Në Gostivar kanë nisur punimet për rikonstruksionin e dy rrugëve të rëndësishme pranë shkollës së mesme “Gjimnazi”, konkretisht rrugët “Servet Bajrami” dhe “Nikolla Teslla”. Projektet janë pjesë e pakos së parë të thirrjes qeveritare, me një vlerë totale prej 2.7 milionë euro, ndërsa për këto dy rrugë është ndarë një buxhet prej 30 milionë denarësh.

Punimet në terren u ndoqën nga afër nga kryetari i Komunës së Gostivarit, Valbon Limani, dhe Ministri i Shëndetësisë, Arben Taravari, si përfaqësues i ekzekutivit. Kryetari Limani theksoi se këto rrugë kanë qenë në gjendje të rëndë për një kohë të gjatë dhe se rikonstruksioni i tyre do të përmirësojë dukshëm qasjen dhe sigurinë për qytetarët, sidomos për nxënësit e gjimnazit.

“Rruga ‘Servet Bajrami’ dhe ‘Nikolla Teslla’ kanë qenë mjaft të dëmtuara dhe tërësisht të neglizhuara. Me këtë ndërhyrje të plotë do të ndryshojë jo vetëm pamja, por edhe funksionaliteti i kësaj pjese të qytetit. Presim që punimet të përfundojnë në afat sa më të shpejtë,” tha kryetari Limani.

Ai shtoi se edhe projektet tjera të aprovuara nga thirrja e parë qeveritare do të fillojnë të realizohen deri në fund të muajit prill, ndërsa paralajmëroi edhe nisjen e dy projekteve madhore infrastrukturore nga java e ardhshme: rikonstruktimi i bulevardit kryesor të qytetit “Vëllezërit Gjinoski” dhe rrugës “Beliçica”.

“Përveç punimeve që kanë filluar, jemi në përgatitje për të nisur edhe dy projekte të mëdha rrugore që do ta ndryshojnë fytyrën e Gostivarit,” theksoi ai.

Komuna e Gostivarit ka aplikuar edhe me 40 projekte të tjera në kuadër të thirrjes së dytë qeveritare, e cila është e hapur deri në fund të muajit. Rezultatet e kësaj thirrjeje pritet të shpallen në mesin e muajit maj, ndërsa autoritetet lokale janë optimiste se shumica e projekteve të propozuara do të marrin dritë jeshile.

Kryetari i Gostivarit, Valbon Limani, së bashku me ministrin e Shëndetësisë, Arben Taravari, si përfaqësues i kabinetit qeveritar, dhe përfaqësuesit e institucioneve lokale, kanë vizituar dy rrugë të cilat kanë nisur të rikonstruohen si pjesë e 13 projekteve të para të planifikuara për përmirësimin e infrastrukturës në qytet.

Këto dy rrugë janë rruga ‘Servet Bajrami’, e cila çon për në Banjicë të Poshtme, dhe rruga ‘Nikolla Tesla’, nga gjimnazi deri në fund të rrugës. Sipas kryetarit Limani, këto projekte kapin një vlerë prej rreth 30 milionë denarë dhe synojnë rikonstruimin e plotë të këtyre dy rrugëve, duke siguruar kushte më të mira infrastrukturore për qytetarët e Gostivarit.

“Me këto projekte, ne po investojmë në përmirësimin e kushteve të jetesës për qytetarët tanë, duke ofruar infrastrukturë më të zhvilluar dhe më të sigurt për ata. Rikonstruimi i këtyre rrugëve është një hap tjetër përpara në realizimin e qëllimeve tona për një qytet më të zhvilluar dhe më të aksesueshëm”, tha kryetari Limani gjatë inspektimit të punimeve.

Ministri i Shëndetësisë, Arben Taravari, ka realizuar një vizitë në Spitalin e Përgjithshëm të Gostivarit, ku ka promovuar disa reparte të rinovuara dhe ka inspektuar investimet në përmirësimin e kushteve për pacientët dhe stafin mjekësor.

Taravari ka theksuar rëndësinë e rinovimit të sallave kirurgjikale dhe pajisjeve moderne. Ai ka vlerësuar arritjet e drejtorit të spitalit, i cili ka arritur të krijojë një hapësirë me tre salla kirurgjikale nga dy që ishin më parë, duke mundësuar kështu që pacientët të presin më pak dhe të trajtohen më shpejt. Ministri gjithashtu ka vizituar një tavolinë kirurgjike të pajisur me të gjitha elementët e nevojshëm për realizimin e operacioneve të ndryshme.

“Spitali i Përgjithshëm i Gostivarit vazhdon të mbetet lider në promovimin e punëve që janë bërë. Me mjete vetanake dhe sponsorizime, po punohet intensivisht për të përmirësuar kushte dhe për të ofruar shërbime mjekësore cilësore për qytetarët”, tha Taravari.

Ai ka nënvizuar gjithashtu se një pjesë e repartit internistik është plotësisht e rinovuar dhe ka marrë informacione nga drejtori i spitalit për progresin në renovimin e repartit oftalmologjik. Taravari shprehu shpresën se punimet në këtë repart do të përfundojnë së shpejti, duke ofruar shërbime më të mira për pacientët.

Kjo vizitë e ministrit u realizua në kuadër të përpjekjeve për përmirësimin e shërbimeve shëndetësore dhe ofrimin e kushteve më të mira për trajtimin e pacientëve në gjithë vendin.