Deputetët e legjislaturës së nëntë do të përpiqen sot në orën 11:00 të konstituojnë Kuvendin e Kosovës, i cili ka mbetur i bllokuar edhe pas dy aktgjykimeve të Gjykatës Kushtetuese.

Partia që ka të drejtën për të propozuar kandidatin për kryetar të Kuvendit ka paraqitur deri tani tre emra: Albulena Haxhiu, Donika Gërvalla dhe Hekuran Murati. Asnjëri prej tyre nuk ka arritur të marrë shumicën e votave, duke mbledhur vetëm 57 vota pro në dy tentativat e fundit.

Edhe pse ende nuk dihet cili emër do të propozohet sot nga Lëvizja Vetëvendosje, është fakt që një kandidat nuk mund të propozohet më shumë se tri herë.

Ndërkaq, AAK-ja në seancën e fundit abstenuan në votimin për Muratin, ndryshe nga dy herët e tjera kur votuan kundër Haxhiut dhe Gërvallës.

Vetëvendosje vazhdimisht ka sulmuar partitë ish-opozitare për bllokimin e Kuvendit.
PDK-ja ka deklaruar se do ta votojë çdo deputet të VV-së që nuk ka qenë pjesë e kabinetit qeveritar të Albin Kurtit. LDK-ja, ndërkaq, është e vendosur të votojë kundër çdo kandidati të VV-së.

Ngërçi politik vazhdon të jetë shqetësues. Njohësit e politikës kërkojnë konsensus mes partive për të dalë nga kjo situatë, duke theksuar se zgjedhjet e reja nuk do të jenë zgjidhje, pasi rezultatet pritet të jenë përafërsisht të njëjta.

Argumenti i njohësve të politikës është se mungesa e institucioneve ka dëmtuar ndjeshëm qytetarët dhe ekonominë, ndërsa zgjidhja e vetme është dialogu dhe kompromisi politik.
“Shkuarja në zgjedhje të jashtëzakonshme nuk do të sjellë ndryshime dramatike. Do të kemi përsëri një ngërç tjetër pas tyre,” ka theksuar analisti Argjend Zejnaj, raporton RTKlive.

Nga ana tjetër, politikanë dhe analistë janë optimistë se Kuvendi do të konstituohet së shpejti, megjithëse as Lëvizja Vetëvendosje dhe as ish-opozita nuk kanë shumicën e nevojshme për të formuar qeverinë.

“Çdo vonesë dëmton popullin dhe institucionet. Duhet të formohen institucionet sa më parë,” ka thënë Jeton Halimi, politikan dhe analist.

Gjykata Kushtetuese ka dhënë afat deputetëve që të zgjedhin kryeparlamentarin dhe nënkryetarët deri më 18 shtator, duke shtuar presionin mbi partitë për të gjetur një zgjidhje.

Listat e pavarura në zgjedhjet lokale me mbështetje të dy nënshkrimeve shikohen si element kritik i zgjedhjeve lokale të tetorit. Profesori universitar Bashkim Selmani përshëndet pjesëmarrjen e kandidatëve të pavarur në zgjedhje por shfaq dyshimet për kërkesën e ulët të nënshkrimeve. Selmani thotë se mund të paraqiten shpërdorime.

“Në këtë rast edhe për kandidatët e pavarur, është mirë të vlerësohet një çështje dhe të ketë kandidat të pavarur, mirëpo mënyra se si e imponon qeveria është element me të cilin mund të pritet pasoja eventuale dhe shpërdorimet me të cilin do të ketë përqindje e vendimmarrjes së kandidatëve partiak. Kjo është një nga mentalitetet të cilin gjithmonë KSHZ-ja ka qenë preh e këtyre rrethanave.”, u shpreh për TVM2 profesori universitar Bashkim Selmani.

Sipas Selmanit KSHZ më shumë I kushton energji zgjedhjeve se sa zgjidhjes së problemeve të qytetarëve. Kjo rregull e re zgjedhore, sipas Selmanit krijon hapësirë për të pasur keqpërdorime gjatë votimit.

“Kjo akoma më shumë përbën hapësirë për të pasur keqpërdorime dhe kuti përsa i përket zgjedhjeve lokale. Nga ana tjetër në asnjë mënyrë nuk i kanë prioritet mënyrën dhe gjendjen e rëndë të qytetarëve duke filluar nga borxhi publik, kriza ekonomike dhe faktorë të tjerë.”, tha Selmani.

Edhe kryeministri Hristijan Mickoski ka paralajmëruar se listat mund të jenë 7 apo 8 metra të gjata me kandidatë të pavarur, por ka thënë se fotografia e qartë do të mësohet më dorëzimin e listave më 1 shtator. Kryeministri druan se më këtë rast mund të krijohej huti tek qytetarët gjatë votimit, ulje të pragut zgjedhor madje edhe dështim të zgjedhjeve. Nëse vijon që procesi të dalë I pasuksesshëm, Mickoski ka paralajmëruar ndërhyrje qeveritare. Trazimi i ujrave parazgjedhore erdhi pas vendimit të KSHZ-së që kandidaturat e pavarura të mbështeten me dy nënshkrime, pasi vendimi paraprak parashikonte mbështetje prej 1% të mbështetësve nga numri I përgjithshëm I votuesve në zonën e caktuar.

Kryetari i Lëvizjes Populli, njëherit kandidat për kryetar të qytetit të Shkupit nga radhët e Besëlidhjes – Aleanca Kombëtare për Integrim, Skender Rexhep – Zejd, ka reaguar ashpër ndaj vendimeve dhe qasjes së qeverisë së udhëhequr nga Mickovski, duke paralajmëruar se lojërat politike nuk do të zgjasin pafundësisht.

“Tregojini Mickovskit se 19 tetori është afër. Dhe nëse kujton se kjo lojë do të zgjasë pafund, le ta mbajë mend: pas tetorit gjithmonë vjen marsi! Dje u shkel e drejta kushtetuese e mërgatës shqiptare, sot na del një tjetër ‘sihariq’ shovinist nga kuzhina e VMRO-së. Por, kriminaliteti i qeverisë monoetnike dhe antieuropiane nuk fshihet pas flamurit të nacionalizmit bosh,” ka shkruar Zejdi.

Ai shtoi se legjitimitetin për të qenë pjesë e qeverisë nuk e përcaktojnë konceptet shoviniste, por vullneti i popullit shqiptar. “Dielli nuk mbulohet me shoshë,” theksoi Zejdi. /Flaka Media/