Shaip Zeneli nga BDI ka dalë me të dhëna të reja për punsimet e shqiptarëve. Ai thotë se në M-Nav janë punësuar 5 maqedonas kurse asnjë shqiptar, njofton Top24.mk.

“Në M-Nav pesë maqedonas e asnjë shqiptar.

Kur punësoheshin shqiptarët në M-Nav kishte protesta gjoja për profesionalizëm e sot ku jeni? Ku mbeti profesionalizmi kur edhe familjarë të dënuar për terrorizëm punësohen?
Nuk mjaftut me këtë po në propozim keni edhe heqjen e nenit 96 nga Ligji për Policinë, nen që parasheh përfaqësim të drejtë dhe adekuat në këtë institucion. Propozim-ligji është sot në seancë plenare!!
Dhe kjo po ndodh në heshtje, me dorën e atyre që thonë “rini rehat”…
Po çfarë rahatije me juve, tradhti mbi tradhti.
Ju nuk jeni vetëm edepsëza, po edhe tradhtarë që ja kaloni edhe vet Rrahman Morinës.
Pishpirika”, shkruan Zeneli.

Në shpalljen kontestuese, për shkak të së cilës më 10 korrik kontrollorët e fluturimeve në Navigacionin e Maqedonisë (M-NAV) u kërcënuan se do të hidheshin në grevë, janë pranuar: Ivana Jug – bashkëshortja e të ndjerit Igor Jug, njërit prej të dënuarve për sulmin e organizuar në Kuvend më 27 prill të vitit 2017, Atanas Stamnov – bashkëshorti i drejtoreshës së Regjistrit Qendror të Maqedonisë, Anita Stamnova, si dhe nënkryetari i Unionit të Forcave të Reja të VMRO-DPMNE-së, Filip Gjorgjiev, zbulon SAKAMDAKAZAM.MK, përcjell Portalb.mk.

Gjorgjiev është pranuar në vendin e punës “studentit AI”, ndërsa Jug dhe Stamnov janë pranuar në vendin e punës “ndihmës për zhvillim, investime dhe prokurime”.

Tashmë disa ditë me radhë me këmbëngulje e kërkojnë Drejtorin e M-NAV, Vlladimir Risteski, për ta pyetur nëse gjatë procesit të punësimit ishte e rëndësishme që kandidatët të ishin anëtarë të partisë, si dhe për pyetje të tjera, por ai as nuk iu përgjigjet telefonatave dhe as nuk përgjigjet në mesazhet e dërguara në SMS dhe Viber.

Risteskin, me të cilin në Këshillin Drejtues të M-NAV janë edhe drejtorët Kliment Çepunjoski dhe Fatmir Zimberi, fillimisht e pyetëm se pse dje (16.07.2025) u ripublikua një pjesë e kësaj shpallje, për tre vende pune (dy me arsim të mesëm dhe një vend për “këshilltar” me arsim të lartë).

Informacioni jozyrtar është se kandidatët e tjerë nuk e kanë pasur dokumentacionin e nevojshëm, domethënë nuk i i kanë plotësuar kushtet, prandaj dje është shpallur, ripublikuar një pjesë e shpalljes nga data 9 korrik, vetëm për ato vende që pothuajse u zunë nga kandidatë të tjerë pa lidhje partiake. Njëri nga kandidatët është refuzuar sepse nuk ka pasur njohuri nga gjuha angleze.

Shpallja është përsëritur për vendin e punës “operator i transmetimit të të dhënave dhe autorizim dhe mbikëqyrje të fluturimeve”, për vendin e punës “student AI” dhe për vendin e punës “këshilltar i pavarur”.

Drejtori nuk na u përgjigj as dhe se pse në fazën e dytë kandidatët janë intervistuar vetëm nga tre drejtorët, pa dëshmitarë? Punonjësit në M-NAV thonë se ata nuk kanë lejuar që gjatë intervistimit të marrë pjesë madje as procesverbalisti.

Sipas marrëveshjes së arritur nga menaxhmenti i M-NAV, Qeveria dhe Sindikata e Kontrollorëve të Fluturimit, për ta parandaluar grevën dhe mbylljen e qiellit mbi Maqedoni, gjatë intervistave me kandidatët për punësim për cilin do vend punë në këtë ndërmarrje shtetërore, detyrimisht është dashur të marrin pjesë edhe përfaqësuesit e Sindikatës.

