Shoqata “Inxhinierët e Maqedonisë” ka reaguar përmes një kumtese pas ankesës së paraqitur nga shoqata më 29 maj në Komisionin Rregullator të Energjisë (KRRE), kur hyri në fuqi Ligji i ri për Energjinë. Nga aty thonë se përgjigjja e KRRE-së është një shembull tipik i nënshtrimit institucional ndaj operatorit të energjisë EVN dhe provë e qartë e dështimit të sistemit rregullator për të mbrojtur interesin publik, transmeton Portalb.mk.

Sipas Shoqatës, thelbi i ankesës është të theksojë se matja e energjisë së konsumuar është një proces teknik që kryhet nga pajisja matëse, dhe leximi është një veprim i operatorit për të mbledhur ato të dhëna.

“Në peticionin tonë, ne kërkuam shfuqizimin e menjëhershëm të Nenit 31 të Rregullave të Furnizimit me Energji Elektrike, sepse është në kundërshtim të drejtpërdrejtë me Nenin 185 të Ligjit të ri të Energjisë. Përveç kësaj, ne kërkuam mbikëqyrje urgjente të jashtëzakonshme mbi EVN. Ne kërkuam që KRRE të lëshojë një thirrje publike për qytetarët që të raportojnë faturat e lëshuara në mënyrë të paligjshme. Ne kërkuam që EVN të mbahet përgjegjëse për shkeljen e vazhdueshme të detyrimeve ligjore dhe kontraktuale,” shkruan në kumtesë.

Pa një lexim, shkruan tutje në kumtesë, nuk ka bazë ligjore për një faturë të vërtetë. Ata thonë se çdo gjë që faturohet pa të dhëna reale nga pajisja matëse, përveç nëse pajisja është teknikisht e prishur, është në kundërshtim me Ligjin e Energjisë, Ligjin për Mbrojtjen e Konsumatorit, Ligjin për Detyrimet dhe vetë Kushtetutën.

“KRRE-ja po shkel me vetëdije parimin kushtetues sipas të cilit çdo rregullore duhet të jetë në përputhje me ligjin. Një akt nënligjor që është në kundërshtim me ligjin automatikisht humbet fuqinë e tij ligjore. Ajo që është edhe më e frikshme është se Komisioni, në përpjekjen e tij për të justifikuar sistemin, i referohet detyrimeve të MEPSO-s (operatorit të sistemit të transmetimit) edhe pse objekti i ankesës ka të bëjë me matjen dhe faturimin e familjeve, që është kompetencë ekskluzive e “EVN Elektrodistribucija” dhe “EVN Home”, furnizuesit universal. Kjo ose tregon një paaftësi për të kuptuar strukturën ligjore dhe teknike të sistemit të energjisë, ose një mjegullim të qëllimshëm të përgjegjësisë, dhe, rastësisht, një anëtar i KRRE-së është ekspert në çështjet ligjore në fushën e energjisë”, thonë nga shoqata.

Prandaj, ata besojnë se rregullatori pranon hapur se iu drejtua Ministrisë së Energjisë për një “mendim”, sikur të ishte një lloj ekzekutori pasiv pa juridiksion të pavarur.

“Ju kujtojmë se Komisioni Rregullator, sipas nenit 46 të Ligjit, është një organ i pavarur që ka detyrim të plotë për të vepruar në përputhje me ligjin. Interpretimi i ligjeve mund të jepet vetëm nga Parlamenti. Deri atëherë, ligji zbatohet ashtu siç është. Kërkimi i një mendimi nuk është bazë për zbatimin e vazhdueshëm të një praktike të paligjshme. Me një sjellje të tillë, ERK shkel funksionin e saj themelor. Në vend që të mbikëqyrë tregun, siç udhëzohet të bëjë nga neni 55 i Ligjit, ajo toleron në mënyrë aktive shkeljen e të drejtave të konsumatorit, mbron kompaninë që ka një pozicion dominues në treg dhe lejon që vullneti i saj të jetë mbi ligjin”.

Ata kërkojnë që zbatimi i Nenit 31 të pezullohet menjëherë, të fillojë mbikëqyrja e jashtëzakonshme mbi EVN dhe të ndërpritet praktika e faturimit bazuar në konsum fiktiv dhe të paverifikueshëm.

Nga shoqata u zotuan se do të ndërmarrin masa të tjera civile për të zbatuar ligjin.

Kujtojmë se, shoqata paraprakisht ka paralajmëruar se askush në shtet nuk kontrollon konfigurimet softuerike të orëmatësve të energjisë elektrike të instaluar nga EVN, që sipas tyre, mundëson potencialisht vendosjen e shumëzuesve të gabuar apo tarifave më të larta pa dijeninë e qytetarëve.

