Ministri i Ekonomisë dhe Punës Besar Durmishi mbajti sot fjalim në Konferencës ndërkombëtare për engjëjt e biznesit dhe ekosistemin sipërmarrës në Maqedoninë e Veriut. Mundësi dhe sfida”, që u mbajt në hoteln Aleksandar Pallas.

Ministri Durmishi në fjalimin e tij në panelin me titull “Hulumtimi dhe praktikat për qasjen në investime të engjëjve të biznesit” tha se meqenëse jemi në momentin vendimtar në zhvillimin e vendit tonë, është thelbësore që të eksplorojmë çdo rrugë në dispozicion për të krijuar mundësi, për të nxitur inovacionin dhe për të siguruar përparim të qëndrueshëm ekonomik.

“Engjëjt e biznesit janë komponent vital i kësaj përpjekjeje. Engjëjt e biznesit janë individë që jo vetëm kanë arritur sukses financiar, por gjithashtu kanë akumuluar përvojë dhe njohuri të vlefshme gjatë gjithë karrierës së tyre. Tani, ata janë të gatshëm të investojnë edhe pasurinë edhe urtësinë e tyre në ndërmarrje të reja. Ata sigurojnë kapital për ndërmarrjet e vogla dhe të mesme (NVM) në fazat kryesore të zhvillimit të tyre, kur institucionet tradicionale financiare shpesh nuk duan ta bëjnë këtë. ​Megjithatë, kontributet e tyre tejkalojnë vetëm financimin. Engjëjt e biznesit ofrojnë diçka edhe më të vlefshme – atë që shpesh quhet “para të mençura”. Kur një engjëll biznesi investon, ata thjesht nuk dorëzojnë çek dhe presin kthim. Në vend të kësaj, ata ofrojnë mentorim, udhëzim dhe qasje në rrjetet e tyre të gjera. Këto janë rrjete të ndërtuara gjatë viteve, ndonjëherë edhe dekadave, të përvojës në biznes, që përfshijnë lidhje me sipërmarrës të suksesshëm, bankierë, kontabilistë, ekspertë juridik dhe ofrues sigurimesh. Engjëjt e biznesit nuk janë vetëm burime financimi; ata janë katalizatorë për inovacione dhe rritje ekonomike.

Duke vënë në tryezë ekspertizën, përvojën dhe burimet e tyre financiare, engjëjt e biznesit ndihmojnë sipërmarrësit të tejkalojnë pengesat e shumta që qëndrojnë në rrugën e suksesit”, tha ministri Durmishi.
Sipas ministrit, përkundër potencialit të tyre të madh, koncepti i engjëjve të biznesit mbetet relativisht i pazhvilluar në Maqedoninë e Veriut.

“Shumë sipërmarrës nuk janë plotësisht të vetëdijshëm për mundësitë e paraqitura nga engjëjt e biznesit, ndërsa korniza jonë ligjore ende nuk i mbështet ose nxitë në mënyrë përkatëse aktivitetet e tyre. Ky është një boshllëk që ne si Qeveri dhe Ministri jemi të përkushtuar ta zgjidhim. Hapi ynë i parë është krijimi i një mjedisi të favorshëm juridik që nxitë rritjen dhe zhvillimin e engjëjve të biznesit në Maqedoninë e Veriut. Për këtë qëllim, ne jemi në procesin e përpilimit të një ligji gjithëpërfshirës për engjëjt e biznesit në shtetin tonë. Ky ligj do të sigurojë qartësi dhe udhëzime për disa çështje kyçe. Do të përkufizojë se kush mund të bëhet engjëll biznesi, kushtet në të cilat mund të punojnë, përfitimet nga të qenët engjëll biznesi dhe procedurat e daljes nga investimi. Për më tepër, ligji do të përmend lehtësimet tatimore dhe lehtësimet për të cilat do të kenë të drejtë engjëjt e biznesit, duke siguruar që kontributet e tyre të njihen dhe sendërtohen”, tha Durmishi duke shtuar se vendosja e kësaj kornize ligjore është me rëndësi thelbësore, jo vetëm për të inkurajuar më shumë individë që të bëhen engjëj biznesi, por edhe për të siguruar transparencë dhe përgjegjësi në procesin.
“Përveç kornizës juridike, duhet të përqendrohemi edhe në ngritjen e kapaciteteve institucionale të nevojshme për të mbështetur zhvillimin e një ekosistemi të fuqishëm sipërmarrës, si dhe mbështetjen institucionale, ngritja e vetëdijes për përfitimet e engjëjve të biznesit është po aq e rëndësishme.
Për të zgjidhur këtë, ne planifikojmë të fillojmë një varg aktivitetesh promovuese që synojnë edhe engjëjt potencial të biznesit edhe sipërmarrësit.

Ministria e Ekonomisë dhe Punës do të jetë burimi i të gjitha programeve dhe masave rrjedhëse që mbështesin engjëjt e biznesit, duke bërë që këto informacione të jenë lehtësisht të arritshme përmes ueb faqes së Ministrisë dhe platformave të tjera publike.
Siç informoi Durmishi, Ministria e Ekonomisë dhe Punës tashmë ka bërë hapa konkretë në këtë drejtim duke bashkëfinancuar projekte që lidhen me rrjetet e engjëjve të biznesit. Sipas kësaj mase, Ministria bashkëfinancon 70% të shpenzimeve të dëshmuara, por jo më shumë se 350.000 MKD (rreth 5.600 euro) individualisht për secilin rrjet aplikant.