Arrestohet shoferi rumun i kamionit të përfshirë në aksidentin zinxhir në Bullgari

Shoferi rumun i kamionit, i lidhur me njërin nga dy aksidentet zinxhir në autostradën “Trakia” në Bullgari, është ndaluar nga policia, ndërsa hetimet për zbardhjen e shkaqeve të tragjedisë po vazhdojnë.

Policia bullgare ka arrestuar shoferin rumun të kamionit nga i cili nisi njëra prej dy aksidenteve tragjike në autostradën “Trakia”. Shoferi do të merret në pyetje në kuadër të hetimeve, njoftoi drejtori i Drejtorisë Rajonale të Ministrisë së Brendshme në Jamboll, Dobrin Dimitrov.

Opozita bullgare kërkon dorëheqjen e Qeverisë pas tragjedisë në autostradën “Trakia”.

Sipas të dhënave fillestare, dukshmëria në autostradë është ulur ndjeshëm për shkak të mjegullës së dendur, ndërsa kamioni me shumë gjasë po lëvizte me shpejtësi shumë të ulët ose ishte futur në trafik nga korsia e ndalimit.

“Ende nuk mund ta përcaktojmë këtë. Për këto rrethana do të kryhen ekspertiza shtesë nga Shërbimi Kombëtar i Hetimeve”, deklaroi Dimitrov.

Shoferi rumun i arrestuar pretendon se e ka ulur shpejtësinë për shkak të mjegullës. Ai pritet të merret sot në pyetje në detaje, me ndihmën e një përkthyesi, ndërsa hetimet duhet të përcaktojnë nëse ai e ka ndalur plotësisht kamionin dhe nëse në këtë mënyrë ka penguar lëvizjen e automjeteve të tjera.

Prokurori i Jambollit, Dojçin Dojçev, deklaroi se dje janë marrë në pyetje 44 dëshmitarë, por do të pasojnë edhe marrje të tjera në pyetje për të përcaktuar rrjedhën e saktë të aksidenteve.

“Pas kamionit rumun po lëvizte një veturë, shoferi i së cilës arriti të shmangte përplasjen. Por autobusi me pasagjerë që po lëvizte pas saj nuk arriti ta bënte këtë. Më pas erdhi një kamion tjetër që transportonte drithëra, pas së cilës ndodhi reaksioni zinxhir”, deklaroi Dojçevi.

Ai sqaroi se në autobus nuk ka pasur viktima, por personat e vdekur kanë humbur jetën në përplasjet që pasuan, pasi nuk kanë pasur kohë të mjaftueshme për të reaguar dhe për t’i shmangur goditjet.

Dëshmitarët kanë treguar se në një moment mjegulla është bërë jashtëzakonisht e dendur, për shkak të së cilës disa shoferë e kanë ulur shpejtësinë. Sipas prokurorit, është e mundur që pjesëmarrësit e tjerë në trafik të mos e kenë përshtatur shpejtësinë dhe mënyrën e drejtimit me kushtet atmosferike.

“Disa dëshmitarë pretendojnë se një pjesë e automjeteve kanë lëvizur me shpejtësi të papërshtatshme për kushtet e rrugës”, tha Dojçevi.

Ai theksoi se është ende herët të flitet për ngritjen e aktakuzave, pasi priten veprime të tjera hetimore, marrje të reja në pyetje dhe ekspertiza.

Ndërkohë, Ministria bullgare e Shëndetësisë konfirmoi se numri i të vdekurve në të dy aksidentet është 11. Informacionet fillestare ishin se në të dy aksidentet kishin humbur jetën 12 persona, por pas identifikimit dhe verifikimit të të dhënave, numri u korrigjua. Dhjetë persona kanë vdekur në vendin e aksidenteve, ndërsa njëri nga të lënduarit më vonë ka ndërruar jetë në spital si pasojë e plagëve të marra.

Gjithsej 51 të lënduar janë dërguar në spitalet e Sllivenit, Jambollit dhe Burgasit. Prej tyre, 33 janë trajtuar në Slliven, 11 në Jamboll dhe shtatë në Burgas. Sipas Ministrisë së Shëndetësisë, 13 të lënduar janë në gjendje të rëndë.

Qarkullimi në autostradën “Trakia”, në drejtim të Sofjes, është normalizuar rreth orës një pas mesnate, ndërsa në drejtim të Burgasit dy orë më vonë. Dimitrov njoftoi se rruga ishte pastruar tërësisht dhe se ekipet policore ishin vendosur për t’i paralajmëruar shoferët.

Hetimet i ka marrë përsipër Shërbimi Kombëtar i Hetimeve, i cili do të vendosë nëse do të jetë i nevojshëm një këqyrje e përsëritur e vendit të aksidenteve./News.bg.