Grupimi politik FLEN, i zhytur në konfuzion dhe i kapluar nga apatia politike, të hënën deklaroi se beteja e tyre është për mbylljen e kazinove dhe mbrojtjen e familjeve. Aleanca për Shqiptarët ua bën me dije se kjo është një betejë e humbur, sepse ligji i ri për lojërat e fatit, i përgatitur nga VMRO-DPMNE, tashmë është gati dhe shumë shpejt do të kalojë në procedurat për miratim.

FLEN, një herë tjetër, mashtron opinionin publik, duke pretenduar se po lufton industrinë e bixhozit. Në realitet, projektligji i ri vetëm sa e fuqizon dhe e zyrtarizon më tej industrinë e bixhozit dhe të lojërave të fatit online. Ky grupim vazhdon të flejë, ndërsa VMRO-DPMNE përgatit ligjet dhe ua servon si “akt të kryer” për votim.

Sipas projektligjit të ri licencat për operatorët online do të vazhdojnë të jepen për periudha 6-vjeçare, njësoj si më parë, duke konfirmuar mungesën e çdo vullneti për ndalim apo kufizim të këtij aktiviteti të dëmshëm.

Në vend të ndalimit të kësaj industrie, ligji po krijon një sistem të mbyllur dhe monopolizues, që favorizon kompani të lidhura me pushtetin dhe ngre dyshime të forta për përfitime të fshehura nga njerëz afër strukturave qeveritare.

Në vend të mbrojtjes së qytetarëve, veçanërisht të miturve dhe atyre me varësi të mundshme, shteti po merr rolin e garantuesit të një industrie me pasoja të rënda sociale.

Projektligji shkon edhe më tej, lejon forma të reja të marketingut dixhital dhe reklamave, në një kohë kur mungojnë plotësisht mekanizmat e pavarur për monitorim dhe kontroll të abuzimeve, si dhe e prezanton industrinë e bixhozit si burim për rritje të të hyrave fiskale, pa asnjë vizion për mbrojtje sociale apo shëndetësore.

Në vend që të kishte ndjekur praktikat më të mira evropiane – si ndalimi i reklamave agresive, kufizimi i aksesit për të miturit, vendosja e limiteve të shpenzimeve apo bashkëpunimi me organizata të shëndetit publik – Maqedonia e Veriut po lehtëson zhvillimin e industrisë së bixhozit në emër të dixhitalizimit dhe formalizimit.

Ky projektligj nuk është një reformë për qytetarët, por një akt politik që e shndërron varësinë nga bixhozi në burim të ardhurash për shtetin dhe të tjerë të lidhur me pushtetin.

FLEN, i paralizuar nga ethet e ditëve të para në pushtet, nuk ka as rol, as ndikim, e as zë në këtë proces. Ato që Aleanca për Shqiptarët i ka denoncuar me kohë, shumë shpejt do të konfirmohen publikisht – kur Qeveria e re ta procedojë ligjin në Kuvend për miratim.

Aleanca për Shqiptarët

Dje, në Komisionin për Financë dhe Buxhet, u refuzuan amandamentet për ndarjen e një shume simbolike prej 3 milionë denarësh për Universitetin “Nënë Tereza” – një institucion që mbart misionin kombëtar dhe arsimor për mijëra të rinj shqiptarë në Maqedoninë e Veriut. Në të njëjtën mbledhje, u miratua pa asnjë diskutim amandamenti për 5 milionë denarë për kampusin universitar “Goce Delçev”, ka shkruar deputeti i ASH-së Rijad Shaqiri në profilin e tij në Facebook.

Sipas Shaqirit kjo nuk është vetëm shpërndarje e padrejtë e fondeve publike por një mesazh se institucionet shqiptare nuk janë prioritet për këtë qeveri.

Si deputet shqiptar, ndjej zemërim dhe revoltë. Por ajo që ndjej më fort është përgjegjësia për të mos heshtur.Nuk do të jem spektator i diskriminimit të radhës ndaj arsimit shqip. Nuk kam ardhur në Kuvend për të qëndruar i qetë, por për të ngritur zërin aty ku shkelet dinjiteti i shqiptarëve. Në vend që të dorëzohemi, do të luftojmë më fort. Në vend që të hapim rrugë për t’u përulur, do të qëndrojmë më drejt për të kërkuar llogari.
Kjo padrejtësi nuk do të kalojë në heshtje, shkruan Rijad Shaqiri

Për të 47-ën herë deputetët e Kuvendit të Kosovës do të mblidhen për të vazhduar seancën për konstituimin e përbërjes së nëntë parlamentare të dalë nga zgjedhjet e 9 shkurtit.

Në seancën e 46-të, sikurse edhe në seancat paraprake, deputetët refuzuan që të votonin për një komision që do të mbikëqyrte votimin e fshehtë për zgjedhjen e kreut të ri të Kuvendit.

Lëvizja Vetëvendosje – fituese në zgjedhjet e 9 shkurtit – kërkon që për Albulena Haxhiun – të propozuar për kryeparlamentare – të votohet vetëm një herë përmes votimit të fshehtë dhe nëse nuk i siguron 61 votat e nevojshme, ajo do të tërhiqet nga gara.

Ajo nuk i ka siguruar votat e nevojshme në disa seanca radhazi që janë mbajtur me votim të hapur. Për disa parti, ajo është figurë përçarëse dhe e papranueshme.

Palët vazhdojnë të mos gjejnë një kompromis ndonëse po afrohet afati i përcaktuar nga Gjykata Kushtetuese për konstitutim të Kuvendit.

Ndonëse gjykata e ka përcaktuar 26 korrikun si afat të fundit për konstituim, ajo nuk ka ofruar më shumë hollësi se çfarë ndodh tutje nëse partitë nuk merren vesh deri atëherë.

Presidentja e Kosovës, Vjosa Osmani është takuar me përfaqësuesit e partive politike, me shpresën e gjetjes së një zgjidhjeje, mirëpo situata nuk ka ndryshuar.