Aktivistja Nafie Selmani ka reaguar pas publikimit të një ankete të fundit, të cilën e cilëson si të porositur dhe të fabrikuar për interesa politike.

“Anketa e fundit, e cila u publikua sot në media dhe që edhe nga një kilometër shihej se ishte e kurdisur, pati të paktën një të mirë: shkaktoi humor në masë! Në vend që të formësonte opinionin publik, ajo u bë objekt talljeje dhe ironie mes qytetarëve”, u shpreh Selmani.

Ajo theksoi se sondazhet e tilla nuk kanë ndikim real mbi qytetarët.

“Anketat e porositura për të favorizuar ndonjë parti nuk e ndryshojnë realitetin, nuk e zëvendësojnë dot zhgënjimin me gëzim, e aq më pak mund ta fshijnë mashtrimin politik. Ato janë thjesht mjete propagandistike, të destinuara të shërbejnë si armë morale për militantët, por jo si pasqyrë e vullnetit të qytetarëve”, tha Selmani.

Sipas saj, shembulli më absurd ishte barazimi i Alternativës/VLEN me Aleancën për Shqiptarët.

“Një gjykim neutral thotë se kjo anketë ishte bërë e porositur më shumë kundër Taravarit sesa që reflektonte disponimin real politik të qytetarëve!”, shtoi Selmani.

Ajo e quajti fryrjen e anketave sipas interesave politike “fyerje të inteligjencës së qytetarëve”.

“Është përpjekje për të imponuar një realitet të rremë, i cili bie poshtë sapo përballet me votën dhe gjykimin e lirë të njerëzve”, theksoi Selmani.

Në fund, Selmani paralajmëroi VLEN-in për pasojat e mbështetjes në sondazhe të fabrikuara.

“VLEN-i duhet ta dijë se sa më shumë të mbështetet në anketa të kurdisura për të ndërtuar mitin e forcës së saj, aq më e madhe do të jetë përplasja me realitetin e hidhur dhe dëshpërimi që do ta presë më 19 tetor, kur fjalën e fundit do ta thonë qytetarët, jo sondazhet e anketat e kurdisura sipas qejfit të tyre”, deklaroi Selmani.

Shoqëria Kulturore Artistike “Jahi Hasani” nga Çegrani i Gostivarit rrëmbeu vendin e parë në edicionin e 18-të të festivalit “Lojëra Popullore Fest” në Bashkinë Malësi e Madhe Shkodër. Energjia e grupit, harmonia e koreografisë dhe autenticiteti i lojërave të prezantuara i dhanë shfaqjes një karakter të veçantë, duke treguar se tradita jo vetëm ruhet, por edhe përcillet me krenari tek brezat e rinj, shkruan Portalb.mk.

Në skenën e edicionit të 18-të të festivalit “Lojëra Popullore Fest” në Malësinë e Madhe, artistët e Shoqërisë Kulturore Artistike “Jahi Hasani” nga Çegrani i Gostivarit u prezantuan me një paraqitje të fuqishme, që ndërthurte artin, traditën dhe emocionin kolektiv. Të veshur me kostume tradicionale shumëngjyrëshe, të qëndisura me motive autoktone shqiptare, ata sollën para publikut bukurinë e zakoneve dhe lojërave popullore të trashëguara brez pas brezi.

Ky prezantim i denjë dhe i paharrueshëm ishte arsyeja pse juria vendosi t’i shpërblejë me çmimin e parë, duke e kurorëzuar Shoqërinë “Jahi Hasani” si fituese të këtij edicioni të festivalit.

Festivali “Lojëra Popullore Fest” synon të promovojë dhe të ruajë traditat e vyera të trashëgimisë kulturore të kësaj treve, përmes lojërave popullore që kanë qenë pjesë e jetës së përditshme të brezave ndër vite.

Në këtë festival u përfaqësuan grupet artistike të të rinjve nga bashkia Malësi e Madhe, që performuan lojëra popullore të zonës si dhe këngë e valle tradicionale popullore. Qëllimi i festivalit është të krijojë ura lidhëse mes brezave, duke i afruar të rinjtë me rrënjët e kulturës së tyre dhe duke sjellë përpara publikut lojërat tradicionale që mbajnë gjallë shpirtin e trashëgimisë sonë.

Aktiviteti u zhvillua në një atmosferë festive, me pjesëmarrje të gjerë të komunitetit lokal, të ftuarve dhe dashamirësve të kulturës popullore, duke ofruar një përjetim të veçantë, plot ngjyra, emocion dhe energji pozitive.

Ky aktivitet u mbështetet nga bashkia Malësi e Madhe, duke e shndërruar këtë festë në një mundësi të mrekullueshme për komunitetin që të bashkohet, të argëtohet dhe të rikujtojë vlerat e identitetit tonë kulturor.

Fushata 20-ditore për Zgjedhjet Lokale të vitit 2025, të cilat do të mbahen më 19 tetor (raundi i dytë më 2 nëntor), fillon sot në mesnatë.
Zgjedhjet lokale të 19 tetorit të këtij viti do të jenë të tetat që nga pavarësia e vendit, dhe të katërtat në të cilat zgjidhen kryetarë komunash dhe lista këshilltarësh në 80 komuna dhe Qytetin e Shkupit. Në Zgjedhjet Lokale të vitit 2025, ka gjithsej 309 kandidatë për kryetar komunash dhe 576 lista kandidatësh për anëtarë të këshillave komunale me gjithsej 10,490 kandidatë.

Komisioni Shtetëror i Zgjedhjeve përmbylli Listën e Votuesve në një seancë të premten, e cila përfshin gjithsej 1,832,415 votues.

Kryetari i KSHZ-së, Boris Kondarko, informoi se sipas të dhënave të autoriteteve kompetente, të drejtë vote kanë gjithsej 112,000 votues që punojnë ose banojnë përkohësisht jashtë vendit, 2,162 votues që vuajnë dënimin me burg ose janë në paraburgim dhe 450 votues nga azilet e pleqve.

Inspektimi i listës së votuesve zgjati 20 ditë, gjatë të cilave qytetarët me të drejtë vote mund të kontrollonin të dhënat e tyre dhe të kërkonin korrigjime.

Në vend janë identifikuar 3,480 qendra votimi, nga të cilat 132 qendra votimi kanë më pak se dhjetë votues të nënshkruar, në të cilat votimi do të zhvillohet në qendrën më të afërt të votimit.