Greva e kontrollorëve të fluturimeve e planifikuar për më 10 korrik u parandalua sepse Qeveria garantoi se do t’i përmbushte të gjitha kërkesat e përcjella përmes Sindikatës. Duhej të merrnin fund punësimet partiake, duhej të merrej miratimi nga Ministria e Financave për një shpallje për të paktën 6 kontrollorë të fluturimeve, sepse ka mungesë të tyre, si dhe meteorologëve, inxhinierëve dhe profesionet e tjera qenësore. Duhet të ishte shpallur edhe një tender për përzgjedhjen e një agjencie ndërkombëtare, të pavarur, e cila do të kryente një analizë të gjendjes aktuale në M-NAV, si dhe pozitave qenësore që duhen plotësuar për funksionimin normal të ndërmarrjes, por Sindikata e Kontrollorëve të Fluturimeve u mashtrua.

Sa i përket temës së punësimeve me libreza partiake më 14 korrik kryeministri Hristijan Mickoski në fjalimin e tij në ngjarjen “Një vit me rezultate” në të cilin Drejtoria e Doganave raportoi për punën e saj në vitin paraprak, tha:

“Për një vit me punë të palodhur, vizion dhe një qasje ekonomike, po e ngrejmë vendin në këmbë, pjesë pas pjese, institucion pas institucioni, sistem pas sistemi. Qytetarët e njohin qasjen e re. Ata e dinë se ne nuk premtojmë mrekulli, se punojmë shumë çdo ditë për të ndërtuar një sistem që nuk varet nga librezat partiake, por nga drejtësia, llogaridhënia dhe barazia.”

Mickoski, si udhëheqës i opozitës, deklaroi: “Librezat partiake nuk duhet të jenë kriter për punësim.” Ai tha edhe se: “Nëse duam të ndërtojmë një shtet të bazuar në njohuri dhe kompetenca, librezat partiake nuk duhet të jenë kriter për punësim, por njohuritë dhe aftësitë. Ajo që po e them tani mund të mos u pëlqejë shumë njerëzve edhe në partinë tonë, por mendoj se diku duhet të fillohet. Dhe nëse ne duhet ta fillojmë këtë si shumë procese në shtet, le të fillojmë.”

Sindikata e Kontrollorëve të Trafikut Ajror të Maqedonisë (SKTAM) më 10 korrik e anuloi vendimin e shpallur për grevë, e cila duhej të zhvillohej atë ditë. Kryetari i SKTAM-së, Aleksandar Tasevski, tha se kërkesat e sindikatës po ecin përpara, më saktësisht, kërkesa për punësimin e kontrollorëve dhe për zbatimin e një analize funksionale që duhet të përcaktojë se cilat vende pune dhe sa drejtues nevojiten është miratuar.

Kujtojmë se, sindikata e Kontrollorëve të Trafikut Ajror të Maqedonisë më 19 qershor i kishte dërguar një letër paralajmëruese Bordit të Drejtorëve të Navigacionit Maqedonas (M-NAV) se më 10 korrik, kontrollorët do të hyjnë në grevë dhe do të mbyllin qiellin nëse vazhdon të punësohet personel i panevojshëm partiak në vend të kontrollorëve të trafikut ajror, inxhinierëve dhe meteorologëve.

Reagimi i tyre erdhi pas një konkursi për punë të shpallur nga MNAV.

Pasi e miratoi raportin e tij të fundit mbi Maqedoninë e Veriut, Parlamenti Evropian thekson se përparimi drejt anëtarësimit në Bashkimin Evropian duhet të bazohet në merita dhe përmbushjen e Kriterëve të Kopenhagës. Eurodeputetët shprehën shqetësim serioz për përkeqësimin e gjendjes në luftën kundër korrupsionit dhe besimin gjithnjë e më të ulët të qytetarëve në sistemin gjyqësor.

Raporti nënvizon se ndonëse vendi ka miratuar reforma të rëndësishme, zbatimi mbetet i mangët, veçanërisht në fushat e qeverisjes, administratës publike, sundimit të ligjit dhe politikës kundër korrupsionit.

“Korrupsioni në nivele të larta vazhdon të jetë një sfidë madhore,” – thuhet në raport. Eurodeputetët kërkojnë pavarësi më të fuqishme të gjyqësorit, më shumë llogaridhënie dhe resurse të mjaftueshme për institucionet mbikëqyrëse, si mënyra e vetme për të rivendosur besimin e publikut.

Përkundër një agjende ambicioze për reforma dhe një mbështetje financiare prej 750 milionë eurosh nga BE, vendi përballet me pengesa të brendshme dhe të jashtme, përfshirë ndikimet destabilizuese të dezinformimit dhe ndërhyrjeve të huaja.