Sekretari i përgjithshëm i Aleancës për Shqiptarët, Blerant Ramadani, përmes një statusi në rrjetin social Facebook ka shkruar se populli tanimë i njeh mirë figurat dhe të bëmat e “Front me dezertorë”. Sipas tij, opozita shqiptare sa më shumë që tentojnë të inskenojnë skenarë, aq më shumë po iu shtohen “non gratat”.

“Mashtrimi i radhës i të ashtuquajturit ‘Front me dezertorë’ nuk kalon! Populli i njeh mirë figurat dhe të bëmat e tyre – loja e tyre është zbuluar prej kohësh. Sa më shumë që tentojnë të inskenojnë skenare të rreme, aq më shumë po shtohen ‘non gratat’. Për pushtet nuk kanë turp as të koalicionojnë me “Levicën” në qytetin e Shkupit, një parti që deri dje e shpallnin si të papranueshme dhe të dëmshme për shqiptarët! Ne nuk do të lejojmë që lojërat e vjetra të vazhdojnë. E vërteta është e qartë dhe asnjë shpifje nuk mund ta mbulojë atë. Shkarkimet pa baza dhe manipulimet ishin mjeti i tyre për të mbajtur pushtetin, por ajo epokë ka mbaruar! Zëri i drejtësisë dhe i së vërtetës do të triumfojë mbi këtë mjegull të shpifjeve politike! Kjo është ora e fundit e mashtrimeve! Koha për përgjegjësi dhe përballje me të vërtetën çdo ditë e më shumë po afron!”, ka shkruar Blerant Ramadani.

Deputeti i koalicionit VLEN, Halil Snopçe, në seancën plenare në Kuvend ka deklaruar që Ilire Dauti nuk është shkarkuar, vazhdon të mbetet kryetare e Komisionit për Punë Sociale dhe Demografi dhe Rini. Pra, nga aty thuhet që deputetët e VLEN-it kanë votuar kundër shkarkimit të Dautit nga pozita e lartpërmendur.

“Zonja, Ilire Dauti, nuk është shkarkuar nga pozita e kryetares së Komisionit. Pra, duhet të pastrojmë këtë çështje pasi në mediat në gjuhën shqipe kishte deziniformim, pasi Ilire Dauti do të vazhdojë të ushtrojë pozitën e njëjtë. Prandaj, kjo që u plasua në media është e pavërtetë. Gjithashtu, koalicioni VLEN votoi kundër shkarkimit të Dautit”, tha deputeti Halil Snopçe.

Deputeti i koalicionit VLEN, Riad Shaqiri ka adresuar kritika të ashpra ndaj Blerim Bexhetit dhe BDI-së lidhur me interpelancat e parashtruara për zëvendëskryeministrin Izet Mexhiti. Shaqiri tha se BDI nuk ka të drejtë morale të flet për drejtësi, duke i përmendur disa raste kur shqiptarët kanë qenë të nëpërkëmbur ndërkaq BDI ka heshtur.

“Është apsurde sot të diskutohet mirëpo ja që Blerimi më inspiron kohë pas kohe për polemika. Thatë se nuk mbahet dasmë pa flamur, është fakt, por është mëkat të ndryshosh përmasat e flamurit kombëtarë, e ju pranuar të riformatoni formën e flamurit kombëtarë dhe përdorimin e tij. Folët për drejtësinë, por më së paku ju si subjekt keni të drejtë të flisni për drejtësinë. Ju nuk ishit të zëshëm kur u burgos nënë Feridja nga fshati Hotël për rastin Monstra. Nëna e vuajtur u burgos dhe askush prej jush nuk mbajti llogari për atë punë. Ju po flitni për një çështje se nuk jeni të involvuar në korrupsioni. Prokuroria po troket në dyert e juaj. Sot individ të caktuar nga hiqi kanë hidrocentrale, nga hiqi kanë qendra tregtare”, ka deklaruar deputeti i koalicionit VLEN, Riad Shaqiri.