Kandidati i Besëlidhja Aleanca Kombëtare për Integrim, për kryetar të komunës së Tetovës, Bajram Rexhepi, sonte ka qëndruar në lagjen e vjetër të Tetovës, lagjja Gam-Gam, ku në bashkëbisedim me banorët u diskutua mbi problemet reale me të cilat po ballafaqohen tetovarët gjatë këtyre viteve.
Premtimi i Bajramit në këto zgjedhje është se ata po realizojnë një program konkret dhe të realizueshëm për Tetovën e Re.

Postimi i plotë i kandidatit për kryetar komune të Tetovës nga Besëlidhja AKI, Bajram Rexhepi:

Në kasabanë e vjetër të Tetovës, në lagjen Gam-Gam, sonte takuam banorët për të bashkëbiseduar rreth problemeve dhe nevojave të tyre, që do t’i bëjmë pjesë të zgjidhjeve në programin tonë zhvillimor #PërTetovënERe.

Kjo lagje ka qenë gjithmonë një vatër e rëndësishme e veprimtarisë qytetare, me figura të shquara si Dr. Xhafer Sulejmani, mjeku i parë i diplomuar dhe kryebashkiaku i parë shqiptar i Tetovës, e deri te zejtarët që kanë qenë zemra dhe shtylla artizanale e Tetovës.

Diskutuam për sfidat e përditshme, si: infrastruktura, investimet në parkun e Xhamisë së Larme dhe zgjidhjet për kaosin në komunikacion.

Një delegacion i Aleancës për Shqiptarët, i përbërë nga Dr. Arben Taravari – Kryetar i Aleancës për Shqiptarët, Valbon Limani – Kryetar i Komunës së Gostivarit, Isen Shabani – Kryetar i Komunës së Vrapçishtit, Blerant Ramadani – Kandidat për Kryetar të Komunës së Sarajit dhe Nazim Taipi – Kandidat për Kryetar të Komunës së Tearcës, po zhvillon një vizitë zyrtare në komunat dhe bashkitë juglindore të Republikës së Shqipërisë, me synim forcimin e bashkëpunimit ndërinstitucional dhe ndërkufitar.

Gjatë qëndrimit në Ersekë, delegacioni u takua me kryetarin e Bashkisë, Erion Isai.

“Në kuadër të vizitave tona në Shqipërinë juglindore patëm një takim të mirë me kryetarin e Bashkisë së Ersekës Erion Isai. Ne biseduam për mundësitë e bashkëpunimit dhe shprehëm dëshirën e përbashkët që ta nisim sa më shpejt këtë punë. Erioni na tregoi dhe muzeun e qytetit.
E falenderoj Erionin për mikpritjen që na i bëri Ersekën më të bukur”, deklaroi Taravari në njoftimin e tij.

Këshilli i Marrëdhënieve Shqiptaro-Amerikane (Albanian American Relations Council-AARC) i udhëhequr nga Martin Vulaj ka reaguar ashpër pas incidenteve të fundit me thirrje anti-shqiptare si dhe mesazhe urrejtëse e ndarëse në ndeshjet sportive në vend, duke paralajmëruar se kjo spirale urrejtjeje rrezikon të destabilizojë Maqedoninë e Veriut.

Reagimi i plotë:

Në javët e fundit, është vërejtur një rritje shqetësuese e incidenteve në ngjarjet sportive në Maqedoninë e Veriut që nxisin urrejtje dhe përçarje etnike. Në një ndeshje basketbolli mes Rumanisë dhe Maqedonisë së Veriut në Kumanovë, tifozët brohoritën slogane të tmerrshme duke thirrur për vdekjen e shqiptarëve dhe zhdukjen e tyre në dhoma gazi. Në përgjigje, disa tifozë shqiptarë në një ndeshje futbolli në Tetovë shfaqën pankarta që bënin thirrje për shkëputje.

Kjo spirale e rrezikshme duhet ndalur menjëherë. Udhëheqësit politikë nga të gjitha komunitetet duhet të veprojnë me vendosmëri për të dënuar dhe parandaluar shfaqje të tilla urrejtjeje, para se ato të destabilizojnë më tej vendin.

Brohoritjet anti-shqiptare përforcuan në mënyrë të dhimbshme perceptimin e kahershëm të shqiptarëve se trajtohen si qytetarë të dorës së dytë dhe si të huaj në atdheun e tyre. Nga ana tjetër, mesazhet për shkëputje nxiten frikë te maqedonasit sllavë për qëllimet e shqiptarëve dhe për unitetin e ardhshëm të shtetit.

Që nga nënshkrimi i Marrëveshjes Kornizë të Ohrit në vitin 2001, Maqedonia e Veriut ka bërë përparim të dukshëm drejt integrimit dhe bashkëjetesës etnike. Megjithëse sfida mbeten, shqiptarët janë zhvendosur nga margjinat drejt pjesëmarrjes aktive në institucionet politike, ekonomike dhe akademike. Ky përparim nuk duhet të prishet.

Megjithëse dënimi i qeverisë për gjuhën e urrejtjes erdhi me vonesë, ai ishte i qartë. Tani, edhe liderët shqiptarë duhet të dënojnë pa mëdyshje çdo retorikë që minon integritetin territorial të vendit.

Gjatë konfliktit, shqiptarët refuzuan ofertën për të ndarë Maqedoninë sipas vijave etnike, duke zgjedhur në vend të kësaj një të ardhme të përbashkët evropiane. Po ky parim duhet të vazhdojë të udhëheqë kombin përpara. Të gjitha palët duhet të punojnë së bashku për të eliminuar retorikën me bazë etnike dhe për të parandaluar kthimin në kapitujt e errët të së kaluarës. Vetëm përmes unitetit, respektit dhe lidershipit, Maqedonia e Veriut mund të mbetet në rrugën drejt paqes së qëndrueshme dhe integrimit evropian.