Nga Gjykata Themelore e Koçanit për SAKAMDAKAZAM.MK deklaruan se tashmë po shkruhen vendimet për paraburgimin e shkurtër të 8 plus 6 të dyshuarve për zjarrin katastrofik në diskotekën “Puls” në Koçan, ku humbën jetën 59 persona. Kjo do të bëhet në mënyrë që të arrestuarit të mbahen në marrje në pyetje për më shumë se 24 orë. Pas skadimit të këtyre 48 orëve, do të dihet për cilët nga të dyshuarit prokurorët do të kërkojnë paraburgim 30-ditor.

Sot kryetari i Komunës së Gostivarit, Valbon Limani bashkë me qindra qytetarë, në qendër të qytetit përkujtuan 59 viktimat e tragjedisë që ndodhi në Koçan.

Kryetari Limani theksoi se ngjarje është për t’u solidarizuar dhe për të shprehur nderime.

“Sot jemi mbledhur të gjithë këtu, gostivarasit, së bashku unë me këshilltarët dhe me të gjithë qytetarët e tjerë, për të shprehur para së gjithash nderim, por edhe për t’u solidarizuar me të gjitha familjet që kanë humbur më të dashurit e tyre në këtë ngjarje tragjike. Në të njëjtën kohë, duam t’u dërgojmë mesazhe të gjithë atyre që janë të prekur dhe po trajtohen në spitale, që të shërohen sa më shpejt dhe të shpresojmë që të mos ketë viktima të tjera nga ky rast i dhimbshëm. Në të ardhmen, urojmë të mblidhemi të gjithë të bashkuar vetëm për raste të bukura”, u shpreh Limani.

Kujtojmë se pas shpalljes së 7 ditë zie nga Qeveri, sot edhe flamujt pranë Komunës së Gostivarit u ulën në gjysmë shtizë.

Aleanca për Shqiptarët organizoi sot bëri homazhe në sheshin e Tetovës në nderim të 59 jetëve të humbura tragjikisht në Koçan. Me dhembje dhe respekt, përfaqësuesit e ASH-së qëndruan në heshtje për të shprehur mbështetjen e tyre ndaj familjeve të viktimave që po përballen me këtë humbje të madhe.

Sekretari Organizativ i Aleancës për Shqiptarët, Gadaf Uzairi pas homazheve në fjalën e tij theksoi se qëndrojnë pranë familjarëve dhe të afërmve të viktimave. Ata nuk janë vetëm në këtë tragjedi, sepse dhimbja e tyre është edhe dhimbja jonë. Ata meritojnë drejtësi dhe të vërtetën mbi këtë ngjarje që i ka tronditur të gjithë.

“Sot jemi mbledhur këtu në një moment të rëndë dhe të dhimbshëm për të shprehur solidaritetin dhe dhembshurinë tonë për jetët e humbura në këtë tragjedi të tmerrshme. Një ngjarje e tillë nuk është vetëm një goditje për familjet e viktimave, por për mbarë shoqërinë tonë.

Në këtë moment dhimbjeje, ne qëndrojmë pranë familjarëve dhe të afërmve të viktimave. Ata nuk janë vetëm në këtë tragjedi, sepse dhimbja e tyre është edhe dhimbja jonë. Ata meritojnë drejtësi dhe të vërtetën mbi këtë ngjarje që i ka tronditur të gjithë.

Kujtojmë ende tragjeditë e spitalit modular në Tetovë, të aksidenteve tragjike në Bullgari dhe Llaskarcë. Fatkeqësisht, shpesh përgjegjësit mbeten të pandëshkuar. Kjo nuk mund dhe nuk duhet të ndodhë më!

Është momenti i fundit që sistemi i drejtësisë dhe gjyqësor të reflektoj, që kjo ngjarje të hetohet deri në fund, të zbardhen përgjegjësit e vërtetë dhe të ketë ndëshkim për ata që kanë dështuar të garantojnë sigurinë e qytetarëve. Askush nuk mund të jetë mbi ligjin! Drejtësia duhet të vendoset një herë e përgjithmonë, sepse jeta e njerëzve është më e shenjtë se gjithçka tjetër.

Lutemi për viktimat dhe i shprehim ngushëllimet tona më të sinqerta familjeve të tyre. Kujtimi i tyre do të mbetet gjithmonë në zemrat tona”, nënvizoi Uzairi.