Evropa mund t’u bashkohet bisedimeve për Ukrainën

Përpjekjet diplomatike treditore mes Moskës, Kievit dhe Uashingtonit sollën përparim të kufizuar drejt përfundimit të luftës së Rusisë kundër Ukrainës.

Sipas të dërguarve amerikanë, palët ranë dakord që vendet evropiane të përfshihen në bisedimet e ardhshme. Megjithatë, kërkesat territoriale të Vlladimir Putinit dhe sulmet e vazhdueshme ndaj Ukrainës tregojnë se një marrëveshje mbetet ende larg. Të dërguarit e presidentit amerikan Donald Tramp, njoftuan se Putini kishte pranuar që përfaqësuesit evropianë të merrnin pjesë në rundin e ardhshëm të bisedimeve të paqes. Pjesëmarrja e aleatëve evropianë në diskutimet për sigurinë e kontinentit mund ta forcojë pozitën e Ukrainës në bisedime. Putini vazhdon të kërkojë që Rusia të marrë kontrollin e plotë të katër rajoneve ukrainase që Moska pretendon se i ka aneksuar. Ai ka kundërshtuar edhe vendosjen e forcave të huaja paqeruajtëse në Ukrainë. Kushner u përpoq ta siguronte Kievin se asnjë marrëveshje më e gjerë për sigurinë evropiane nuk do të përmbyllej pa u trajtuar shqetësimet e Ukrainës për sigurinë e saj.

“Ne nuk mund ta përmbyllim këtë marrëveshje pa praninë e evropianëve në tryezën e negociatave. Këtë ia kemi bërë të qartë Vlladimir Putinit, se besojmë që kjo është shumë e rëndësishme. Presidenti ukrainas Volodimir Zelenski ka qenë një mbështetës shumë i fortë i këtij qëndrimi dhe e ka theksuar këtë që nga fillimi. Mendoj se kemi arritur ta sigurojmë këtë me Putinin dhe ai është i gatshëm të provojë. Shpresojmë se në bisedimet e drejtpërdrejta, kur njerëzit ulen së bashku, mund të diskutojnë çështjet me më shumë qetësi dhe t’i shqyrtojnë ato një nga një.  Ajo që mund të them, të paktën nga ajo që po dëgjojmë, është se njerëzit duan ta shohin këtë luftë të përfundojë”, deklaroi Xhared Kushner, i dërguar i posaçëm i SHBA-së./Alsat.mk.