tjera. Në mënyrë të veçantë, VLEN nënvizon me krenari nisjen e projektit për ndërtimin e rrjetit të kanalizimit fekal për fshatin Xhepçisht, një investim prej 30 milionë denarësh, i firmosur në Ministrinë e Ambientit Jetësor dhe Planifikimit Hapësinor, në prani të ministrit Izet Mexhiti dhe përfaqësuesve lokalë.

Ky projekt nuk është thjesht një tubacion apo një dosje teknike, por një hap i domosdoshëm drejt dinjitetit urban, shëndetit publik, mbrojtjes së mjedisit dhe zhvillimit të qëndrueshëm rural.

Ky është VLEN: një forcë politike që nuk bën kompromise me premtimet, që nuk shet iluzione, por realizon projekte me ndikim konkret në cilësinë e jetës së qytetarëve.

Po ndërtojmë çdo ditë, me punë, vizion dhe përgjegjësi, sepse e ardhmja nuk pret. Vendbanimet shqiptare dhe çdo komunë tjetër që e do zhvillimin, e ndjen prezencën e VLEN-it, jo me slogane zgjedhje, por me investime konkrete dhe rezultate të dukshme.

Falë ministrit Izet Mexhiti dhe ekipit të tij, Ministria e Mjedisit Jetësor është kthyer në një instrument kyç të transformimit pozitiv të vendit, me projekte që lënë gjurmë dhe ndryshojnë realitetin në komuna. Vazhdojmë përpara, me qytetarin në qendër, me transparencë, me profesionalizëm dhe me përkushtim të plotë ndaj interesit publik”, thuhet në njortimin e VLEN-it.

Me iniciativën e Bujar Tairit, Selam Terziut dhe Skender Jasharit, është arritur pajtimi i gjakut mes dy familjeve në Tetovë – familjes Mustafi nga Reçica e Vogël dhe familjes Bardhi nga fshati Llacë.

Ish-ushtari i Ushtrisë Çlirimtare Kombëtare, Shkodran Mustafi, ka bërë një akt të madh njerëzor duke falur gjakun dhe duke sjellë paqe mes dy familjeve, në prani të efendi hoxhë Abdurrahim Muratit dhe anëtarëve të të dyja familjeve.

Ky pajtim është vlerësuar si një shembull i rrallë i fisnikërisë, maturisë dhe shpirtit të faljes, duke dhënë një mesazh të fortë për bashkim, pajtim dhe vëllazëri në mesin e shqiptarëve.