Kryetari i Aleancës për Shqiptarët Arben Taravari ka shpalosur pikën e tetë të Platformës Kombëtare – Decentralizimi i Administratës Publike dhe Siguria Publike.

Nga ASH-Taravari sqarojnë se administrata publike do të riorganizohet mbi parimet e meritokracisë, duke eliminuar klientelizmin dhe çdo formë të punësimti partiak, ndërsa tek siguria publike Taravari premton se do të ketë punësim të barabartë të shqiptarëve në polici dhe tek zjarrfikësit.

Njoftimi i plotë mbi pikën numër 8:

Aleanca për Shqiptarët beson se zhvillimi i qëndrueshëm i vendit nis nga fuqizimi i komunave tona. Në këtë drejtim, ne angazhohemi për transferim të plotë të kompetencave dhe buxheteve te komunat shqiptare, duke u dhënë atyre mundësinë për vendimmarrje autonome dhe zbatim efektiv të projekteve lokale që përmbushin nevojat reale të qytetarëve. Përmes forcimit të institucioneve lokale dhe transparencës maksimale, do të sigurojmë një qeverisje lokale të drejtë dhe të përgjegjshme, ku qytetarët janë pjesëmarrës aktivë në çdo vendim përmes platformave digjitale dhe komunikimit të hapur.

Administrata komunale do të riorganizohet mbi parimet e meritokracisë, profesionalizmit dhe etikës, duke eliminuar klientelizmin dhe çdo formë të punësimeve politike. Shërbimet komunale do të digjitalizohen, duke u bërë më të shpejta, më efikase dhe më të qasshme për çdo qytetar. Çdo qytetar do të ketë mundësi të dijë se si shpenzohet çdo denar i buxhetit të komunës së tij.

Në fushën e sigurisë publike, do të garantojmë përfaqësim të barabartë të shqiptarëve në polici dhe zjarrfikës, investime të vazhdueshme në ndriçim publik, kamera sigurie dhe rrugë të sigurta, si dhe bashkëpunim aktiv me strukturat e lagjeve për parandalimin e kriminalitetit dhe përdorimit të substancave të dëmshme. Koncepti ynë “Lagje e Sigurt” vendos përgjegjësi të drejtpërdrejtë në çdo njësi lokale për sigurinë e komunitetit, duke e bërë qytetin tonë një vend më të sigurt për të gjithë.

Me këtë, përmbyllim prezantimin e kësaj Platforme Kombëtare dhe ftojmë të gjitha partitë politike dhe qytetarët shqiptarë të bashkohen në përkrahje të saj, për të ndërtuar një të ardhme të fortë, të drejtë dhe të qëndrueshme për shqiptarët në Maqedoninë e Veriut.

Kandidati i Aleancës Kombëtare për Integrim për komunën e Sarajit, Blerant Ramadani, ka theksuar se kjo komunë është duke u kthyer në shembull të bashkimit politik shqiptar dhe të vizionit fitues për zgjedhjet e tetorit.

“Saraji po bëhet simbol i bashkimit politik shqiptarë dhe vizionit fitues! Bashkë me kryetarin aktual Iljas Vejseli, deputetin e zonës Blerim Bexheti, ish-deputetin Arben Ziberi, kryetarët e degëve dhe aktivin politik të Aleancës Kombëtare për Integrim, u takuam për të diskutuar dhe koordinuar bashkëpunimin tonë për zgjedhjet lokale në Saraj”, deklaroi Ramadani.

Ai tha se ky bashkëpunim është dëshmi e përkushtimit për të ndërtuar një vizion të përbashkët zhvillimor për komunën.

“Ky bashkëpunim është dëshmi e përkushtimit tonë për të ndërtuar një vizion të përbashkët zhvillimor për komunën, duke i dhënë qytetarëve një ofertë serioze, të qëndrueshme dhe fituese”, shtoi ai.

Ramadani theksoi se qytetarët e Sarajit meritojnë projekte konkrete dhe udhëheqje që punon për interesin e tyre.

