Aleanca për Shqiptarët dhe unë personalisht, si ish-ministër i Shëndetësisë, shpreh shqetësim të thellë për vendimin për refuzimin e punësimit të 155 punonjësve shëndetësorë në Spitalin Klinik të Tetovës. Ky është një akt i papranueshëm dhe i dëmshëm për një nga institucionet kyçe të shëndetësisë në rajon, në një kohë kur qytetarët presin shërbim efikas dhe të barabartë.

Faktet janë të qarta:
Më 15 korrik 2025, Ministria e Financave ka kthyer përgjigje negative ndaj një kërkese zyrtare të dorëzuar më 2 korrik 2025 nga Spitali i Tetovës në Ministrinë e Shëndetësisë. Kjo kërkesë ka ardhur pikërisht në kohën kur ministrin e udhëhiqte z. Azir Aliu.

Pyetja është e thjeshtë dhe direkte:
Pse nuk është bërë asnjë përpjekje nga Ministri aktual për ta mbështetur dhe ndikuar që kjo kërkesë të miratohej?
Në vend të veprimit, kemi vetëm heshtje dhe justifikime.

Kur lashë Ministrinë, të gjitha procedurat për 300 + 300 specializantë ishin të përgatitura. Grupi i parë pothuajse ishte realizuar. Ku është grupi i dytë sot?
Çdo kërkesë e ardhur nga institucionet shëndetësore gjatë mandatit tim është trajtuar me prioritet dhe është përcjellë për miratim nga organet financiare. Çdo gjë me dokumente, çdo veprim me përgjegjësi.

Meqë përmendem publikisht, nuk do shmangem nga disa pyetje publike që i drejtohen ministrit të ashtuquajtur të “5 shtyllave” dhe “strategjisë së ChatGPT-së”:
1. Premtuat që 300 punonjës shëndetësorë do të sistemohen në Qendrën Limak nga 1 Korriku. Deri ku keni arritur? Pse jeni në vonesë?
2. Ku janë kontrollet falas për çdo 40-vjeçar që i keni premtuar me bujë?
3. Dërguat informatë në Qeveri për t’ia lënë parkingun e Qendrës Klinike në menaxhim Qytetit të Shkupit. A kishte marrëveshje? Pse u tërhoqët? Çfarë fshihet pas kësaj?
4. Bëni zhurmë për reforma në sistemin “Termini Im”, por nuk keni as kontratë mirëmbajtjeje. Si funksionon një reformë pa bazë ligjore e teknike?
5. Muri mbrojtës pranë Pediatrisë në Klinikën e Tetovës – buxheti është siguruar dhe ekziston vendim i Qeverisë. Pse nuk ndërtoni? Ky mur përbën rrezik të drejtpërdrejtë për qytetarët.

Unë këtë prononcim po e bëj pas orarit të punës, sepse ministri nuk përgjigjet në orar të punës. Më falni për vonesën.

Aleanca për Shqiptarët nuk do të heshtë kur bëhet fjalë për shëndetin dhe dinjitetin e qytetarëve tanë.
Klinika e Tetovës nuk është arenë eksperimentale politike, por institucion që ka nevojë për mbështetje të menjëhershme dhe trajtim serioz.

Përgjegjësia është individuale dhe institucionale.
Në këtë rast, ministri e ka emrin dhe mbiemrin të shkruar në dokument.

Aleanca për Shqiptarët

Deputeti i Aleancës për Shqiptarët (ASH), Halil Snopçe, ka reaguar ashpër ndaj koalicionit VLEN, duke i akuzuar për mungesë reagimi dhe guximi politik në prag të zgjedhjeve lokale dhe pas një vendimi të rëndësishëm të Gjykatës Kushtetuese.

Në një deklaratë të shpërndarë sot, Snopçe rikujtoi se kanë kaluar plot 25 ditë nga vendimi i Gjykatës Kushtetuese, i cili anuloi metodologjinë që ndante qytetarët në rezidentë dhe jorezidentë, por sipas tij, “VLEN ende nuk ka ndërmarrë asnjë hap për të reflektuar këtë vendim në vendimet qeveritare.”

“Si duket, VLENI ende po FLEN,” u shpreh Snopçe në deklaratën e tij.

Deputeti i ASH gjithashtu ngriti alarmin për mungesën e reagimit lidhur me vendimin e qeverisë për zvogëlimin e numrit të këshilltarëve komunalë, vendim që sipas tij prek më së shumti komunat shqiptare.

“Pas afërsisht dy javëve do të shpallen zgjedhjet lokale dhe VLEN ende nuk kërkon që të anulohet vendimi i qeverisë për zvogëlimin drastik të numrit të këshilltarëve”, theksoi ai.

Snopçe u bëri thirrje ministrave të VLEN që të reagojnë në mbledhjen e nesërme të qeverisë dhe të kërkojnë rikthimin e ndarjes së vjetër për numrin e këshilltarëve, duke i kujtuar se kjo kërkon vetëm “pak guxim përballë kryeministrit Mickoski”.

Aleanca për Shqiptarët ka reaguar ashpër ndaj qeverisjes së koalicionit VLEN, duke akuzuar këtë të fundit për paaftësi dhe propagandë në lidhje me punësimet në Spitalin Klinik të Tetovës dhe sektorin shëndetësor në përgjithësi.

“Propaganda nuk zgjat shumë. E vërteta gjithmonë del në shesh,” – theksohet në reagimin e Aleancës për Shqiptarët, duke shtuar se për muaj me radhë qytetarëve u është servirur një gënjeshtër e përsëritur, se kinse Arben Taravari dhe Blerant Ramadani kanë qenë pengesë për punësimet në shëndetësi.

Sipas kësaj partie, VLEN ka ndërtuar një narrativë politike për të hedhur fajin diku tjetër dhe për të fshehur mungesën e rezultateve të veta.

“Kjo narrativë u përdor me qëllim nga koalicioni VLEN për të mbuluar paaftësinë e tyre për të sjellë zgjidhje konkrete.”

VLEN në qeveri, por punësimet mungojnë

Në reagim vihet theksi se, pavarësisht se VLEN tani është pjesë e ekzekutivit dhe ka në dorë postin e ministrit të Shëndetësisë, asgjë nuk ka ndryshuar për qytetarët:

“Edhe pse kanë të gjitha mekanizmat në duar, punësimet vazhdojnë të zvarriten, premtimet mbeten në letër dhe qytetarët janë përsëri viktima të lojërave politike.”

Sipas Aleancës, rasti i Spitalit të Tetovës është prova më e qartë se problemet nuk ishin tek Taravari apo Ramadani, por tek mungesa e vullnetit politik dhe paaftësia për të qeverisur.

Koha për përgjegjësi

“Prandaj sot pyesim eksponentët e VLEN-it: ishte kjo një propagandë e paramenduar, apo thjesht një dështim i radhës në qeverisjen tuaj?” – thuhet në deklaratë.

Në fund, Aleanca për Shqiptarët thekson se nuk do të lejojë që qytetarët të mashtrohen pafundësisht:

“Koha e akuzave të rreme ka kaluar. Tani është koha për përgjegjësi dhe llogaridhënie. Dhe tetori është afër, shumë afër.”

Reagimi vjen në një periudhë me tensione të larta politike dhe pritshmëri për zgjedhje të reja lokale apo të pjesshme, ku çështje si punësimet dhe shëndetësia mbeten temat më të ndjeshme në opinion.