Aleanca për Shqiptarët, edhe njëherë shpreh shqetësim lidhur me përmbajtjen e dokumentit zyrtar të miratuar nga Komiteti për Punë të Jashtme (AFET) i Parlamentit Evropian, i cili konfirmon atë që ne kemi paralajmëruar prej muajsh: se Maqedonia e Veriut është kthyer në shënjestër të drejtpërdrejtë të operacioneve të ndikimit të huaj dashakeq, që synojnë minimin e orientimit euroatlantik dhe rrënimin e institucioneve demokratike të vendit.

Raporti thekson me shqetësim rolin e mediave tabloide serbe, që tërhiqen nga ndikimi i Kremlinit, në instrumentalizimin e narrativave kundër Bashkimit Evropian. Nënvizohet qartë rreziku që përbën projekti i ashtuquajtur “Bota Serbe”, e cila synon krijimin e një sfere të re ndikimi në Ballkan përmes aktorëve politikë të lidhur me qendrat e Beogradit, Moskës dhe Budapestit.

Edhe më alarmuese është konstatimi se disa përfaqësues të qeverisë aktuale në Shkup po mbështesin dhe promovojnë këtë projekt, duke marrë pjesë në aktivitete që minojnë stabilitetin rajonal dhe sovranitetin e shteteve fqinje. Për më tepër, në dokument vihet në pah rreziku i varësisë së shtetit ndaj huave kineze përmes kanaleve të dyshimta, përfshirë edhe huanë e fundit të marrë përmes Hungarisë, e cila në fakt përfaqëson interesa kineze.

Aleanca për Shqiptarët paralajmëron se këto nuk janë më thjesht skenare spekulative apo “teori konspirative”, siç duan t’i paraqesin përfaqësuesit e VLEN-it, por janë fakte të dokumentuara nga instanca më e lartë parlamentare e Bashkimit Evropian. Megjithatë, për habi të opinionit publik, VLEN vazhdon të mohojë realitetin, të relativizojë ndikimin serb dhe të heshtë për pjesëmarrjen e Ivan Stolkoviçit në qeveri – figurë që përfaqëson jo vetëm interesat e Beogradit, por edhe linjat strategjike të Rusisë dhe Kinës në rajon.

Si është e mundur që në kushtet kur Parlamenti Evropian kërkon hapjen e arkivave të UDBA-s dhe KOS-it, dhe shpreh shqetësim për rrjedhat jo-transparente financiare, për korrupsionin strategjik dhe kërcënimet hibride, VLEN të qëndrojë indiferente, si të mos jetë pjesë e kësaj qeverie?

Aleanca për Shqiptarët rithekson se ky dokument, i hartuar mbi bazën e raportit të eurodeputetit Thomas Waitz, i jep vulë ndërkombëtare vlerësimeve që kreu i Aleancës, Arben Taravari, ka dhënë publikisht që prej muajsh: ndikimi serb në Maqedoninë e Veriut është në kulmin e tij dhe pasqyrohet në sektorin e sigurisë, politikës dhe investimeve. Investimet e shpallura nga VMRO-DPMNE janë plotësisht të orientuara për t’i shërbyer këtij projekti hegjemonist, dhe asesi interesave të qytetarëve, veçanërisht shqiptarëve.

Nëse fjala e fundit e VLEN-it është deklarata e zëvendëskryeministrit Arben Fetai, i cili e relativizoi praninë e Ivan Stolkoviçit në qeveri, atëherë çdo shqiptar duhet të kuptojë se VLEN është bërë pjesë e lojës së rrezikshme të agjenturave të huaja, duke legjitimuar politikisht ndikimin e “Botës Serbe” në qeverisjen e shtetit.

Aleanca për Shqiptarët kërkon nga të gjitha forcat politike shqiptare, institucionet dhe shoqëria civile që të reagohet pa vonesë, të mos lejohet uzurpimi i shtetit nga interesa të huaja, dhe të mos lejohet që në emër të pushtetit të shkelet mbi interesat kombëtare dhe euroatlantike të shqiptarëve.

Është koha për vetëdijësim politik dhe qytetar. Heshtja është bashkëfajësi.

