Edhe pse ka kaluar kohë nga hapja e rastit pas raportimit të Portalb.mk, Komisioni Shtetëror për Parandalimin e Korrupsionit ende nuk ka marrë vendim për pagesat e Komunës së Çairit ndaj kafiterisë “1Sh”, që është në pronësi të zëvendësministres së Transportit, Kaltrina Zekolli Shaqiri.

Ndonëse nga KSHPK-ja në korrik njoftoi se kanë hapur lëndë për këtë rast, ende nuk ka vendim.

“Procedurat mbi rastin janë duke vazhduar. Pas përcaktimit të gjendjes faktike në rastin konkret, do të merret vendim në seancë publike të KSHPK-së”, thanë për Portalb.mk nga KSHPK.

Ata nuk treguan se kur pritet të merret vendimi.

Kujtojmë që Portalb.mk në qershor 2025 zbuloi se mijëra euro nga Komuna e Çairit i janë ndarë në mënyrë sistematike kafiterisë ‘1sh’ në pronësi të zëvendësministres së Transportit dhe ndër njerëzve më të afërm të Izet Mexhitit, Kaltrina Zekolli Shaqirit.

Mjetet janë ndarë pa shpallje publike dhe me marrëveshje sy-më-sy.

Afër 9 mijë euro i janë lëshuar kësaj kafiterie që kur Zekolli-Shaqiri është zëvendësministre, për më pak se 1 vit.

Fqinjët e intervistuar nga Portalb-i thanë se kafiteria më së shpeshti frekuentohet nga aktivistë të Lëvizjes Demokratike.

Komuna e Çairit s’i komentoi transaksionet e vjetra, thotë se në vitin 2025 aty janë ushqyer sportistët e Çairit kur kanë pasur gara, gjithashtu nuk përgjigjet se pse vetëm ky lokal ndër vite kryen këtë ‘shërbim’ për ata, pa ju dhënë mundësi bizneseve tjera.

Zëvendësministrja theksoi se është vetëm pronare dhe se nuk merret me pjesën e pagesave.

Për këtë rast më pas reaguan edhe partitë politike.

Dr Asaf Abduramani do të jetë bartës liste nnga AKI-ja në Tetovë. Kandidati i AKi-së për kryetar të Tetovës, Bajram Rexhepi ka shkruar se bashkë me Asafin do të bëjnë ndryshimin e madh të Tetovës.

“Një emër i dëshmuar në mjekësi, me një karrierë të pasur akademike dhe profesionale. Ka përfunduar studimet në Akademinë Ushtarake të Mjekësisë – GATA Ankara, ku ka kryer edhe specializimin në Radiologji. Përvojën e tij e ka ndërtuar si mjek dhe radiolog në shumë institucione brenda dhe jashtë vendit – nga Spitali Ushtarak në Shkup, misioni në EUFOR Sarajevë, Qendra Ushtarake Mjekësore në Shkup, deri tek puna si Drejtor i Përgjithshëm i Fondit të Sigurimit Shëndetësor dhe sot si radiolog në Spitalin Klinik “Acibadem Sistina”.
Profesionalizmin e tij e ka përforcuar me trajnime dhe kongrese ndërkombëtare në Turqi, Greqi dhe rajon, duke sjellë dije të avancuara në rezonancën magnetike dhe imazherinë diagnostike. Është anëtar aktiv i shoqatave prestigjioze të radiologjisë në Turqi, Maqedoni dhe Evropë, duke mbajtur gjithmonë hapin me zhvillimet më të reja në këtë fushë. Mbi të gjitha Asafi është nje djalë i Tetovës që e do qytetin e tij.

Ky është profili i ekipit që kemi ndërtuar për Tetovën. Profesionistë të dëshmuar, të motivuar dhe me integritet të lartë. Me njerëz si Asaf Abduramani, do t’ia kthejmë dinjitetin e humbur Tetovës dhe tetovarëve.

Sepse Tetova meriton më mirë dhe më shumë, dhe #bashkë do ta bëjmë më të mirën që dijmë dhe mundemi për Tetovën!” ka shkruar Rexhepi

Nga Kosova, Shqipëria, vende të ndryshme të Evropës e nga Shtetet e Bashkuara të Amerikës, shqiptarët janë nisur për të udhëtuar drejt Holandës. Sot në qytetin holandez do të mbahet një protestë masive në afërsi të ndërtesës së Gjykatës Speciale.

Në kohën kur pritet të nis dëgjimi i dëshmitarit të parë, shqiptarët nga vende të ndryshme të botës, me mbështetjen e Organizatës së Veteranëve të Luftës së UÇK-së, do të japin mesazhin e tyre për këtë proces.

Atje, ish-presidenti i Kosovës, Hashim Thaçi, ish-kryetarët e Kuvendit, Kadri Veseli dhe Jakup Krasniqi, si dhe ish-deputeti Rexhep Selimi ndodhen në një proces të tejzgjatur gjyqësor në Dhomat e Specializuara të Kosovës.

Ata akuzohen për krime të pretenduara të luftës dhe krime kundër njerëzimit. Të gjithë janë deklaruar të pafajshëm për të gjitha akuzat që Zyra e Prokurorit të Specializuar i ka vënë mbi ta.

Katërshja e UÇK-së ndodhet në paraburgim në Hagë prej nëntorit të vitit 2020, ndërkaq gjykimi ndaj tyre ka nisur në prill 2023.

Prokuroria e ka mbyllur çështjen e saj në prill të këtij viti ndërkohë, më 15 shtator do të nisë paraqitja e provave nga ekipet mbrojtëse. /Kosovapress/