Kryetari i Aleancës për Shqiptarët, Arben Taravari, ka dënuar ashpër sulmin ndaj gazetarit Naser Selmani, duke e cilësuar atë si një akt që i shtohet dhunës së rritur ndaj medias së lirë në vend.

“Dënoj ashpër sulmin ndaj gazetarit Naser Selmani, sulm i cili i shtohet dhunës që është rritur ndjeshëm ndaj medias së lirë. Kjo dhunë jep dy mesazhe të qarta: së pari, jetojmë në diktaturë – fatkeqësisht; së dyti, kjo diktaturë i ka ditët e numëruara. Edhe pse pushteti merret me Naserin, prapë fiton Naseri”, ka deklaruar Taravari.

Ai ka theksuar se liria e medias është vlerë themelore e demokracisë dhe se çdo tentim për ta mbytur atë përbën sulm ndaj qytetarëve dhe së drejtës së tyre për informim.

https://www.facebook.com/share/p/16CrNZLa4j/?mibextid=wwXIfr

Çështja e dyshimeve për përgjime të kryeministrit Hristijan Mickoskit, gazetarëve dhe bizinismenëve edhe sot ka vazhduar me reagime dhe akuza në mes pushtetit dhe opozitës. Nga LSDM thonë se deklaratat e kryeministrit dhe drejtorit aktual të Agjencisë për Siguri Kombëtare Bojan Hristovskit janë kontradiktore. Zëdhënësja e LSDM-së Bogdanka Kuzeska tha se LSDM kërkon deklasifikimin e menjëhershëm të të gjithë dokumentacionit që lidhet me akuzat për përgjime të paligjshme.

BOGDANKA KUZESKA, ZËDHËNËSE E LSDM-SË

“Mickoski thotë se dyshohet se është përgjuar, ndërsa drejtori i ASK-së e mohon dhe thotë diqka tjetër, se bëhet fjalë për mbledhjen e informacioneve rreth individëve të targetuar. Kush po gënjen këtu? Nëse ASK- ja nuk e sqaron rastin, do të bëhet e qartë se kjo është një tjetër përpjekje e dështuar për manipulim nga qeveria dhe keqpërdorim parazgjedhor. Ashtu si në rastet e destabilizimit të supozuar, përpjekjes për ryshfet nga kompanitë e huaja dhe një sërë historish të tjera të sajuara që përfunduan pa asnjë provë dhe pa një zgjidhje”.

Ndërkaq nga VMRO-DPMNE sot kanë deklaruar se LSDM ka përgjuar kryeministrin Hristijan Mickoskin, gazetarët dhe biznesmenët për të qëndruar në pushtet, duke i përdorur shërbimet për qëllime partiake. Deputeti i kësaj partie Brane Petrushevski tha se Mickoski, si kryetar i partisë më të madhe opozitare në atë kohë, u monitorua për pesë vite. Ai kërkoi nga prokuroria hetim gjithpërfshirës.

BRANE PETRUSHEVSKI, DEPUTET I VMRO-DPMNE-SË

“Është tragjedi se si LSDM-ja I keqpërdori shërbimet, të cilat në vend që t’i shërbenin shtetit, sigurisë dhe inteligjencës së tij u përdorën për të mbajtur në pushtet Zaevin, Filipçen dhe klikën e ngushtë rreth tyre. Për të gjitha këto, ata u ndihmuan nga kryeprokurori aktual Kocevski, i cili ishte përgjegjës për monitorimin e lëshimit të masave të veçanta hetuese. Kocevski është hallka kryesore në zinxhirin e LSDM-së për monitorimin dhe përgjimin e Mickoskit, gazetarëve dhe biznesmenëve”.

Prokuroria Themelore Publike ditën e djeshme ka hapur lëndë për sa i përket rastit për dyshimet e ngritura nga drejtori aktual i ASK-së Bojan Hristovski dhe kryeministri Hristijan Mickoski për përgjime të paligjshme ndaj Mickoskit./SHENJA/

Kandidati për kryetar të Komunës së Sarajit nga Besëlidhja Aleanca Kombëtare për Integrim, Blerant Ramadani, në një intervistë për PressOnline.al, ka paralajmëruar prezantimin e një aplikacioni të ri inovativ me emrin “Komuna Jonë”, i cili do të vihet në funksion sapo të nisë fushata zgjedhore.

Sipas Ramadanit, aplikacioni do t’u mundësojë qytetarëve qasje 24/7 për të raportuar probleme, për të dhënë propozime dhe për të komunikuar drejtpërdrejt me komunën. Ai ka theksuar se do të krijohet një ekip i posaçëm, i cili brenda 24 orëve do të përgjigjet ndaj çdo kërkese apo raportimi të qytetarëve.

“Komuna jonë do të jetë e hapur dhe transparente. Çdo tender, çdo njoftim dhe çdo projekt do të ndahet me opinionin e gjerë dhe me bashkëqytetarët tanë të Sarajit. Ne udhëheqjen nuk e shohim vetëm si pushtet, por edhe si shërbim ndaj qytetarëve”, ka deklaruar Ramadanit.

Ai ka shtuar se qytetarët do të kenë rol aktiv edhe në vendimmarrje për projektet madhore. “Për çdo iniciativë të rëndësishme do të kërkojmë edhe miratimin e qytetarëve, që ata të kyçen në përkrahje ose në votim nëse projekti duhet të realizohet apo jo”, ka përfunduar Ramadanit, duke theksuar se ky model do të forcojë bashkëpunimin mes komunës dhe qytetarëve të Sarajit. (PressOnline.al)