Organizata Albanians for America (AFA) dhe një numër organizatash të komunitetit shqiptaro-amerikan i kanë drejtuar një letër të hapur Presidentit Donald J. Trump, duke e cilësuar si “paqebërësin e shekullit” dhe duke e inkurajuar fuqimisht që të mbështesë përmbylljen e procesit të njohjes reciproke ndërmjet Kosovës dhe Serbisë.

Në letrën e firmosur nga AFA dhe organizatat bashkëpunëtore, theksohet mbështetja e plotë për thirrjet për implementimin e menjëhershëm të njohjes reciproke si zgjidhja e vetme për paqen afatgjatë në Ballkanin Perëndimor.

“Njohja reciproke nuk është thjesht një formalitet diplomatik, është rruga më efektive dhe pragmatike përpara. Zgjatja e status quo-së është destabilizuese dhe rrezikon sigurinë rajonale dhe interesat amerikane,” thuhet në letër.

Organizatat shqiptaro-amerikane i bëjnë thirrje Presidentit Trump që të:

Riafirmojë publikisht mbështetjen e SHBA-së për njohjen reciproke Kosovë–Serbi si bazë për paqe të qëndrueshme;

Inkurajojë të dy vendet të finalizojnë njohjen dhe të angazhohen për bashkëpunim, mbi bazën e normalizimit të marrëdhënieve;

Mbështesë mekanizma të fortë për zbatim të plotë dhe të përkohshëm të marrëveshjeve të arritura.

Letra përfundon me një mesazh të fuqishëm përkrahjeje për Trump, duke theksuar se komuniteti shqiptaro-amerikan është i gatshëm të mbështesë çdo përpjekje që do të sjellë përfundimisht një zgjidhje të drejtë dhe të qëndrueshme për çështjen e Kosovës.

“Faleminderit për angazhimin tuaj të vazhdueshëm për paqen përmes forcës dhe për udhëheqjen tuaj në këtë çështje të rëndësishme,” përmbyllet letra.

Ministria e Arsimit dhe Shkencës ka shpërndarë 40 projekte kërkimore për vitin 2025. Nga to, 39 shkojnë për universitetet maqedonase, vetëm 1 për Universitetin e Tetovës. Ky është diskriminim etnik dhe shkencor në formën më të pastër.

Akademia e Shkencave dhe Arteve të Maqedonisë, universitetet në Shkup, Manastir e Shtip morën nga 5–6 projekte secili. Universitetet shqiptare u lanë jashtë. Ky është modeli i diskriminimit që po zbatojnë VMRO dhe VLEN ndaj shkencës shqiptare.

Ku është Akademia Shqiptare që VLEN e proklamoi? Pse nuk figuron askund? UEJL u injorua, Universiteti “Nënë Tereza” u anashkalua, ndërsa Universitetit të Tetovës iu dha vetëm një projekt – thjesht për të mos dalë lista krejt etnikisht e pastër. Një nga dyzet projekte nuk është rastësi: është raporti 39 me 1, diskriminim i pastër.

Kjo është një shuplakë për botën akademike shqiptare pa përkrahje për universitetet tona, me zëvendësministër shqiptar që hesht e nuk ekziston në publik.

Ky nuk është rastësi. Nuk është gabim. Është politikë shtetërore e përjashtimit, që synon të fshijë kontributin shqiptar në shkencë. Është goditje për universitetet, për studiuesit dhe për çdo të ri shqiptar që ëndërron karrierë akademike në vendin e vet.

Me këtë qeveri, barazia në arsim dhe shkencë është vetëm fjalë bosh. VLEN jo vetëm që hesht, por është pjesë e këtij diskriminimi.

Ky rast le të jetë zgjim për botën akademike shqiptare. Heshtja sot është pjesë e përgjegjësië.

Aleanca për Shqiptarët

Kryeministri i Shqipërisë, Edi Rama, ka reaguar në lidhje me procesin gjyqësor që po zhvillohet në Hagë ndaj ish-presidentit të Kosovës, Hashim Thaçi, dhe bashkëluftëtarëve të tij. Në një postim në rrjetet sociale, Rama shprehu shqetësimin e tij për, siç i quajti ai, “shkeljet faktike të normës elementare demokratike të procesit të rregullt ligjor” nga ana e Tribunalit të Hagës.

Rama shtroi pyetjen pse Kuvendi i Kosovës nuk ka miratuar ende një rezolutë gjithëpërfshirëse, pa dallime politike, që të denoncojë këto shkelje dhe të kërkojë respektimin e të drejtave të të akuzuarve që ndodhen të izoluar prej vitesh.

Sipas Kryeministrit, një hap i tillë nga Kuvendi i Kosovës do të nxitonte edhe Kuvendin e Shqipërisë për të mbështetur rezolutën me të njëjtin tekst, në mënyrë që “zëri i shqiptarëve të dëgjohet në çdo shtet demokratik që e sponsorizon Tribunalin.”

Rama nënvizoi se procesi duhet të jetë i drejtë dhe transparent, dhe se nuk mund të lejohet që me kontributin financiar të taksapaguesve perëndimorë të cenohen të drejtat themelore të një procesi të rregullt ligjor.

“Po, Liria ka emër dhe nuk është fajtore,” përfundoi ai, duke ritheksuar mbështetjen e tij për ish-udhëheqësit e UÇK-së.

Edi Rama kërkon rezolutë të Kuvendit të Kosovës për shkeljet ndaj Thaçit dhe bashkëluftëtarëve të tij.