Qipro merr më 1 janar presidencën e BE-së

Qipro do të marrë më 1 janar Presidencën e BE-së nga Danimarka. Në prezantimin e programit për gjashtë muajt e parë të vitit 2026, presidenti Nikos Christodoulides ka deklaruar se presidenca qipriote do të punojë për të siguruar qartësi politike dhe qëndrueshmëri institucionale në zgjerimin e BE-së.

Christodoulides tha se Ballkani Perëndimor përbën një zonë veçanërisht të ndjeshme dhe BE-ja duhet të kuptojë rrezikun e lënies së një boshllëku ndikimi për aktorët e tretë. Për Malin e Zi dhe Shqipërinë, presidenti qipriot tha se rezultatet e këtyre shteteve vërtetojnë se kur ekziston vullneti politik dhe angazhimi për reforma, progresi është i mundshëm brenda procesit të pranimit.

Christodoulides ishte kritik ndaj Beogradit, duke theksuar se BE-ja dështoi që të bindte si udhëheqjen politike, ashtu edhe shoqërinë, se Serbia i përket vërtet familjes evropiane, gjë që kërkon autokritikë të ndershme dhe një mesazh më të qartë politik.

Lidhur me Turqinë, Christodoulides synon që ta ftojë presidentin Erdogan në Këshillin Evropian joformal që do të mbahet në Qipro.

Presidentja e Komisionit Evropian, Ursula von der Leyen, do të vizitojë Qipron më 7 janar për marrjen e presidencës së BE-së.