Kryetari i Alternativës Zeqirija Ibrahimi, në intervistën e fundit në TV Alsat, ka folur për intervistimin e kandidateve për Këshillin Programor të Radio Televizionit të Maqedonisë, trup i cili duhet të jetë profesionist për punën e RTM-së por edhe për emërimin e Këshillit të Agjencisë së Mediave.

Ibrahimi deklaroi se çdo herë që bëhet fjalë për emërimin e Këshillave apo Trupave të pavarura, çdo herë kemi komente se ndonjëri prej tyre është i një subjekti politik, dhe ka një të kaluar politike dhe ka pasur afërsi politike me njërën parti politike.

“Megjithatë ne jemi një vend i vogël dhe një shoqëri mjaftë e vogël. Ajo që është e rëndësishme është që ata të cilët zgjidhen, t’i plotësojnë kushtet e konkursit të cilat janë dhënë. Në qoftë se i plotësojnë ato kushte, jam dakord që ata të zgjidhen, pavarësisht se kush janë ata emra”, theksoi Ibrahimi.

Në fund Ibrahimi shtoi se sipas informatave të tij, te Agjencia e Mediave, kandidatët i kanë plotësuar kushtet e konkursit dhe mbetet që të vazhdoj puna e përzgjedhjes në Kuvend.

Kryetari i Alternativës Zeqirija Ibrahimi, në intervistën e fundit në TV Alsat, ka folur rreth zgjedhjeve lokale që do të mbahen këtë vit. Ibrahimi është shprehur se është akoma herët të flitet për emra, pasi akoma nuk e dinë se cila parti në cilin komunë do të garojë. Siç tha ai vetëm kur të qartësohen të gjithë situatat atëherë do të bëhen të ditur emrat.

“Në zgjedhjet lokale më shumë varet nga emri i kandidatit, përkundër partisë politike. Ne po përpiqemi se çdo kush t’i ofrojë emrat më të pranuar dhe më të kërkuar nga qytetarët në komunat të cilat ata duhet të garojnë”, u shpreh Ibrahimi.

Zëvendësministri i Bujqësisë, Flakron Bexheti, ka informuar se në kuadër të angazhimit për të qenë pranë fermerëve dhe për të ndjekur nga afër situatën në terren, ka realizuar një vizitë te pemishtja e z. Idriz Ademi nga fshati Krushopek të Komunës së Sarajit, kultivues i qershive dhe kajsive, në vendin e quajtur Dragçe.

“Pas dëmeve të shkaktuara nga temperaturat e ulëta të muajit prill, për të cilat u raportua edhe në Alsat-M ditën e djeshme, biseduam nga afër për ndikimin që kanë pasur kushtet klimatike në prodhimin e tij. E informova për procedurat dhe mënyrën e paraqitjes së kërkesës për kompensim të dëmeve, duke e udhëzuar që kërkesën duhet ta dorëzojë në Komunën e Sarajit. Fillimisht, Këshilli Komunal duhet të miratojë vendimin për shpalljen e ditëve të fatkeqësive natyrore, pas së cilës Komisioni komunal do të hartojë procesverbalin përkatës dhe më pas do ta dërgojë atë te Komisioni qeveritar për vlerësimin dhe përcaktimin e shkallës së dëmit nga fatkeqësitë natyrore. U sigurova që ai të ketë të gjithë informacionin e nevojshëm për të përfituar nga mbështetja shtetërore”, ka shkruar Bexheti.

Më tej ai ka informuar se Ministria e Bujqësisë është e përkushtuar të qëndrojë pranë fermerëve në këto momente sfiduese dhe është gjithmonë e gatshme të ofrojë ndihmë dhe informim të plotë për çdo fermer të prekur nga kushtet e pafavorshme klimatike.