Zëvendësdrejtori i Drejtorisë së Doganave, Garip Kaba për TV21 foli edhe për importin e veturave të përdorura në Maqedoninë e Veriut,. Kaba thotë se pavarësisht zërave të ndryshëm, deri tani nuk ka nismë për ndryshimin e çmimeve për tarifat e importit.

“Nuk ka diçka të tillë. Nuk ka iniciativë që do të jepte mundësi, do të jepte para opinionit informacion se do të ketë ndryshime të tarifave doganore për makinat e përdorura. Njëherë për njëherë, nuk ka diçka të tillë. Ne jemi institucion që funksionojmë në kuadër të Ministrisë së Financave, edhe iniciativat e ndryshme sigurisht që burojnë për këtë sistem, burojnë nga Ministria, por edhe nga Qeveria. Ne jemi aty për të dhënë propozime, dhe mundësisht ato do të kualifikohen, do të analizohen dhe në kuadër të Qeverisë, ndoshta, ndoshta, nuk po them tani, por në të ardhmen”, tha mes tjerash Kaba.

Kaba: shqiptarët në Drejtorinë e Doganave janë të përfaqësuar me 24,4%
Kaba tha se, shqiptarët në këtë drejtori janë të përfaqësuar me 24,4 për qind ose me 1186 të punësuar, sa është numri i përgjithshëm i shqiptarëve në këtë drejtori. Kaba tha se, kjo përqindje është rritur në dy vitet e fundit.
“Po nga numri i përgjithshëm, 1186 të punësuar. Në Drejtorinë e Doganave, shqiptarët janë të përfaqësuar me 24,4 për qind. Kjo përqindje është rritur sidomos në dy vitet e fundit”, shtoi më tej Kaba.

Zëvendësministri i Bujqësisë, Flakron Bexheti nga radhët e Aleancës për Shqiptarët ka njoftuar se Ditët Informuese për IPARD III po hyjnë në fazën përmbyllëse, duke ofruar mundësi të rëndësishme për përfituesit e mundshëm të këtij programi.

Gjatë këtyre takimeve, shumë fermerë dhe sipërmarrës bujqësorë janë informuar mbi procedurat dhe mundësitë e financimit përmes IPARD III, me qëllim zhvillimin e bizneseve të tyre.

Më 13 mars (e enjte) do të mbahen edhe dy takime të rëndësishme:

Kumanovë – ora 11:00, në Shtëpinë e Zejtarëve
Likovë – ora 14:00, në ndërtesën komunale

“Ftojmë të gjithë përfituesit e interesuar nga Kumanova dhe Likova të marrin pjesë në këto takime, të informohen dhe të shfrytëzojnë mundësitë që ofron IPARD III për zhvillimin e sektorit bujqësor,” theksoi Bexheti.

Ky program mbështet fermerët dhe sipërmarrësit ruralë në rritjen dhe modernizimin e aktiviteteve të tyre, duke krijuar një perspektivë më të qëndrueshme për zhvillimin e bujqësisë në vend.

Zëvendësministrja e Mbrojtjes, Elfete Ismaili, gjatë ditës së sotme ka vizituar kazermën e Kërçovës “Çede Filipovski – Dame”, ku është njoftuar nga afër me kapacitetet dhe strukturat e këtij objekti strategjik për zhvillimin dhe trajnimin e forcave të armatosura.

Ismaili gjatë vizitës në Kazerm, gjithashtu ka shpallur konkursin për pranimin e 300 ushtarëve profesional.

“Gjatë kësaj vizite shpallëm gjithashtu hapjen e konkursit për pranimin e 300 ushtarëve profesional, një hap thelbësor në forcimin e kapaciteteve të mbrojtjes dhe rritjen e profesionalizmit të Armatës së Republikës së Maqedonisë së Veriut. Ky konkurs ofron mundësi për të rinjtë tanë që të bashkohen në radhët e Armatës dhe të kontribuojnë në misionet për ruajtjen e paqes dhe sigurisë”, ka shkruar Ismaili.

Gjithashtu, zëvendësministrja Ismaili ka njoftuar se është shpallur edhe konkurs publik për pranimin e 10 nënoficerëve në Armatë, si dhe shpallje për pranimin e 60 personave me arsim të lartë në gradën oficer në Armatën e Republikës së Maqedonisë së Veriut.

“Kjo nismë është një dëshmi e angazhimit të Qeverisë për të siguruar një Armatë të fortë, moderne dhe të gatshme për të përballuar çdo sfidë, duke mbështetur gjithashtu zhvillimin e një të ardhmeje më të sigurt dhe më stabile për vendin tonë”, ka shkruar në fund Ismaili.