“Saraji meriton unitet politik, projekte konkrete dhe udhëheqje që punon për interesin e qytetarëve. Me këtë frymë, ne po ndërtojmë një front të fortë dhe të bashkuar që do ta bëjë ndryshimin real në tetor”, u shpreh kandidati i Aleancës Kombëtare për Integrim.

Në fund, ai përshëndeti edhe emërimin e Senehat Murtezanit si shef i shtabit zgjedhor në Saraj.

“Urime dhe suksese Senehat Murtezani për rolin e shefit të shtabit!”, tha Ramadani.

Në koalicionin VLEN duket se po shfaqen tensione të reja për lidershipin, pasi gjatë ditës së sotme disa aktivistë të afërt me zëvendëskryeministrin Arben Fetai e kanë promovuar atë si lider të vërtetë të koalicionit.

Zëvendësministri i Bujqësisë, Pylltarisë dhe Ekonomisë së Ujërave, në një reagim publik, ka shkruar:
“Ai ndoshta nuk e ka menduar kurrë veten si lider, por shpesh rrethanat imponojnë nevojën për zëra të tillë. Kjo ndodhi edhe para disa muajsh, kur brenda Aleancës sonë nisën të thuren plane kundër VLEN-it dhe në favor të BDI-së. Argumentet e kryetarit dhe pak njerëzve rreth tij ishin jo vetëm të dobëta, por edhe qesharake. Në momente të tilla, gjithmonë janë aktivistët e sinqertë, themeluesit e bërthama e Aleancës, që mblidhen vetëvetiu për të mbrojtur këtë ide politike. Krejt natyrshëm, sytë u drejtuan kah Arbeni ynë, Arbeni i VLEN-it. Ndërsa disa devijuan dhe sot gjenden krah Ali Ahmetit, Arben Fetai mbeti punëtor, besnik ndaj aktivistëve dhe i përkushtuar ndaj vijës ideologjike. Ai është një zë i pazëvendësueshëm në këtë përgjegjësi politike”, ka theksuar Hoxha.

Edhe aktivistja Yllka Nuredini ka dalë hapur në përkrahje të Fetait, duke theksuar se ai ka mbetur i palëkundur ndaj parimeve:
“Arben Fetai sot është udhëheqësi ynë, njeriu që nuk e shiti kurrë vlerën tonë te kryetari juaj Ali Ahmeti. VLEN nuk u shit për poste, komuna apo privilegje. Ju e shitët kauzën, ideologjinë dhe e njollosët logon që pretendoni se po e mbroni. Kritikuat Ziadin Selën pse u largua, por historia po tregon se ai kishte të drejtë. Sot tradhtinë e vulosët ju”, ka shkruar Nuredini.

Në të njëjtën linjë ka reaguar edhe koordinatori nacional për Komunikim dhe Media në Qeverinë e RMV-së, Latif Arifi, i cili ka sulmuar kritikët e Fetait:
“Ka njerëz që betejat e Aleancës i kanë parë vetëm nga ‘livestream’-i i FOL-it, dhe e vetmja djersë që kanë derdhur është nga gishtat duke shtypur LIKE. Sot, të njëjtit shiten si moralistë të vonuar. Një lapsus gjuhësor në Kërçovë nuk ndryshon asgjë – Arben Fetai ishte dhe mbetet kryetar legjitim i Kuvendit të Aleancës dhe garancia që BDI nuk do ta nënshtrojë kurrë aktivistin e Aleancës. Ata që u shfaqën vetëm kur u hap dera e privilegjeve… më mirë të heshtin!”, ka shkruar Arifi.

Ndryshe, Arben Fetai gëzon mbështetje dhe nga Kryetari i Lëvizjes Vetëvendosje dhe kryeministri në detyrë i Qeverisë së Republikës së Kosovës, Albin Kurti.

Deklaratat e njëpasnjëshme në mbështetje të Arben Fetait ngrejnë pyetjen: a po kalon VLEN në një krizë lidershipi dhe a po konsolidohet Fetai si lider i koalicionit?