Hoxhë Sadulla Bajrami, njëri nga emrat më të përmendur të ish-ushtarëve shqiptarë të konfliktit të vitit 2001, ka reaguar ashpër ndaj institucioneve shtetërore dhe në veçanti ndaj Zëvendësministrit të Punëve të Brendshme, duke i akuzuar për diskriminim sistematik dhe hakmarrje të vazhdueshme ndaj familjeve të atyre që dikur luftuan për të drejtat e shqiptarëve në Maqedoninë e Veriut.

Në një mesazh të drejtpërdrejtë, Hoxha ngre akuza të rënda për padrejtësi të përsëritura ndër vite ndaj ish-ushtarëve dhe tani, sipas tij, edhe ndaj fëmijëve të tyre.

“Ne që po përjetojmë padrejtësi të pandërprera tash 24 vjet me radhë, jemi malltretuar, përbuzur dhe harruar si të mos kishim ekzistuar kurrë.”

Ai rikujton se pavarësisht pjesëmarrjes së tyre në mbrojtjen e pragut të shtëpisë, pushtetarët aktualë kanë përfituar nga sakrifica e tyre, por më pas i kanë lënë në harresë të plotë:

“Ishte pikërisht ajo sakrificë e shumë prej nesh që ua hapi rrugën posteve që ju sot i gëzoni. Por realiteti tregoi se nuk ishim as pjesë e llogarive tuaja, as pjesë e kujtesës suaj.”

Pjesa më e rëndë e reagimit të tij vjen kur flet për mënyrën se si, sipas tij, trajtohen fëmijët dhe në veçanti vajzat e ish-luftëtarëve shqiptarë:

“Keni filluar të sulmoni edhe fëmijët tanë! Jo vetëm fëmijët, për të cilët ndoshta do të kishim heshtur, por edhe vajzat tona të pafajshme, të cilat i përjashtoni dhe i ndaloni, i fusni në ‘lista të zeza’, vetëm sepse janë bijat tona!”

Ai ngre pyetje publike në adresë të Zëvendësministrit të Punëve të Brendshme:

“Çfarë faji kanë ato, i nderuar zëvendësministër? A është kjo arsye që vajzat tona të përdhosen dhe të nëpërkëmben nëpër pika kufitare? Kërkojmë një përgjigje të qartë!”

Bajrami e mbyll reagimin e tij me tone të forta morale dhe fetare, duke paralajmëruar se drejtësia do të vijë:

“Postet nuk janë të përjetshme. Vjen dita kur të gjithë do të qëndrojmë para Allahut. Dhe aty do të ballafaqohen viktimat me padrejtësit, të shtypurit me zullumqarët. Populli nuk harron. Zoti nuk harron.” Flaka Media

Qindra shtëpi të lagjes 146 në Tetovë, prej më shumë se dy dekada vuajnë mungesën e ujit të pijshëm. Banorët thonë se ujin e sigurojnë përmes çezmës në pjesën e poshtme të lagjes, ose blejnë nga dyqani. Punimet kanë filluar, ndërsa banorët kërkojnë përshpejtim pasi situata është e padurueshme.

“Ujë kemi por i turbullt është, ujë të turbullt kemi. Një orë ka dhjetë nuk ka. Në këto temperatura paramendoje ma si jemi. Kemi shpresë se do na e sjellin ujin sepse na kanë premtuar, por a do të bëhet apo jo nuk e dimë. Kanë filluar punimet, por a do vazhdojnë apo jo se di. Na ka premtuar se do na e sjellin ujin”, tha një banor.

“Lagja Bregu i Diellit nuk ka ujë të pijshëm, nga puset cisternat mbushim kështu mbytemi tash e 25 vite me radhë. Thonë se punojnë atje dhe janë duke u përpjekur ta furnizojnë lagjen me ujë të pijshëm. Premtime kemi tash e 25 vite gjitha strukturat na kanë rrejt vazhdimisht”, u shpreh një banor.

Kreu i komunës së Tetovës Bilall Kasami tha se punimet kanë nisur, por për shkak të terrenit të papërshtatshëm, punët shkojnë ngadalë.

“Po punohet intensivisht lartë. Për momentin në komunë të Tetovës janë mbi pesë projekte që janë duke u realizuar. Në këtë situatë nuk bëjmë fushatë, andaj nëse doni, mund bashkë të dalim dhe të shohim punimet që bëhen, por, terreni është shumë i papërshtatshëm dhe punimet nuk ecin ashtu siç duam ne. Por në momentin që po flasim ka punime në terren, unë besoj që shpejtë edhe ky ujësjellës do jetë në përdorim për qytetarët e lagjes 146”, deklaroi Bilall Kasami.

Përveç mungesës së ujit të pijshëm, një pjesë e shtëpive të kësaj lagjeje, përballen edhe me problemin e legalizimit të shtëpive të tyre, sepse një pjesë e madhe e tyre, përkatësisht rreth 60 të, janë të ndërtuara në tokë që i takon Bashkësisë fetare Islame.

Lajmet për braktisjen e Alternativës nga koalicioni VLEN janë të pavërteta dhe shpifje! Në lidhje me disa raportime të fundit në media dhe në rrjete sociale, që pretendojnë se partia Aleternativa është duke u larguar nga koalicioni VLEN, Alternativa sqaron se këto lajme janë krejtësisht të pavërteta, të pabazuara dhe kanë karakter shpifës, kumtuan nga ky subejt

“Partia Alternativa e konsideron koalicionin VLEN si një bashkëpunim strategjik dhe të domosdoshëm për përfaqësimin dinjitoz të shqiptarëve në Maqedoninë e Veriut dhe është e përkushtuar për të vazhduar rrugëtimin e përbashkët në këtë drejtim. Çdo tentativë për të përhapur lajme të rreme për prishje apo përçarje brenda koalicionit, vjen nga qarqe të cilat ndihen të kërcënuara nga forca dhe uniteti i koalicionit VLEN. Qëllimi i këtyre shpifjeve është i qartë: të krijohet konfuzion dhe të minohet besimi i qytetarëve ndaj këtij bashkimi të rëndësishëm politik që synon ndryshimin dhe reformimin e skenës politike shqiptare në vend. U bëjmë thirrje qytetarëve, simpatizantëve dhe përkrahësve të mos bien pre e dezinformatave dhe të ndjekin kanalet zyrtare të komunikimit për çdo informacion të saktë”, vijon kumtesa.

Alternativa thekson se koalicioni VLEN është më i bashkuar se kurrë dhe së bashku do të vazhdojmë të punojmë për një të ardhme më të mirë, drejtësinë sociale, barazinë dhe integrimin e plotë të shqiptarëve në institucionet shtetërore.

“Në emër të transparencës dhe respektit për opinionin publik, theksojmë edhe një herë se çdo informacion për braktisje të Aleternativës nga VLEN është një shpifje e qëllimshme dhe nuk pasqyron realitetin politik”, përfundon kumtesa që në versionin e parë e quajtën veten koalicion opozitar, që më pastaj të ndërhynë në kumtesë.