Çështja e njohjes së Palestinës është bërë përsëri aktuale përpara Debatit të Përgjithshëm në Asamblenë e 80-të të Përgjithshme të Kombeve të Bashkuara. Pas njoftimeve se Franca, Mbretëria e Bashkuar, Kanadaja, Australia dhe Portugalia do ta njohin Palestinën si shtet sovran, në Maqedoni po rritet presioni për të folur për këtë çështje. Për momentin, institucionet heshtin për këtë çështje, transmeton Portalb.mk.

Letër presidentes Siljanovska

Iniciativa “Të gjithë për Palestinën”, i dërgoi letër presidentes së Maqedonisë, pak para fillimit të Debatit të Përgjithshëm në Asamblenë e 80-të të Përgjithshme të OKB-së, e cila fillon nesër, më 23.9.2025. Në letër, i kujtojnë presidentes se në Kombet e Bashkuara, zëri i Maqedonisë si shtet anëtar duhet të përfaqësojë zërin e qytetarëve, dhe jo interesat ekonomike dhe politike të individëve

Në të njëjtën kohë, iniciativa kërkon:

Maqedonia të dënojë publikisht dhe menjëherë gjenocidin kundër popullit palestinez dhe të njohë Palestinën;

Të bëjë thirrje urgjente për armëpushim dhe hyrjen e ndihmës humanitare në Gaza që nuk shpërndahet nga Izraeli;

Të fillojë të votojë PËR solidaritet me popullin palestinez në të gjitha votimet e ardhshme në OKB;

Të vendosë sanksione ndaj Izraelit, të ndërpresë njohjen e Izraelit, të ndërpresë menjëherë tregtinë me Izraelin dhe të ndalojë çdo bashkëpunim kulturor, arsimor dhe sportiv me Izraelin;

Të kthejë politikën e jashtme në duart e popullit me një frymë solidariteti, jo me një frymë përfitimi personal.

Këtë vit, tema e Debatit të Përgjithshëm është “Më mirë së bashku: Më shumë se 80 vjet paqe, zhvillim dhe të drejta të njeriut”. Në një mesazh, presidentja Gordana Siljanovska Davkova theksoi se “ky 80-vjetor është një thirrje zgjimi, për të riafirmuar angazhimin tonë ndaj Kartës së OKB-së dhe rendit të saj ndërkombëtar të bazuar në të drejta dhe rregulla”.

“Varet nga ne nëse OKB-ja do të përballet me sfidat dhe do të vazhdojë të ndërtojë një të ardhme paqeje, drejtësie dhe progresi në një planet të shëndetshëm”, thotë Siljanovska.

Jo vetëm fjalë, por edhe vepra

Nisma thotë se fjalët janë boshe nëse nuk pasohen nga hapa konkretë, por edhe të rrezikshme nëse veprohet sipas tyre në një mënyrë që është plotësisht në kundërshtim me kuptimin e tyre. Prandaj, ata kërkojnë që Maqedonia të dënojë publikisht dhe menjëherë gjenocidin kundër popullit palestinez dhe të njohë Palestinën, të kërkojë urgjentisht armëpushim dhe hyrjen e ndihmës humanitare në Gaza që nuk shpërndahet nga Izraeli, të vendosë sanksione ndaj Izraelit dhe “ta kthejë politikën e jashtme në duart e popullit në frymën e solidaritetit, jo në frymën e përfitimit personal”.

Si kujtesë, në qershor, Maqedonia ka abstenuar vazhdimisht armëpushimin në Gaza.Në prill 2025, RMV votoi kundër, në shkurt 2025, RMV abstenoi,në shtator të viti 2024 abstenoi, ndërsa edhe në tetor 2023 votoi e përmbajtur.

Shefi i diplomacisë maqedonase, Timço Mucunski, shpjegoi në atë kohë se rezoluta përmbante elementë që ishin në kundërshtim me interesat kombëtare maqedonase. “Problemi kryesor me rezolutën është përkufizimi jo mjaftueshëm i qartë i Hamasit”, tha Mucunski. Ky shpjegim kishte elementë të ngjashmërisë me atë që u tha nga ambasadorët izraelitë dhe amerikanë në organizatën botërore në prag të votimit për rezolutën në OKB.

Para seancës së Asamblesë së Përgjithshme të OKB-së, disa vende perëndimore njoftuan vendimin për të njohur Palestinën si shtet. Gjermania nuk është midis tyre, por presioni mbi qeverinë gjermane po rritet.

Pothuajse 150 nga 193 anëtarët e OKB-së e kanë njohur tashmë Palestinën, bashkë me Francën, Britaninë e Madhe dhe Kanadanë, fuqitë kryesore të G7-ës, grupi i shtatë vendeve më të zhvilluara industriale perëndimore. Shtetet e Bashkuara e kundërshtojnë kategorikisht njohjen, ashtu si edhe Izraeli.

Mbretëria e Bashkuar, Australia dhe Kanadaja njohën dje shtetin palestinez në një ndryshim historik diplomatik vetëm disa ditë përpara javës së nivelit të lartë të Asamblesë së Përgjithshme të OKB-së. Ky veprim vjen në një përpjekje për të ushtruar presion mbi qeverinë izraelite mes krizës humanitare që po zhvillohet në Gaza.

Më shumë se 140 vende kanë ndërmarrë tashmë hapin për të njohur një shtet palestinez, por vendimet e Francës dhe Britanisë janë të rëndësishme pasi të dyja janë anëtare të Grupit të Shtatë dhe Këshillit të Sigurimit të OKB-së.
Lufta në Gazë nisi më 7 tetor 2023, pas sulmit të udhëhequr nga Hamasi në jug të Izraelit. Bombardimet izraelite gjatë 23 muajve të fundit ndërkohë i kanë vrarë mbi 65.000 palestinezë në Gazë, e kanë shkatërruar pjesë të mëdha të vendit, e kanë zhvendosur rreth 90 përqind të popullsisë dhe kanë shkaktuar krizë humanitare katastrofike. Ekspertët thonë se Qyteti i Gazës – qyteti më i madh në vend – po përjeton zi buke.