Kryetari i Komunës së Tetovës, Bilall Kasami, ka ndarë me publikun një rezultat të punës së tij gjatë qeverisjes me Tetovën. Fjala është për uljen e borxhit të Komunës për vetëm tre vjet 9 milion euro.

“Ne nuk u fshehëm pas justifikimeve, ne u përballëm me realitetin. Ulëm borxhin e komunës së bashku me institucionet e saj, çerdhe, shkolla dhe ndërmarrje. Me përkushtim dhe transparencë, e ulëm borxhin hap pas hapi, duke treguar se kur ka vullnet dhe përgjegjësi, edhe sfidat më të mëdha mund të mposhten. Tetova nuk do të jetë peng i borxheve të së kaluarës, por një qytet që ecën drejt së ardhmes”, ka shkruar kryetari i Komunës së Tetovës, Bilall Kasami.

Ai ka shtuar se kjo nuk është puna e vetme që kanë bërë, por kanë realizuar gjithashtu edhe një sërë projektesh që janë të rëndësishme për qytetarët e Tetovës.

“Puna jonë nuk mbaron këtu. Krahas uljes së borxhit, ne nuk hoqëm dorë nga investimet. Nuk pranuam që zhvillimi i qytetit të mbetej peng i krizës financiare. Ndërtuam, rinovuam dhe modernizuam – nga shkollat ku edukohen fëmijët tanë, te çerdhet ku rriten me dashuri brezat e ardhshëm. Sot, çdo investim flet qartë: Tetova është një shembull se si mund të udhëhiqet me përkushtim dhe dinjitet. Në një kohë kur të tjerët mbajnë fjalime, ne kemi zgjedhur të mbajmë premtime”, ka përfunduar Kasami.

Kryetari i Komunës së Tetovës, Bilall Kasami, sot ka vizituar çerdhen “Rinia” në Tetovë ku ka shpërdnarë dhurata për nderë të festës së Bajramit.

“Gëzimi në sytë e fëmijëve ishte mënyra më e mirë për ta filluar këtë ditë. Ishte kënaqësi që sot të isha i pranishëm në shpërndarjen e dhuratave për fëmijët e çerdhes “Rinia” Tetovë, organizuar nga shoqata humanitare “Agimi i Bamirësisë” duke u dhuruar gëzim dhe buzëqeshje të vegjëlve. Ky aktivitet u realizua me qëllim që të sjellë lumturi dhe të përcjellë mesazhin e solidaritetit, veçanërisht në këtë periudhë festive. Le të vazhdojmë të shpërndajmë mirësi dhe të bëjmë ndryshimin në jetën e të tjerëve!”, ka shkruar Kasami.

Ministri për çështje evropiane dhe negociatori me BE-në, Orhan Murtezani, sot ka prezantuar planin për rritje për Ballkanin Perëndimor dhe Agjendën Reformuese për vitin 2024–2027.

“Sot, së bashku me euroambasadorin Mihalis Rokas, prezantuam vizionin dhe angazhimin pas Planit të ri për komunikim dhe vizibilitetit – dokument që mbështet realizimin e Planit për rritje për Ballkanin Perëndimor dhe Agjendën Reformuese për vitin 2024–2027. Qëllimi ynë është i qartë: reformat është e domosdoshme të bëhen të afërta, të kuptueshme dhe të realizueshme për çdo qytetar. Ky Plan është më shumë se strategji komunikimi – ai gjithashtu është plan për besim, transparencë dhe partneritet ndërmjet institucioneve dhe qytetarëve”, ka njoftuar ministri Murtzani.

Ai tutje ka shtuar se do të krijohet një platformë e re online dhe ka shprehur mirënjohjen e tij për mbështetjen e vazhdueshme për zhvillim që vjen nga Bashkimi Evropian.

“Do të krijojmë gjithashtu edhe platformë të re online, identitet vizual të dallueshëm dhe dialogje të hapura, për të përafruar Europën deri tek secili. Jam mirënjohës për mbështetjen e vazhdueshme nga BE-ja dhe nga të gjithë ata të cilët janë të përfshirë në këtë proces”, ka përfunduar ministri Murtezani.