Lideri i Aleancës për Shqiptarët Arben Taravari thotë se 8 Maji do të hyjë në histori si Dita e Ndryshimit.

“Me siguri 8 Maji do të hyjë në histori si Dita e Ndryshimit…disa mund ta quajnë edhe Fillimi i Drejtësisë!”, ka shkruar Taravari.

Izet Mexhiti nga koalicioni VLEN sot në një konferencë për shtyp pyeti kryetarin e BDI-së, Ali Ahmeti se a u ka dhënë urdhër organizatave komunale që të bojkotojnë zgjedhjet presidenciale që do të mbahen më 8 maj.

Mexhiti tha se BDI tani po mundohet të shkaktojë krizë politike në vend për të shpëtuar të korruptuarit në radhët e veta, duke u munduar që qeveria teknike të zgjasë më shumë se 100 ditë.

“Sot pyesim publikisht se a është e vërtetë se ju keni dhënë urdhër organizatave komunale që të organizojnë bojkot të rrethit të dytë të zgjedhjeve presidenciale edhe pse jeni takuar me Stevo Pendarovskin dhe i keni premtuar mbështetje. Nëse kjo është e vërtetë pse nuk i bojkotuat zgjedhjet presidenciale të vitit 2019-të. Çfarë keni ndryshuar nga atëherë.

A po mundohuni që të pengoni formimin e një shumice të re parlamentare të sigurojë ndryshimet kushtetuese në afat prej gjashtë muajsh pas formimit të qeverisë së re”, tha Mexhiti.

Ai shtoi se tani kur BDI duhet të merr përgjegjësi për skandalet korruptive, po përpiqet që të keqpërdor vullnetin e popullit shqiptar.

Mexhiti tha se pas 8 majit do të ketë qeveri të re me VLEN-in në qeveri, do të ketë shumicë të badenterit dhe do të sigurohen fundamentet e Marrëveshjes Kornizë të Ohrit.

“Nuk mendoj për ndonjë koalicion me BDI-në pas zgjedhjeve, partneri ynë ideal është i kushtëzuar nga opozita shqiptare në Maqedoni”, tha mbrëmë në një intervistë në televizionin Alsat, Hristijan Mickoski, kryetar i VMRO-DPMNE-së.

Sipas tij, populli është qartazi kundër politikave të kësaj qeverie, ku janë LSDM dhe BDI. “Këto zgjedhje treguan se ne kemi një ndjenjë antiqeveritare dhe kjo duhet respektuar dhe zëri i popullit duhet respektuar”, tha Mickoski.

Mickoski theksoi se BDI nuk mund të pretendojë se ky është shtet binacional dhe shtoi se ky është shteti i të gjithëve. Ai tha se posedon informata mbi sjelljen e BDI-së në terren gjegjësisht shantazhet, ryshfet dhe keqpërdorimet e tjera që bën me votat partia e Ahmetit.

“Përveç kësaj, ajo që bën BDI në terren nuk është vullnet i popullit, ka presione, ryshfet. Populli nuk e dëshiron këtë. Për këtë ka dëshmi. Duhet të përmend edhe rastin me komunën e Likovës në një vendvotim për të cilin ka edhe aktgjykim nga Gjykata Administrative për parregullsi, për çka ka dyshime edhe në vende të tjera, se ndodh edhe në Gostivar, në Tetovës. Me BDI-në lidhen parregullsi të shumta”, thekosi mes tjerash Mickoski.