Në ditën e parë të vitit shkollor 2025/26 asnjë nxënës nga fshati Bozofcë i Malësisë së Tetovës nuk filloi në klasën e parë. Portalb.mk vizitoi shkollën sot paradite rreth orës 11, por ajo ishte e mbyllur.

Numri total i nxënësve në këtë shkollë sipas banorëve është rreth 10.

Ky fshat dikur numëronte mbi 1400 banorë me rreth 160 shtëpi, por është boshatisur dita ditës, tani aty janë vetëm rreth 20 shtëpi të banueshme.

Banorët ankohen për mungesën e përkujdesjes nga institucionet.

Zemri Vejseli, banor i Bozofcës tha se fshati është zbrazur për shkak të kushteve.

“Te shkolla sivjet nuk kemi nxënës për klasën e parë, janë nja 8 nxënës sa që di. Duhet të investojnë duhet që të bëhet diçka që të kthehen familjet”, tha Vejseli.

Ai shtoi se arsimi në këtë fshat ka rënë dhe gjeneratat e reja nuk po e marrin edukimin adekuat.

“Nuk janë adekuatë arsimtarët për lëndën e vetë, ke studiuar gjuhën shqipe dhe jep gjuhën maqedonase. Kjo është problem për ne, nxënësit tanë kur shkojnë poshtë në Tetovë na thonë shpesh arsimtarët se po na duken si me qenë analfabeta. Kemi reaguar disa herë nëpër institucione, por nuk kemi arritur sukses”, tha Vejseli.

Banorët e Bozofcës pohohjnë se gjendja është e ngjashme edhe një fshat më poshtë, në Veshallë ku shkolla është e mbyllur.

Sipas Nazmi Dautit, nga Sektori për Veprimtari Publike në Komunën e Tetovës, trendi i regjistrimit të nxënësve është po i njëjti në krahasim me vitin e kaluar shkollor.

Këtë vit në shkollat fillore të Tetovës janë regjistruar 940 nxënës, numër afërsisht i njëjtë është edhe në shkollat e mesme.

“Në shkollat fillore janë regjistruar 778 nxënës shqiptarë, 144 nxënës maqedonas dhe 15 nxënës turq”, tha Dauti.

Ndërkaq me këto numra krenohet kryetari i Komunës së Tetovës, Bilall Kasami.

”Këtë vit për herë të parë nuk kemi rënie të numrit të nxënësve as në shkollat fillore as në shkollat e mesme”, tha Kasami.

Statistikat tregojnë se që nga viti 2015 e këndej, numri i nxënësve në Maqedoninë e Veriut është zvogëluar për mbi 28 mijë.

Ndërkaq në pesë vitet e fundit, 30 shkolla janë mbyllur në mbarë vendin.

Ndryshe, sot në mbarë vendin filloi viti i ri shkollor për 245.000 nxënës të shkollave fillore dhe të mesme, i cili do të zgjasë deri më 10 qershor2026.

Nga këta, 177.800 janë nxënës të shkollave fillore dhe 67,200 janë nxënës të shkollave të mesme.

Sipas të dhënave nga Ministria e Arsimit, rreth 17 mijë nxënës kanë filluar klasën e parë dhe rreth 17 mijë të tjerë vitin e parë në shkollë të mesme.

Reagim nga Aleanca për Shqiptarët:

Aleanca për Shqiptarët shpreh shqetësim të thellë dhe indinjatë për faktin se, pavarësisht premtimeve publike nga përfaqësues të grupacionit VLEN, nxënësit shqiptarë të fshatit Nerovë në Komunën e Krushevës nuk e kanë nisur vitin e ri shkollor në objektin e ri shkollor, por janë detyruar të vazhdojnë mësimin në godinën e vjetër, e cila prej kohësh është e papërshtatshme dhe e rrezikshme për zhvillimin normal të procesit mësimor.

Kjo është edhe një dëshmi tjetër e dështimeve të njëpasnjëshme të VLEN-it, i cili, në vend që të punojë për zgjidhjen reale të problemeve jetike të qytetarëve shqiptarë, vazhdon të bëjë politikë me premtime të pambajtura dhe propagandë boshe. Edhe më shqetësues është fakti se ambasadori i Republikës së Shqipërisë, Denion Meidani, u përball me sharje dhe fyerje nga eksponentë të lartë të grupacionit VLEN, vetëm pse ngriti shqetësimin për këtë çështje.

ASH kërkon llogari të qartë dhe publike nga përgjegjësit institucionalë dhe politikë për këtë skandal dhe paralajmëron se nuk do të lejojmë që fëmijët shqiptarë të trajtohen si qytetarë të dorës së dytë.

Nxënësit e Nerovës meritojnë kushte dinjitoze për mësim, jo mashtrime para kamerave.

Mjaft më me premtime boshe – është koha për veprim konkret dhe përgjegjësi!

Kandidati për kryetar të komunës së Tearcës, Nazim Taipi, ka uruar nxënësit, mësuesit dhe prindërit me rastin e fillimit të vitit të ri shkollor, njofton Top24

“Arsimi është çelësi që hap dyert e arritjeve të mëdha. Me gjithë zemër uroj që ky vit i ri shkollor të sjellë dije, suksese dhe gëzim për secilin prej jush,” – ka shkruar Taipi.

Ai theksoi se arsimi është prioritet i programit të tij dhe paralajmëroi investime të rëndësishme në infrastrukturën arsimore.

“Shumë shpejt shkollat tona do të bëhen më moderne, me kushte më të mira dhe të digjitalizuara,” – shtoi kandidati për kryetar të Tearcës.

Mesazhi i tij shoqërohet me urimin për një vit të mbarë shkollor dhe me zotimin për t’u angazhuar që nxënësit e kësaj komune të kenë kushte më cilësore në rrugën e dijes.