Kandidati i AKI-së për kryetar të Sarajit, Blerant Ramadani, po vazhdon takimet me qytetarët, duke theksuar vizionin e tij për dinjitet, zhvillim dhe projekte konkrete që do ta transformojnë komunën.

„Bashkë me shefin e shtabit Senehat Murtezani dhe ish-deputetin Arben Ziberin, ishim në Llaskarc!
Fitorja po merr jehonë çdo ditë e më shumë.
Qytetarët po e kuptojnë qartë vizionin tonë për dinjitet dhe zhvillim, për një Saraj që ngrihet mbi projekte konkrete dhe rezultate të matshme.
Saraji i ri po ndërtohet bashkë me ju!”, u shpreh Ramadani.

Nga Ermal Peçi

Në një terren ku politika shqiptare në Maqedoninë e Veriut ka lëvizur prej dekadash mes mbijetesës dhe pazareve, mes idealizmit të shpërndarë dhe zhgënjimit të organizuar, kandidatura e Blerant Ramadanit për Komunën e Sarajit nuk është thjesht një lajm lokal. Është një sinjal. Një shenjë se ndryshimi nuk është më një klishe, por një nevojë që po gjen përfaqësuesin e vet.

Në një vend ku shqiptarët përbëjnë një shtyllë të pandashme të rendit shtetëror, por shpesh janë ndjerë si të përjashtuar nga institucionet e tij, çdo figurë që sfidon status quo-në përfaqëson më shumë se një emër të ri në garë – përfaqëson një horizont të ri politik.

Blerant Ramadani nuk hyn në këtë betejë si një “herë tjetër” që i shtohet listës së gjatë të kandidatëve. Ai hyn me një stil të ndryshëm, me një etikë të re politike dhe mbi të gjitha, me një angazhim real në terren. I largët nga retorika e zbrazët që ka lodhur çdo brez votuesish, Ramadani është më pranë qytetarit fizikisht se sa virtualisht nëpërmjet afisheve. Ai nuk flet nga lart, nuk flet nga “gjendja e partisë”, por nga gjendja reale e qyteteve, rrugëve, shërbimeve dhe jetëve.

Kjo mënyrë e të bërit politikë nuk është thjesht stil. Është substancë. Është ajo që i ka munguar politikës shqiptare në Maqedoninë e Veriut për një kohë të gjatë. Ndërsa shumë prej përfaqësuesve tanë janë shndërruar në noterë të marrëveshjeve nën tavolinë dhe simbolikë të një përfaqësimi të zbrazur nga përmbajtja, Ramadani vjen si përfaqësim substancial – jo vetëm i një brezi të ri, por i një kulture të re politike.

Saraji, si një komunë me identitet të fortë shqiptar dhe sfida të mëdha administrative, mund të shndërrohet në laboratorin ku eksperimentohen modelet e reja të qeverisjes vendore. Kjo është arsyeja pse kandidatura e Ramadanit ka peshë përtej kufijve të komunës. Ajo është provë se është e mundur të bësh politikë ndryshe, me përulësi, vizion dhe mbi të gjitha me integritet.

Në sfondin e tensionuar të një shteti që ende lufton me konsolidimin e barazisë mes komuniteteve, ku shqiptarët ende nuk e kanë përjetuar në thelb përfshirjen si qytetarë të barabartë, Ramadani përfaqëson një përpjekje për të rikthyer politikën aty ku duhet të jetë: në shërbim të njerëzve.

Nuk është thjesht një garë për një komunë. Është një duel mes dy modelesh: një politike që ka dështuar në përfaqësim dhe një politike që synon të rilindë përmes besimit, përkushtimit dhe transparencës. Në këtë duel, Blerant Ramadani nuk premton mrekulli, por ofron atë që është më e nevojshme sot: seriozitet dhe besueshmëri.

Nëse ka një mësim që vjen nga kjo kandidaturë, është se shqiptarët në Maqedoninë e Veriut nuk kanë mungesë idesh apo kuadrosh, kanë pasur mungesë vullneti për të zgjedhur ndryshe. Ramadani është një mundësi reale për ta thyer këtë cikël. Për të kthyer politikën nga një fushë e zhgënjimit, në një hapësirë shprese.

