Kryetari i Kuvendit Afrim Gashi ka njoftuar se ka marr pjesë në pritjen e organizuar me rastin e 4 Korrikut – Ditës së Pavarësisë së SHBA-së.

“Me ftesë të Ambasadores Angela Aggeler, kisha kënaqësinë të marr pjesë në pritjen e organizuar me rastin e 4 Korrikut – Ditës së Pavarësisë së SHBA-së.

Në emrin tim dhe të Kuvendit të RMV, përcjella urimet për shtetin dhe popullin amerikan, duke theksuar se miqësia dhe aleanca me SHBA-në janë jetike për të tashmen dhe të ardhmen tonë. Partneriteti ynë i palëkundur bazohet në vlerat e përbashkëta demokratike”, ka shkruar kryeparlamentari Gashi.

Në Shkup u zhvillua takimi i liderëve të Ballkanit Perëndimor dhe Bashkimit Europian, organizuar nga Qeveria e Maqedonisë së Veriut dhe BE-ja, i cili kishte në fokus Planin e Rritjes për rajonin.

Në këtë ngjarje, kryeministri i Kosovës, Albin Kurti, u prit në mënyrë zyrtare në kufi nga zëvendëskryeministri i parë i RMV-së, Izet Mexhiti dhe nga zëvendëskryeministri Arben Fetai, të dy përfaqësues të koalicionit VLEN.

Megjithatë, vëmendjen e të pranishmëve dhe opinionit publik e tërhoqi mungesa e dy liderëve të rëndësishëm të këtij koalicioni – Bilall Kasamit dhe Zeqirija Ibrahimit. Të dy liderët nuk u panë as në pritjen zyrtare e as në aktivitetet e tjera të zhvilluara me rastin e vizitës së Kurtit.

Kjo mungesë ka ngritur dyshime dhe pyetje nëse Bilall Kasami dhe Zeqirija Ibrahimi po largohen nga koalicioni VLEN?!

Ambasadori i Shqipërisë në Maqedoninë e Veriut, Denion Meidani, ka bërë të ditur se Shqipëria ka hapur tre kapituj negociues me Bashkimin Evropian vetëm në gjashtë muajt e fundit dhe synon t’i hapë të gjithë brenda vitit.

Përmes një njoftimi në rrjetet sociale, Meidani theksoi se kishte kënaqësinë të shoqëronte Kryeministrin Edi Rama gjatë pjesëmarrjes në Samitin BE–Ballkani Perëndimor në Shkup, ku Shqipëria u vlerësua për ritmin e saj të integrimit dhe angazhimin e qëndrueshëm drejt anëtarësimit.

Në kuadër të vizitës, Rama i shoqëruar edhe nga ambasadori Meidani, zhvilluan edhe takime me liderin e Aleancës për Shqiptarët, Arben Taravari ku u diskutuan sfidat dhe përgjegjësitë e përbashkëta të faktorit politik shqiptar në proceset integruese dhe zhvillimet rajonale.

Vizita e delegacionit shqiptar në Shkup përfundoi me një ndalesë simbolike në Çarshinë e Vjetër të qytetit – një hapësirë që, siç u shpreh Meidani, “ruan gjurmët e identitetit shqiptar dhe dëshmon bashkëjetesën kulturore ndër shekuj”.