“Inxhinierët e Maqedonisë” insistojnë në mbikëqyrje të pavarur dhe transparencë urgjente në sektorin e matjes së energjisë.

Shqiptarët në Republikën e Maqedonisë së Veriut, ngjashëm si numerikisht, nuk qëndrojnë mirë në përfaqësim të drejt dhe adekuat as kur bëhet fjalë për pozicione udhëheqëse administrative. Portalb.mk ka analizuar disa institucione shtetërore, për atë se sa shqiptarë ka në pozita udhëheqëse.

Në Ministrinë e Drejtësisë dhe Ministrinë e Sportit asnjë udhëheqës sektori nuk është shqiptar.

Në Ministrinë e Financave nga 15 këshilltarë shtetërorë vetëm një është shqiptar.

Në Ministrinë e Kulturës nga 22 pozicione udhëheqëse vetëm 4 janë shqiptarë.

Gjendja nuk është më e mirë as në Agjencinë e Komunikimeve Elektroteknike, nga 11-të këshilltarë të drejtorit vetëm 2 janë shqiptarë. Po në këtë institucion, nga 10 udhëheqës sektori vetëm 1 është shqiptar.

Kujtojmë se, Portalb.mk në një analizë së fundmi prezantoi numrat e përfaqësimit etnik në disa institucione që janë në disproporcion me numrin e shqiptarëve në Maqedoninë e Veriut sipas regjistrimit të popullsisë. Nga të dhënat e siguruara rezultoi se në Presidencë, Ministrinë për Transformim Digjital, Ministrinë e Sportit, Bankën Popullore, MEPSO dhe Agjencinë e Administratës, shqiptarët janë të nënpërfaqësuar.

Opozita shqiptare në Maqedoninë e Veriut vazhdimisht ka akuzuar qeverinë aktuale se po punëson pa asnjë barëspeshë sa i përket përfaqësimit të drejtë dhe adekuat.

Ndërkaq protagonistët e koalicionit VLEN tash e një kohë të gjatë vazhdimisht dalin me deklarata se është në përfundim procesi i zgjidhjes ligjore për përfaqësimin e drejtë dhe adekuat, që nga shfuqizimi i mekanizmit juridik “Balancuesi”. Por një zgjidhje e tillë ligjore po zvarritet me muaj të tërë.

Ndryshe, Gjykata Kushtetuese e RMV-së më 9 tetor 2024 me shumicë votash vendosi për shfuqizimin e instrumentit “Balancues”, i cili ka rregulluar përfaqësimin e drejtë të komuniteteve në administratën shtetërore. Pas këtij vendimi, për punësimet në administratën publike nuk po mbahet llogari për përkatësinë etnike.

Lënda për shfuqizimin e tij u hap pas një iniciative të dorëzuar nga përbërja e vjetër e Komisionit Shtetëror për Parandalimin e Korrupsionit (KSHPK) më 11 janar 2024, sepse, sipas tyre, me të bëhen abuzime gjatë punësimit./Portalb.mk/

Qendra për Menaxhim me Kriza ka dalë me njoftim për gjendjen e krijuar në Shkup pas reshjeve të rrëmbyeshme të shiut, ku siç bëhet e ditur, pjesa më e dëmtuar është Haraçina dhe Gazi Baba apo vendbanimet Haraçina dhe Stajkovci.

Ka pasur vërshime në disa objekte, ndërkaq dëme janë evidentuar edhe në infrastrukturën rrugore dhe në tokën bujqësore.

“Sipas informacioneve dhe fotografive që i marrim nga terreni nga Sektori për operacione dhe koordinim në QMK, reshjet e rrëmbyeshme e kanë kapuar territorin e qytetit të Shkupit, veçanërisht komunat si Haraçinë dhe Gazi Babë, më saktë vendbanimet Hasanbeg dhe Stajkovc. Bëhet fjalë për reshje të shkurtra, por intensive të cilat kanë shkaktuar dëme të konsiderueshme ndaj pronës, objekteve, infrastrukturës dhe tokës bujqësore. Veçanërisht një pjesë e komunës së Haraçinës, ku janë evidentuar vërshime të objekteve dhe tejmbushje të rrugëve me ujë, ku është vërejtur sasi e grumbulluar e dheut dhe mbetjeve të tjera në drejtimin rrugor Haraçinë – Shkup. Sipas informacioneve të deritanishme nuk ka dëme në njerëz”, qëndron në njoftimin e QMK-së.

Bëhet e ditur se drejtori i Qendrës për Menaxhim me Kriza, Muhamet Ali dhe udhëheqësi i Sektorit për operacione dhe koordinim, Goran Stojanovski kanë qenë në koordinim dhe komunikim të vazhdueshëm me shërbimet kompetente dhe institucionet, me qëllim që me kohë të ndjekin dhe reagojnë për situatën./TV21