Bujar Osmani reagoi ashpër ndaj valës së re të akuzave të rreme se BDI gjoja ka ndonjë koalicion me Levicën, duke i vlerësuar këto konstrukte si përpjekje të dëshpëruara të VLEN-it për ta zbutur goditjen nga humbja zgjedhore që po afron.

“VLEN po fillojnë ta përgatisin mbrojtjen për një humbje të mundshme. Kjo është aftësia e tyre dhe ky është qëllimi i tyre,” deklaroi kandidati për kryetar të Çairit, Bujar Osmani. “Përkundër këtyre shpifjeve, ata duan të kenë kapacitet që pas nëntorit t’u shpjegojnë njerëzve të tyre, opinionit, pse rezultati është ashtu siç është. Nuk do të ketë tjetër,” tha Osmani.

BDI dhe partnerët e saj paraqiten të bashkuar përmes Aleancës Kombëtare për Integrim, bashkimi më i madh politik shqiptar në 20 vitet e fundit. Ky koalicion, sipas Osmanit, e përfaqëson vullnetin e shumicës dërrmuese të shqiptarëve në vend:

“Ne kemi një aleancë, Aleancën Kombëtare për Integrim, bashkimi më i madh në 20 vitet e fundit. Partitë më të mëdha politike, të cilat vetëm në zgjedhjet e fundit së bashku morën rreth 80-90% të trupit elektoral shqiptar. Dhe kjo nuk ndodhi rastësisht, kjo është bërë sepse njerëzit kuptuan se zgjedhjet e ardhshme të 19 tetorit janë referendum,” tha Osmani.

Në fokus të këtyre zgjedhjeve, sipas Osmanit, nuk është vetëm zgjedhja e individëve por përplasja mes dy koncepteve – dinjiteti i shqiptarëve kundrejt nënshtrimit të tyre.

“19 tetori është 13 gushti i dytë, ku njerëzit do të vendosin mes dy koncepteve, jo vetëm mes individëve: a do të vazhdojmë të jemi zotër në shtëpinë tonë apo do të jemi shërbëtorë, të cilëve u diktohen politikat nga të tjerët,” tha ai.

Ai tha se votuesit e VMRO-DPMNE-së nuk do të mbështesin kandidatët e VLEN-it, duke thënë se kjo e ofendon pjekurinë politike të qytetarëve, veçanërisht të votuesve maqedonas.

“Më vjen keq që flitet në çdo tryezë nga oponentët politikë: ‘mos u shqetësoni, ne nga VMRO do të jemi përkrahja’. Së pari, kjo nuk është politikë që i bën ata dinjitozë. Unë çdo ditë jam në komunikim me qytetarët maqedonas, sepse shkoj derë më derë. Dhe ata kërkojnë zgjidhje pikërisht për këto tema për të cilat fola sot – papastërtinë, ndërtimet pa leje dhe korrupsionin. Ata thonë se dora e tyre kurrë nuk do të votojë për njerëzit që e shkatërruan komunën,” tha Osmani.

Në fund, Osmani paralajmëroi se BDI do të mbetet në rrugën e një fushate pozitive dhe programore:

“Ne do të vazhdojmë sërish të ofrojmë zgjidhje, do të vazhdojmë fushatën ta udhëheqim si garë idesh, jo si akuza dhe shpifje të pavërteta. Qytetarët do të vendosin dhe do të vlerësojnë kush si ka punuar dhe kujt i besojnë më shumë.”

VLEN nuk është parti e pavarur politike, është instrument në shërbim të VMRO-së. Kështu ka akuzuar dje Rina Ajdari, deputete e BDI-së, ndërsa ka thënë se arsyeja pse VMRO nuk nxjerr kandidatë në komunat me shumicë shqiptare është e qartë – sepse kandidatët e saj tashmë garojnë nën logon e VLEN-it.

“Ata nuk kanë asnjë legjitimitet shqiptar, janë vetëm emisarë të një politike antishqiptare, e cila ka ndërruar kostumin, por jo qëllimin: të kthejë shqiptarët në periudhën para vitit 2001. Nuk është rastësi që kjo qeveri, në vetëm pak më shumë se një vit e solli në zero punësimin e shqiptarëve në administratën shtetërore, inicoi shfuqizimin e plotë të Ligjit për përdorimin e gjuhës shqipe, hapi idenë e heqjes së votimit me Badinter, si dhe solli ‘botën serbe’ me uniforma ushtarake në mes të Shkupit”, tha deputetja Ajdari.

VMRO-ja, sipas saj, për çdo politikë të saj në dëm të multietnicitetit, sot përdor VLEN-in si fasadë. “Nuk ka më asnjë dyshim: në çdo komunë ku del kandidat i VLEN-it, është VMRO-ja që fshihet pas tij. E njëjta gjë vlen edhe për Levicën – një parti që shpesh ka treguar qëndrime më radikale se vetë VMRO. Ky bashkëpunim nuk është vetëm taktikë zgjedhore, por strategji e përbashkët për të kontrolluar shqiptarët dhe për të penguar avancimin tonë politik e kombëtar. Sot po shohim përpjekje për të relativizuar edhe historinë e lavdishme të vitit 2001 – periudhën e kthesës historike për popullin shqiptar në këtë vend”.