Sepse në fund, politika nuk matet me fjalime as me bilbila partie, por me ndikim real në jetën e njerëzve. Dhe në këtë aspekt, Blerant Ramadani ka nisur të lërë gjurmë, jo si një tjetër politikan në listë, por si një qytetar i angazhuar që beson se përmes punës dhe bashkëpunimit, çdo ndryshim është i mundur./Faktor.al

Bujar Osmani reagoi ashpër ndaj valës së re të akuzave të rreme se BDI gjoja ka ndonjë koalicion me Levicën, duke i vlerësuar këto konstrukte si përpjekje të dëshpëruara të VLEN-it për ta zbutur goditjen nga humbja zgjedhore që po afron.

“VLEN po fillojnë ta përgatisin mbrojtjen për një humbje të mundshme. Kjo është aftësia e tyre dhe ky është qëllimi i tyre,” deklaroi kandidati për kryetar të Çairit, Bujar Osmani. “Përkundër këtyre shpifjeve, ata duan të kenë kapacitet që pas nëntorit t’u shpjegojnë njerëzve të tyre, opinionit, pse rezultati është ashtu siç është. Nuk do të ketë tjetër,” tha Osmani.

BDI dhe partnerët e saj paraqiten të bashkuar përmes Aleancës Kombëtare për Integrim, bashkimi më i madh politik shqiptar në 20 vitet e fundit. Ky koalicion, sipas Osmanit, e përfaqëson vullnetin e shumicës dërrmuese të shqiptarëve në vend:

“Ne kemi një aleancë, Aleancën Kombëtare për Integrim, bashkimi më i madh në 20 vitet e fundit. Partitë më të mëdha politike, të cilat vetëm në zgjedhjet e fundit së bashku morën rreth 80-90% të trupit elektoral shqiptar. Dhe kjo nuk ndodhi rastësisht, kjo është bërë sepse njerëzit kuptuan se zgjedhjet e ardhshme të 19 tetorit janë referendum,” tha Osmani.

Në fokus të këtyre zgjedhjeve, sipas Osmanit, nuk është vetëm zgjedhja e individëve por përplasja mes dy koncepteve – dinjiteti i shqiptarëve kundrejt nënshtrimit të tyre.

“19 tetori është 13 gushti i dytë, ku njerëzit do të vendosin mes dy koncepteve, jo vetëm mes individëve: a do të vazhdojmë të jemi zotër në shtëpinë tonë apo do të jemi shërbëtorë, të cilëve u diktohen politikat nga të tjerët,” tha ai.

Ai tha se votuesit e VMRO-DPMNE-së nuk do të mbështesin kandidatët e VLEN-it, duke thënë se kjo e ofendon pjekurinë politike të qytetarëve, veçanërisht të votuesve maqedonas.

“Më vjen keq që flitet në çdo tryezë nga oponentët politikë: ‘mos u shqetësoni, ne nga VMRO do të jemi përkrahja’. Së pari, kjo nuk është politikë që i bën ata dinjitozë. Unë çdo ditë jam në komunikim me qytetarët maqedonas, sepse shkoj derë më derë. Dhe ata kërkojnë zgjidhje pikërisht për këto tema për të cilat fola sot – papastërtinë, ndërtimet pa leje dhe korrupsionin. Ata thonë se dora e tyre kurrë nuk do të votojë për njerëzit që e shkatërruan komunën,” tha Osmani.

Në fund, Osmani paralajmëroi se BDI do të mbetet në rrugën e një fushate pozitive dhe programore:

“Ne do të vazhdojmë sërish të ofrojmë zgjidhje, do të vazhdojmë fushatën ta udhëheqim si garë idesh, jo si akuza dhe shpifje të pavërteta. Qytetarët do të vendosin dhe do të vlerësojnë kush si ka punuar dhe kujt i besojnë më shumë.”