Me disa përmirësime dhe stangim në shumë fusha të tjera, sidomos tek infrastruktura, ambienti…, Raporti i OECD “Treguesi i konvergjencës ekonomike për Ballkanin Perëndimor 2025” e rendit Maqedoninë të katërtën mes gjashtë vendeve të rajonit, me përparim të kufizuar në ngushtimin e hendekut me BE-në që nga viti 2014-16. Duke lënë pas vetëm Bosnje dhe Hercegovinën dhe Kosovën e cila renditet e fundit. Infrastruktura dhe Lidhshmëria janë fusha më sfiduese e politikave për Maqedoninë, ku ajo renditet e parafundit në rajon. Ekonomia ka përjetuar një rënie në shumicën e treguesve, veçanërisht ato që lidhen me infrastrukturën e transportit.

“Në Maqedoninë e Veriut, shpenzimet vjetore mbetën nën 10 milionë euro gjatë viteve 2013-22 dhe përbënin vetëm 0.04% të PBB-së në vitin 2022, duke paraqitur sfida për qëndrueshmërinë e infrastrukturës rrugore”, thekson raporti.

Infrastruktura energjetike është gjithashtu një fushë shqetësuese, me nivele të konsiderueshme humbjesh të energjisë të shoqëruara me çmime të larta të energjisë elektrike për bizneset. “Maqedonia e Veriut renditet e treta në rajon në grupin e Aftësive, me performancë të ngecur me kalimin e kohës. Ndërsa rezultatet arsimore dhe normat e punësimit janë përmirësuar, mundësitë e kufizuara arsimore dhe trajnuese për të rriturit, së bashku me shpenzimet vazhdimisht të ulëta për Kërkim dhe Zhvillim, vazhdojnë të pengojnë performancën e ekonomisë”, thuhet në raport.

Maqedonia e Veriut renditet e treta në grupin e Gjelbërimit; megjithatë, si shumë ekonomi në rajon, ajo ka përjetuar një trend divergjent. Performanca relative e të gjithë treguesve është përkeqësuar, thekson raporti, me një progres veçanërisht të ngadaltë drejt dekarbonizimit. E vetmja fushë konvergjence është menaxhimi i mbeturinave, me një pjesë në rritje të mbeturinave që riciklohen.

Sa i takon Mjedisit të Biznesit, ekonomia ka bërë hapa të mirë në tërheqjen e një vëllimi më të madh të investimeve të huaja direkte (IHD) dhe në regjistrimin e niveleve në rritje të investimeve private dhe tregtisë. “Në të kundërt, sfidat vazhdojnë në sigurimin e një ‘fushe loje të barabartë’, me rezultate në përkeqësim në lidhje me korrupsionin”, vëren raporti.

Transformimi Dixhital është fusha me performancën më të mirë të Maqedonisë, duke u renditur e dyta në rajon. Sektori i zhvilluar i TIK-ut në ekonomi dhe miratimi relativisht i lartë i teknologjive dixhitale nga bizneset e saj kontribojnë në këtë performancë të fortë. Megjithatë, niveli i ulët i ndërveprimit me autoritetet publike nxjerr në pah mangësitë në dixhitalizimin e shërbimeve publike. (koha.mk)

Pas kërcënimeve të raportuara ndaj gazetarit Nevrij Ademi, ka reaguar edhe Aleanca për Shqiptarët e Arben Taravarit, duke dënuar ashpër gjuhën e presionit dhe frikësimit nga eksponentë të partive në pushtet.

“Aleanca për Shqiptarët dënon ashpër presionet dhe kërcënimet ndaj gazetarëve nga eksponentë të partive në pushtet. Këto veprime janë të papranueshme për një shtet që pretendon të jetë demokratik dhe përbëjnë një rrezik serioz për lirinë e medias dhe të shprehjes. Fjalën e lirë nuk do ta ndalë askush me frikësim. Kërkojmë që institucionet përgjegjëse të reagojnë menjëherë dhe të garantojnë sigurinë e gazetarëve.” thuhet në reagimin e ASH-Taravari

Me këtë, Aleanca për Shqiptarët i bashkohet reagimeve të mëhershme nga Bujar Osmani dhe Faton Ahmeti, duke ngritur zërin kundër kërcënimeve që, sipas tyre, rrezikojnë themelet e demokracisë dhe lirinë e medias në vend.

Kryetari i Komunës së Gostivarit, Valbon Limani ka bërë të ditur se në çerdhen për fëmijë “Lulishtja” në Gostivar ka investuar 65 mijë euro për rregullimin e fasadës së re, kanalet kulluese të ujit, hyrjet dhe disa punim të tjera, transmeton TV21. Në një prononcim për mediat Limani theksoi se ky investim ka përmirësuar dukshëm efikasitetin energjetik.

“Ky investim ka përmirësuar dukshëm efikasitetin energjetik të këtij objekti si gjatë muajve të dimrit, por edhe gjatë muajve të verës. Janë bërë edhe punime të tjera në pjesën e jashtme të objektit. E gjithë kjo, ky ndryshim është bërë në bashkëpunim me çerdhen, me mjetet vetanake të çerdhes por edhe me ndihmën e komunës. Shpresojmë se këto investime do të ndihmojnë në mbarëvajtjen më të mirë të procesit këtu në çerdhe. Nuk do të ndalemi këtu, biseduam me drejtoreshën edhe për projekte tjera në të ardhmen që kushtet në të gjitha çerdhet e Gostivarit të jenë dinjitoze, të mira për fëmijët tanë”, deklaroi kryetari i komunës së Gostivarit, Valbon Limani.