Në kuadër të angazhimeve të vazhdueshme për përmirësimin e kushteve për fëmijët dhe familjet, Komuna e Gostivarit ka vendosur një kënd të ri lojërash në oborrin e Shkollës Fillore “Liria” në fshatin Raven.

Ky investim është pjesë e një projekti më të gjerë që parasheh ndërtimin e gjithsej 16 këndeve lojërash në të gjitha vendbanimet e komunës.

Kryetari i komunës, Valbon Limani theksoi se se investimet të tilla janë dëshmi e përkushtimit të pushtetit lokal ndaj mirëqenies së fëmijëve dhe zhvillimit të një ambienti të shëndetshëm për ta.

“Në oborrin e Sh.F. “Liria” në Raven vendosëm një kënd të ri lojërash, pjesë e projektit tonë me gjithsej 16 kënde lojërash që do të vendosen në të gjitha vendbanimet e komunës. Ta gëzojnë fëmijët tanë”, shprehet Limani.

Ndryshe, projekti i këndeve të lojërave synon jo vetëm krijimin e hapësirave argëtuese dhe edukative për fëmijët, por edhe nxitjen e aktiviteteve në natyrë, zhvillimin social dhe fizik të tyre, si dhe rritjen e cilësisë së jetës në komunitet.

Sa herë që kryeministri gjendet në një situatë ku nuk mund të menaxhojë dhe nuk mund të gjejë zgjidhje për problemin, dikush tjetër është fajtor, tha kryetari i LSDM-së, Venko Filipçe, në lidhje me zjarret në deponitë në rajonin e Shkupit dhe mënyrën se si Qeveria po e menaxhon të gjithë situatën.

“Në 15 muajt e fundit, fillimisht kishte mbikëqyrje me dronë, kishte përpjekje për destabilizim, pastaj sulme hibride, dhe tani po ndodh diçka e organizuar nga qendra të ndryshme të huaja të pushtetit. Mendoj se asnjë kryeministër nuk ka guxuar ta keqpërëdorë situatën në aspektin e sigurisë në këtë mënyrë, as të keqpërdor instrumentet e sigurisë në vend. Nuk kemi parë asnjë zgjidhje të vetme për asnjë problem nga kjo qeveri”, thotë Filipçe.

Ai shtoi se nëse është ashtu siç thotë kryeministri për situatën aktuale me zjarret në deponi dhe nëse jemi vërtet nën sulm, kërcënim, disa sulme hibride ose disa qendra të huaja pushteti, atëherë, sipas mendimit të tij, Këshilli i Sigurisë duhej të ishte mbledhur i pari dhe në terren të dalë Armata.

“Duhej në terrren dhe në opinion të dilte ministri i Mbrojtjes. Të gjitha shërbimet e sigurisë në vend duhej të aktivizoheshin, NATO duhej të njoftohej, si partneri ynë strategjik. Asgjë nga kjo nuk po ndodh, e gjithë kjo që po bën kryeministri është në fakt një piar dramë , nuk ka asnjë veprim për të zgjidhur problemet dhe kjo është vërtet provë e një udhëheqjeje amatore të vendit. Në praktikë, ky ekip nuk ka kapacitet për ta udhëhequr vendin siç duhet”, tha Filipçe.

I pyetur se cilat janë propozimet dhe zgjidhjet e tij, si lider i opozitës, Filipçe u përgjigj se së pari duhet të bëhet një analizë e asaj që VMRO-DPMNE dhe partnerët e koalicionit ua premtuan qytetarëve katër vjet më parë, pastaj duhet të bëhet një analizë e të gjitha deponive, nëse ato funksionojnë ligjërisht, nëse kanë licenca dhe nëse të gjitha janë të vendosura në një distancë të përshtatshme nga zonat e banuara dhe nga vendet ku importohen mbeturinat në vend.

Aleanca Kombëtare për Integrim (AKI) ngre alarmin për një skandal të nivelit më të lartë, i cili rrezikon sigurinë energjetike të shtetit dhe e vendos Maqedoninë në duart e projektit të ashtuquajtur “bota serbe”. Drejtori i MEPSO-s, Burim Latifi, kushëriri i parë i kandidatit të VLEN-it për Çair, Izet Mexhiti, ka nënshkruar kontrata me kompani serbe për projekte me rëndësi strategjike.

“Ne kemi fakte se funksionarët e VLEN-it jo vetëm që heshtin përballë projektit të ashtuquajtur bota serbe, por e mbështesin atë aktivisht dhe këtë e bëjnë përmes tenderëve publikë”, deklaroi zëdhënësi i AKI-t, Fitim Kakruki.

Më 21 gusht, drejtori i MEPSO-s, Burim Latifi, ka nënshkruar një kontratë me kompaninë “IMP-Telekomunikacije DOO Beograd” për furnizimin dhe instalimin e pajisjeve të telekomunikacionit për telembrojtjen e linjës elektroenergjetike midis Shtipit dhe Vranjës. Kjo linjë është kyçe për stabilitetin energjetik të shtetit dhe çdo ndërhyrje mbi të ka pasoja serioze strategjike.

Vetëm një muaj më parë, në korrik, Latifi ka nënshkruar edhe një kontratë tjetër, në vlerë prej rreth 150 mijë eurosh, me kompaninë serbe “Siemens DOO Beograd” për mirëmbajtje softuerike.

“Bëhet fjalë për një kërcënim të drejtpërdrejtë ndaj sigurisë kombëtare. Me këto kontrata, Beogradi fiton qasje në sistemet prej të cilave varet siguria energjetike e Maqedonisë. Kush e ka lejuar këtë dhe me çfarë qëllimi”, pyeti Kakruki.

AKI kërkon nga Qeveria, Komisioni Shtetëror për Parandalimin e Korrupsionit dhe institucionet e sigurisë që menjëherë të hapin procedurë për hetimin e kontratave të MEPSO-s me kompanitë serbe dhe të përcaktojnë nëse ka konflikt interesi dhe ndikim politik nga Izet Mexhiti dhe koalicioni VLEN.

“Në Maqedoni ka dhjetëra kompani, si shqiptare ashtu edhe maqedonase, që mund ta kryejnë këtë punë, por Latifi zgjedh firma nga Beogradi. Kjo nuk është rastësi, kjo është dëshmi e qartë e një agjende partiake dhe familjare”, theksoi zëdhënësi i AKI-t.

Aleanca Kombëtare për Integrim porosit se nuk do të lejojë që interesat personale të VLEN-it dhe lidhjet familjare të Izet Mexhitit ta sakrifikojnë shtetin dhe ta vendosin në shërbim të ndikimeve të huaja.

“Qytetarët e Çairit dhe të gjithë Maqedonisë duhet të pyesin veten nëse duan që siguria e tyre energjetike të lihet në duart e kompanive serbe për shkak të lidhjeve familjare. Ne nuk do të heshtim, do të mbrojmë interesin kombëtar dhe të ardhmen evropiane të shtetit”, përfundoi Kakruki.