Bashkimi Demokratik për Integrim shpreh shqetësim të thellë për ngecjet evidente në procesin e negociatave për anëtarësim në Bashkimin Evropian, të cilat reflektohen qartë në raportet krahasuese të vendeve të rajonit.

Siç shihet nga të dhënat e fundit, Mali i Zi ka mbyllur disa kapituj negociues, Shqipëria është në fazë të avancuar me shumicën e kapitujve nën rishikim, ndërsa Maqedonia e Veriut, pavarësisht sakrificave dhe reformave të bëra ndër vite, vazhdon të mbetet e bllokuar pa kapituj të hapur e as të mbyllur, ka thënë nënkryetari BDI-së, Arbër Ademi, ndërsa ka shtuar se ky realitet është rezultat i politikave bllokuese, paaftësisë dhe mungesës së vullnetit të sinqertë nga qeveria aktuale, e cila as në plan nuk i ka ndryshimet kushtetuese që do të çlironin procesin eurointegrues të vendit.

“VLEN-i gënjeu para zgjedhjeve kur deklaronte se “nuk ka qeveri pa ndryshime kushtetuese”. Gënjeu përsëri kur premtoi se brenda 3 muajve, pastaj 6 muajve, e më pas edhe brenda një viti do të ndodhnin ndryshimet ose do të rishikonte pjesëmarrjen në qeveri. Me i nxjerr për dere, ata hynë për dritare në qeverinë që e ka sjellë projektin e ‘Botës Serbe’ këmbëkryq në Maqedoni”.

Kjo gjendje, siç u shpreh Ademi, e dëmton drejtpërdrejt perspektivën evropiane të vendit dhe aspiratat e qytetarëve, sidomos të rinisë që ëndërron të ardhmen e saj në familjen evropiane.

“Për më tepër, mospërparimi i vendit tonë në drejtim të anëtarësimit në BE, sjellë edhe cenim dhe mosrespektim edhe të vetë Marrëveshjes Paqësore të Ohrit. BDI kërkon përshpejtim të menjëhershëm të hapave drejt hapjes së kapitujve negociues, largim të politikave obstruktive dhe një angazhim të sinqertë e transparent në funksion të realizimit të objektivit strategjik të vendit, anëtarësimit të plotë në Bashkimin Evropian”.

BDI, u shpreh ai, do të qëndrojë gjithmonë në anën e qytetarëve dhe të së ardhmes evropiane të Maqedonisë së Veriut, si e vetmja rrugë që garanton stabilitet, siguri dhe zhvillim për të gjithë.

Një foto e përbashkët ku shihen kandidatët e AKI-së për komunat e Shkupit është publikuar sot, duke dhënë mesazh uniteti dhe bashkëpunimi në garën zgjedhore.

Në foto paraqiten kandidati i AKI-së për kryetar të Qytetit të Shkupit Zejd Rexhepi, kryetari i Sarajit Blerant Ramadani, kandidati për Çair Bujar Osmani, si dhe bartësit e listave për këshilltarë në këto komuna.

Kandidati për Saraj, Blerant Ramadani, e shoqëroi foton me mbishkrimin:
“Besëlidhja AKI është zotimi ynë i përbashkët: Saraj, Çair, Butel dhe qyteti i Shkupit, bashkë në dinjitet, bashkë në fitore.”

Kandidati për kryetar të Bogovinës, Besnik Emshiu ka ndarë lajmin e mirë se në Siniçan po instalohet rrjeti i ri i ujësjellësit, njofton Top24
“Instalimi i linjës së re në rrjetin e ujësjellsit në v.b. Siniçan, linja e re do të ketë ndikim në furnizimin me ujë të kësaj lagje.
Vazhdojmë…”, tha Emshiu.