Kreu i Aleancës për Shqiptarët, Arben Taravari, ka deklaruar se gjatë iftarit të mbrëmshëm me krerët e VLEN-it te kryeministri i Kosovës, Albin Kurti, janë diskutuar çështjet aktuale politike, përfshirë strategjitë për zgjedhjet e ardhshme lokale.

Sipas Taravarit, brenda VLEN-it tashmë janë krijuar grupe punuese që po shqyrtojnë mundësinë e përpilimit të listave zgjedhore, qoftë veçmas apo të përbashkëta, si dhe çështjen e kandidaturave. “Prioritet mbi prioritet është që VLEN-i të vazhdojë së bashku, por po i analizojmë të gjitha rrethanat për të gjetur mënyrën më të mirë të mundshme që në zgjedhjet lokale të dalim me një qasje të përbashkët”, theksoi Taravari.

Megjithatë, ai tha se ende nuk është marrë një vendim përfundimtar lidhur me këtë çështje.

Lideri i Aleancës për Shqiptarët, Arben Taravari, ka shpërndarë urimet e tij për Fitër Bajramin, duke e cilësuar këtë festë si një moment të veçantë që i dedikohet Madhështisë së Vlerave të Zotit.

Në postimin e tij, Taravari ka shkruar:
“Bajrami është një festë që i dedikohet Madhështisë së Vlerave të Zotit ndaj është dhe festa më e bukur! Gëzuar Fitër Bajramin nga Aleanca për Shqiptarët! Zoti Bekoftë familjet tuaja!”

Ky urim nënvizon rëndësinë e kësaj feste për të vlerësuar mirësinë dhe bekimet e Zotit në jetën tonë.

Këshilltari komunal nga Aleanca për Shqiptarët në Komunën e Likovës, Bastri Rexhepi, ka ngritur një sërë pyetjesh për Kryetarin e Komunës, Erkan Arifi duke vënë në pikëpyetje shpenzimet dhe transparencën institucionale gjatë muajit të shenjtë të Ramazanit.

Në një reagim publik, Rexhepi ka kërkuar sqarime mbi financimin e iftareve të organizuara nga Komuna, duke theksuar nevojën për transparencë. “A mund të dimë ne, si taksapagues, se me çfarë fondesh janë financuar këto iftare të njëpasnjëshme? Transparenca është thelbësore, sepse aty ku mungon, lindin dyshime për keqpërdorim të mjeteve publike,” ka theksuar Rexhepi.

Gjithashtu, Rexhepi ka ngritur shqetësimin për shpërndarjen e informatave të pasakta nëpër xhami lidhur me regjistrimin për ujësjellësin, i cili ende nuk është funksional. Sipas tij, qytetarët janë të zhgënjyer nga premtimet e parealizuara, ndërsa tani, sipas tij, po përdoren institucionet fetare për të mashtruar mbi këtë çështje.

Një tjetër kritikë e Rexhepit ka qenë ndaj shpërndarjes së ndihmave humanitare nga Kryetari i Komunës, Erkan Arifi duke e cilësuar këtë si keqpërdorim të dinjitetit të qytetarëve për përfitime politike. “A nuk do të ishte më e ndershme që në vend të këtyre skenave të siguronte vende pune dhe një jetë dinjitoze për bashkëvendasit tanë?”, ka pyetur Rexhepi.

Në fund të reagimit, Rexhepi ka theksuar se “nuk ka gjë më të ulët sesa të përdorësh Ramazanin dhe fenë për poena politik”, duke i bërë thirrje për më shumë përgjegjësi dhe transparencë nga institucionet komunale.