Këto politika, ka vijuar më tej ajo, i ngjajnë politikave të fundviteve 80’, ku sistemi i atëhershëm promovonte të drejta për të gjithë përmes përfaqësuesve “të ndershëm” pa legjitimitet, e në veçanti për shqiptarët.

“Epilogun të gjithë e dimë se çfarë ndodhi. Prandaj pyetja është e qartë: A mendoni se do ti manipuloni shqiptarët që të votojnë ata që përfaqësojnë VMRO-në dhe ‘botën serbe’? Ne jemi të qartë: shqiptarët nuk i nënshtrohen padronëve të VMRO-së. Shqiptarët kanë votën e tyre, kanë dinjitetin e tyre dhe e kanë dëshmuar se nuk shiten. Kjo qeveri monoetnike, bashkë me fasadën e tyre elektorale të quajtur VLEN, në thelb ndan një qëllim: të bllokojë avancimin e shqiptarëve, të relativizojë sakrificat tona dhe të bëjë kthim pas në të drejtat tona. Ndaj është e domosdoshme që shqiptarët të jenë të bashkuar, të qartë dhe të vendosur”, tha Ajdari, sipas të cilës, vota shqiptare është e lirë, sovrane dhe vendimtare.

“As VMRO, as Levica, as ‘bota serbe’ nuk vendosin kush i përfaqëson shqiptarët. Vetëm qytetari shqiptar me votën e tij të lirë! Dhe këtë shqiptarët do ta dëshmojnë fuqishëm më 19 tetor”, përfundoi deputetja Ajdari.

Aleanca për Shqiptarët shpreh shqetësimin e thellë për ndërhyrjet e vazhdueshme të të ashtuquajturës “Bota Serbe” në Maqedoninë e Veriut. Ky koncept politik, i ndërtuar mbi modelin e “Botës Ruse”, nuk është vetëm një lojë simbolike, por një projekt i mirëfilltë që synon të minojë kufijtë ekzistues, të dobësojë shtetësinë dhe të pengojë të ardhmen europiane të vendit tonë dhe të gjithë rajonit.

Në vend që të mësojë nga paralajmërimet e qarta të Raportit të Parlamentit Europian, Shkupi zyrtar ka lejuar që kjo agjendë të marrë hov. Nënshkrimi i memorandumit mes Fondit Pensional të Maqedonisë së Veriut dhe atij të Republikës Srpska, i cili përfaqëson një entitet që sfidon hapur sovranitetin e Bosnjës e Hercegovinës, është një shembull i qartë se si institucionet tona po futen në rrjete që rrezikojnë stabilitetin rajonal. Po ashtu, kontratat strategjike të MEPSO-s me kompani serbe për projekte kyçe të rrjetit energjetik ngrejnë dyshime serioze mbi varësinë energjetike dhe komprometimin e sigurisë sonë kombëtare.

Kjo strategji shtrihet edhe më tej: përmes rrjetit hotelier, sistemit bankar, telekomunikimeve dhe televizioneve serbe, ndërhyrja bëhet e gjithanshme dhe e qëndrueshme, duke krijuar varësi strukturore që shkojnë përtej marrëdhënieve normale ekonomike. Ndërkohë, përfshirja e zyrtarëve serbë në aktivitete politike dhe kulturore në vend, si rasti i fundit me pjesëmarrjen e Millorad Dodikut në Shkup me ftesë të zëvendëskryeministrit Ivan Stoilkoviq, tregon qartë se ky projekt nuk është më i fshehur: është i hapur, i drejtpërdrejtë dhe antievropian.

Alarmante është edhe paraqitja e grupeve paramilitare me bereta të kuqe në qytete të Maqedonisë së Veriut, që përbëjnë sinjal të rrezikshëm për rendin dhe sigurinë e qytetarëve. Serbia po shfaqet qartë si shtet-proksi i Rusisë në rajon, duke përdorur instrumente të buta dhe të forta për të ndikuar mbi vendimmarrjen tonë strategjike.

E gjithë kjo ndodh nën një qeveri që jo vetëm nuk e mbron vendin nga ky ndikim, por shpeshherë e legjitimon dhe e përforcon atë. VMRO-DPMNE, me partnerët e saj të koalicionit VLEN dhe ZNAM, në vend që të mbrojnë interesin kombëtar, paraqiten si protagonistë të këtyre zhvillimeve, duke i hapur derën një agjende të rrezikshme për stabilitetin dhe perspektivën euroatlantike të Maqedonisë së Veriut.

Aleanca për Shqiptarët thekson se orientimi europian dhe euroatlantik i vendit është i panegociueshëm. Sovraniteti nuk ka çmim dhe nuk mund të shitet në tavolinë për interesa të ngushta politike apo për marrëdhënie të dyshimta me qendra të jashtme. Maqedonia e Veriut duhet të qëndrojë larg agjendave të “Botës Serbe” dhe “Botës Ruse”, sepse vetëm kështu mund të sigurohet stabiliteti dhe e ardhmja e gjeneratave të ardhshme.

Aleanca për Shqiptarët