Aleanca për Shqiptarët e Arben Taravarin përmes një komunikate rikujton se barazia reale dhe përfaqësimi i drejtë e adekuat në të gjitha nivelet e shtetit janë shtylla mbi të cilat duhet të ndërtohet një pakt i ri politik mes shqiptarëve dhe maqedonasve.

“Platforma kombëtare e propozuar nga Aleanca parashikon që shqiptarët të kenë të njëjtat të drejta dhe mundësi si maqedonasit në çdo sferë të jetës: arsim, ekonomi, kulturë, administratë dhe siguri publike. Kjo do të thotë se institucionet shtetërore – nga administrata deri te policia dhe gjyqësori – duhet të pasqyrojnë përbërjen multietnike të vendit, duke garantuar që shqiptarët të mos mbeten të nën-përfaqësuar.

Një shtet demokratik nuk mund të funksionojë mbi bazën e margjinalizimit. Prandaj, platforma e Aleancës synon ruajtjen dhe fuqizimin e identitetit, gjuhës, kulturës dhe trashëgimisë shqiptare, duke siguruar që komuniteti shqiptar të mos mbetet i përjashtuar nga zhvillimet politike, ekonomike dhe shoqërore”, thekson ASH.

Sipas kësaj partie, boshti kryesor i kësaj marrëveshjeje të re politike është krijimi i kushteve që shqiptarët të trajtohen si qytetarë të barabartë, e jo si qytetarë të dorës së dytë. Vetëm përmes këtij parimi mund të ndërtohet bashkëpunim i qëndrueshëm për zhvillimin e shtetit dhe përshpejtimin e rrugës drejt integrimit evropian.

“Në një kohë kur po diskutohet për heqjen e parimit të balansuesit dhe miratimin e një ligji të ri diskriminues mbi përfaqësimin e drejtë dhe adekuat të bashkësive etnike, Aleanca për Shqiptarët thekson se ky është një hap prapa për të drejtat e shqiptarëve dhe një kërcënim për kohezionin shoqëror. Për këtë arsye, ftojmë partitë shqiptare, sektorin civil, intelektualët dhe të gjitha shtresat shoqërore të përkrahin paktin politik të propozuar nga Aleanca për Shqiptarët, si garanci për një shtet funksional, të barabartë dhe evropian”, theksoi ASH.

Nëntë policë janë dërguar në Repartin e Toksikologjisë dhe po marrin mbështetje me oksigjen për shkak të thithjes së tymit pas parandalimit të përhapjes së një zjarri pranë Qendrës Sportive Boris Trajkovski në Shkup. Zjarri u vu nën kontroll nga forcat e sigurisë dhe ekipi i zjarrfikësve, ndërsa pjesëmarrësit dhe publiku u evakuuan në mënyrë të sigurt njoftoi MPB, raporton SHENJA.

“Dje rreth orës 16:00 në afërsi të Qendrës Sportive Boris Trajkovski në Shkup, edhe pavarësisht kushteve të pafavorshme të motit, policë të angazhuar në sigurinë fizike të turneut ndërkombëtar të hendbollit, së bashku me një ekip për mbrojtje nga zjarri, ndërmorën masa dhe aktivitete për të parandaluar përhapjen e zjarrit dhe përfshirjen e automjeteve dhe ndërtesave, si dhe të pistës së akullit që është pjesë e qendrës sportive.

Pjesëmarrësit e turneut dhe të gjithë punonjësit e tjerë sportivë dhe publiku u evakuuan gjithashtu në mënyrë të sigurt.

Si pasojë e zjarrit, nëntë policë janë në mbështetje me oksigjen në Repartin e Toksikologjisë për shkak të thithjes së tymit dhe janë në gjendje të qëndrueshme”, thonë nga MPB.

Mbi 200 mijë banorë të Tetovës dhe pesë komunave rurale përreth (Bogovinë, Tearcë, Zhelinë, Jegunoc dhe Bërvenicë) mbulohen vetëm nga dy ekipe të ndihmës së shpejtë, të cilat përballen çdo ditë me rreth 40 thirrje urgjente. Automjetet janë të vjetruara, ndërsa mungesa e personelit e bën situatën edhe më kritike, raporton Portalb.mk.

Udhëheqësi i Ndihmës së Shpejtë në Tetovë, Igor Mlladenovski, thotë se nevojiten të paktën katër ekipe për çdo ndërrim, pra minimumi 16 deri në 20 ekipe në total, ndërkohë që aktualisht funksionojnë vetëm shtatë.

“Afërsisht verës në 24 orë, kishte deri në dyzet thirrje në ditë, flas vetëm për thirrje jo kontrolle. Ndërsa në një ndërrim kemi vetëm dy ekipe, dhe kjo është shumë pak, duke marrë parasysh sipërfaqen e madhe që mbulojmë si njësi e ndihmës së shpejtë. Problemi më i madh është se momentalisht me këtë popullatë, duhet të ketë nga 16 deri në 20 ekipe, apo nga katër në një ndërrim, pra të paktën 16 të kemi, ndërsa ne momentalisht kemi tetë që do të thotë 50 % kemi më pak”, tha Mlladenovski,

Edhe drejtori i Shtëpisë së Shëndetit në Tetovë, Jani Kostadinovski, pranon se gjendja është e vështirë.

“Situata është shumë e vështirë dhe me vetëm dy ekipe nuk i dilet në fund. Kilometrat janë shumë që mbulojmë 50 kilometra ndonjëherë kemi vetëm në një ndërrim, dy orë në një intervenim zihet një makinë e ne kemi vetëm dy. Shumë numri vogël është për këtë territor flasim për territorin e ish komunës së Tetovës thuaj se jemi deri në Gostivar në Jazhoncë dhe Malin Aharr. Problemi është se pacientët presin se realisht nuk mund të mbërrimë dhe ka pritje dhe ka pakënaqësi realisht”, tha Kosdaninovski.

Përveç thirrjeve të zakonshme, ekipet mbulojnë edhe ndeshjet e futbollit, sezonin në Kodrën e Diellit dhe ngjarje të tjera publike, duke e bërë barrën edhe më të rëndë.

Sipas drejtuesve shëndetësorë, është dërguar kërkesë në Ministrinë e Shëndetësisë për punësimin e tetë mjekëve, tetë infermierëve dhe tetë shoferëve të urgjencës, por deri tani nuk ka asnjë përgjigje. Vendimi pritet të merret pas zgjedhjeve lokale.

Ndryshe, kanë kaluar dy muaj e gjysmë dhe statusi i punës së infermierëve në Tetovë nuk u zgjidh siç premtoi ministri i Shëndetësisë Azir Aliu. Ndonëse konkursi u hap, procedura është pezulluar për shkak të zgjedhjeve lokale.