Aleanca për Shqiptarët

Kryetari i degës së Aleancës për Shqiptarët në Kumanovë, Huzeir Mustafi, ka reaguar ndaj deklaratave të disa përfaqësuesve politikë të VLEN-it që po përpiqen të distancohen nga procesi i regjistrimit të popullsisë në vitin 2021.

Në një deklaratë të publikuar në rrjetet sociale, Mustafi renditi disa fakte që, sipas tij, hedhin poshtë çdo përpjekje për të “amnestuar” veten nga përgjegjësia politike për këtë proces, i cili sot kritikohet nga të njëjtët që e mbështetën me heshtje apo me pjesëmarrje aktive.

“Regjistrimi i popullsisë në Maqedoninë e Veriut është zhvilluar nga 5 deri më 30 shtator 2021. Në atë kohë, Izet Mexhiti ishte jo vetëm deputet, por edhe nënkryetar i BDI-së dhe mbronte me krenari politikat e asaj qeverie,” theksoi Mustafi.

Ai më tej kujtoi se edhe Lëvizja Besa ishte pjesë e Qeverisë së atëhershme, përmes Ministrisë së Bujqësisë, e udhëhequr nga Arjanit Hoxha, dhe përfaqësuesve të tjerë si zëvendësministri i Arsimit Arafat Shabani.

“Pra, nuk mund të amnestoheni sot me një konferencë për media apo një postim emocional për një proces në të cilin keni qenë të përfshirë drejtëpërdrejtë,” përfundoi Mustafi.

Ky reagim vjen pas përpjekjeve të disa partive për të hedhur fajin e regjistrimit të kontestuar tek të tjerët, ndërsa të dhënat tregojnë se shumë nga ata që sot kritikojnë, dje ishin pjesë aktive e qeverisë që e zbatoi atë proces.

Aleanca për Shqiptarët ka qenë ndër të vetmet subjekte politike që ka kundërshtuar qartë dhe me zë të lartë mënyrën se si u zhvillua regjistrimi, si dhe efektet diskriminuese të tij në përfaqësimin e drejtë të shqiptarëve në institucionet shtetërore. Flaka

Aleanca për Shqiptarët me keqardhje konstaton se Ministri aktual i Shëndetësisë, z. Azir Aliu, vijon të mashtrojë opinionin publik me rikiciklime të projekteve tashmë të përfunduara nga paraardhësit e tij, në vend se të ofrojë ndonjë qasje konkrete, profesionale dhe me impakt në sektorin jetik të shëndetësisë.

Deklarata e fundit e ministrit Aliu për hapjen e 300 vendeve të reja të lira për kuadro nga radhët e specializantëve privatë është vetëm përpjekje për të marrë lavdinë e një pune që tashmë është përgatitur, inicuar dhe proceduar nga ish-ministri i Shëndetësisë dhe lideri i Aleancës për Shqiptarët, z. Arben Taravari.

Është e pakuptimtë që një ministër të sillet si zëdhënës i projekteve të paraardhësve të tij, duke mohuar kontributin e tyre dhe duke përvetësuar punën e kryer nga të tjerët.

Që nga dita e emërimit, z. Aliu më shumë është marrë me vizita protokollare e fotografo-seanca në spitale, se sa me sfidat reale që përjeton sistemi ynë shëndetësor. Nga gafa me parkingjet në hotele private për stafin mjekësor, deri te deklaratat bombastike për “digjitalizimin e sistemit”, një proces që është përmbyllur vite më parë, z. Aliu po dëshmon se është i shkëputur nga realiteti i profesionistëve të shëndetit.

I vetmi aktivitet konkret që mund t’i faturohet kabinetit të tij është punësimi i familjarëve, miqve, duke kthyer kështu Ministrinë e Shëndetësisë në një degë të nepotizmit politik dhe jo të reformës institucionale.

Aleanca për Shqiptarët thekson se shëndetësia nuk është ekuacion digjital dhe aq më pak një zyrë për marketing personal. Nëse ministri Aliu vazhdon me këtë retorikë dhe qasje deri në fund të mandatit të përkohshëm të kësaj qeverie teknike, historia do ta regjistrojë si një nga ministrat më joprofesionalë dhe më të padukshëm në funksionin që i është besuar ndonjëherë.

Shëndetësia kërkon përkushtim, transparencë dhe profesionalizëm – jo shfaqje për media, përfundojnë nga Aleanca për Shqiptarët.