Bashkësia Lokale e fshatit Çegran ka reaguar ashpër ndaj asaj që e cilëson si diskriminim të qëllimshëm dhe anashkalim të vazhdueshëm nga ana e autoriteteve, përfshirë edhe përfaqësuesit e koalicionit VLEN. Në fokus të reagimit është moskthimi i zyrës së ofiqarit në këtë fshat me mbi 12,000 banorë.

Sipas Bashkësisë Lokale, edhe pse janë ndarë 38 vende pune, Çegrani është përjashtuar padrejtësisht nga përfitimet institucionale. Përfaqësuesit lokalë ngrenë alarmin se pozita e ofiqarit, që për vite me radhë ka qenë në funksion të banorëve të fshatit, është uzurpuar dhe përdorur për përfitime politike në kurriz të qytetarëve.

“Pas pensionimit të bashkëvendasit tonë që mbante këtë funksion, vendi nuk u zëvendësua. Përkundrazi, zyra u mor padrejtësisht dhe banorëve u mohohet një shërbim bazë. Zgjidhja po sabotohet me vetëdije nga individë dhe struktura që synojnë të manipulojnë realitetin për interesa personale e politike,” thuhet në reagimin e Bashkësisë Lokale.

Përfaqësuesit e fshatit theksojnë se janë ndërmarrë shumë kërkesa zyrtare dhe janë zhvilluar takime me drejtues institucionalë për ta zgjidhur këtë çështje, por gjithçka ka hasur në vesh të shurdhër.

“Ne kërkojmë rikthimin e menjëhershëm të ofiqarit në Çegran dhe emërimin e një personi të kualifikuar që do të jetë në shërbim të të gjithë qytetarëve – pa dallime, pa diskriminim dhe pa manipulime politike.”

Në deklaratë thuhet gjithashtu se zyra, ambientet dhe të gjitha shpenzimet për funksionimin e ofiqarit, përfshirë edhe energjinë elektrike, janë ofruar nga vetë Bashkësia Lokale, për t’i mundësuar qytetarëve shërbime të denja dhe pranë vendbanimit të tyre.

Në fund, Bashkësia Lokale paralajmëron protesta publike para Drejtorisë së Ofiqarisë në Gostivar, nëse edhe ky reagim vazhdon të injorohet.

“Çegrani nuk do të heshtë. Banorët e këtij fshati meritojnë respekt, barazi dhe shërbime publike të dinjitetshme. Mjaft më me gënjeshtra dhe mashtrime në emrin tonë.”

Njohja e kulturës dhe identitetit të asnjë vendi nuk është punë e Parlamentit Evropian (PE). Këtë për “BTA” e deklaroi Nikolla Minçev, eurodeputet nga grupi “Rinovojeni Evropën”/“Vazhdimi me Ndryshimet – Bullgaria Demokratike”, në margjinat e PE-së në Strasburg.

Ai theksoi se raporti mbi progresin e Republikës së Maqedonisë së Veriut (RMV) në rrugën e saj drejt Bashkimit Evropian (BE) është raporti i parë i tillë që përfshin tekst në lidhje me njohjen e identitetit, kulturës dhe gjuhës.

“PE është një organ politik, jo historik dhe kulturor, dhe duke njohur kulturën dhe identitetin, hapet një “Kuti e Pandorës” që të njëjtat kërkesa të shfaqen edhe në vendet e tjera”, theksoi ai.

Më 4 qershor, Komiteti i Punëve të Jashtme i PE-së ra dakord të shtyjë votimin për raportin mbi progresin e vendit drejt BE-së me propozimin e raportuesit Thomas Weitz. Votimi në komisionin parlamentar është planifikuar për 24 qershor, dhe në sallën plenare të Parlamentit Evropian në Strasburg në korrik.

Sipas Minçevit, sjellja e Kryeministrit të Maqedonisë, Hristijan Mickoski, është arsyeja e vonesës së raportit. Ai theksoi se pretendimet e Mickoskit se raporti njeh identitetin dhe kulturën shekullore të Republikës së Maqedonisë janë krejtësisht në kundërshtim me realitetin, pasi fjala “shekullore” nuk gjendet askund në draft-raport. Ky është një interpretim nga Mickoski, për shkak të imponimit të të cilit në javët e fundit PE-ja u detyrua të reagonte dhe të mos linte vend për keqinterpretime.

“Do t’i bëja thirrje Kryeministrit të Maqedonisë së Veriut të rishqyrtojë sjelljen dhe qëndrimin e tij si ndaj Bullgarisë ashtu edhe ndaj punës së Parlamentit Evropian”, tha Nikolla Minçev, në përgjigje të deklaratës së Kryeministrit se pret që eurodeputetët bullgarë të tërheqin amendamentet që i referohen “identitetit dhe gjuhës shekullore maqedonase” nga raporti i progresit të vendit për PE-në.

“Sjellja e tij ngre dyshime nëse ai dëshiron një raport apo po e saboton qëllimisht procesin, vetëm që miratimi i raportit të dështojë dhe ai të gjejë një viktimë të përshtatshme në emrin e Bullgarisë, të cilën më pas mund ta paraqesë si fajtore para votuesve të tij”, tha eurodeputeti.

Burime të afërta me zhvillimet politike flasin për tensione në rritje brenda koalicionit qeveritar VLEN, ku partitë përbërëse po përballen me ndasi të theksuara për ndarjen e komunave dhe kandidaturat.

Në Saraj, që shihet si bastioni kyç i Lëvizjes Demokratike të Izet Mexhitit, përplasjet janë të hapura. Alternativa ka hedhur në garë Orhan Mirtezanin, ndërsa Besa kandidon Hasim Murtezanin. Nga ana tjetër, Lëvizja Demokratike prezanton Muhamed Elmazin. Të gjitha partitë me kandidatë të veçantë – një sinjal i qartë për mungesën e konsensusit dhe rritjen e përçarjes në terren.

Ndërkohë në Tearcë, përplasjet mes Daut Memishit (Besa) dhe Amir Elezit (Alternativa) kanë marrë përmasa të thella, me burime që nuk përjashtojnë garim të ndarë – një skenar që nëse realizohet, do të ishte goditje e rëndë për imazhin e unitetit qeveritar.

Nga ajo që mësohet, edhe në komunat e tjera ndarja e pushtetit lokal po shfaqet si mollë sherri, me shumë struktura lokale që refuzojnë imponimet nga qendra. Vetë lideri i LD-së, Izet Mexhiti, thuhet se i ka dhënë prioritet Sarajit, duke parë rrezikun e madh që i kanoset në Çair nga Bujar Osmani dhe BDI.

Një tjetër zhvillim interesant është që Bashkim Bakiut, figura në rritje brenda VLEN, i është tërhequr vëmendja që të mos krijojë “ambicie të kota”, sinjal që tregon tensionet përbrenda edhe në rrafshin e hierarkisë së brendshme.

Sondazhet e fundit që po qarkullojnë janë përshkruar si “blerje kohe”, dhe më tepër si mjete psikologjike për të frenuar shpërbërjen. Megjithatë, sipas analizave të brendshme, ditët në vijim pritet një përçarje e thellë dhe e pashmangshme. Flitet se çdo parti është duke përgatitur terrenin për garim të ndarë, për të ruajtur kontrollin në bastionet e veta tradicionale.

Në vend të unitetit, VLEN po përballet me një fragmentim të heshtur që mund të shpërthejë publikisht në çdo moment.