Deputeti i Aleancës për Shqiptarët pjesë e koalicionit Beslidhja-Aleanca Kombëtare për Integrim, Rijad Shaqiri, ka reaguar ashpër pas vendosjes së flamujve serbë në Mateç, duke e cilësuar këtë si një akt të rëndë provokues dhe një përdhosje të kujtesës historike të shqiptarëve.

Shaqiri thekson se një provokim i hapur nga ana e zëvendëskryeministrit Ivan Stoiloviq, i cili me flamurin e Serbisë dhe me mbishkrime me përmbajtje provokuese tentoi ta sfidojë dhe ta provokojë Komunën e Likovës.

Deputeti Shaqiri më tej thekson se banorët e Likovës kanë treguar gjithmonë qartësisht se nuk frikësohen nga askush dhe nuk lejojnë që provokime të tilla të cenojnë dinjitetin, vlerat dhe qetësinë e tyre. Ne jemi të bashkuar dhe të vendosur të mos biem pre e asnjë provokimi.

Reagimi i plotë i Shaqirit:

“Të nderuar qytetarë dhe banorë të Komunës së Likovës,

Sot jeni dëshmitarë të një provokimi të hapur nga ana e zëvendëskryeministrit Ivan Stoiloviq, i cili me flamurin e Serbisë dhe me mbishkrime me përmbajtje provokuese tentoi ta sfidojë dhe ta provokojë Komunën e Likovës.

Ditëve të fundit po shohim se, nga paaftësia për të parandaluar proceset dhe tendencat pro-serbe, individë dhe struktura të caktuara politike shpifin e përgojojnë kundër të tjerëve. Por duhet ta dinë të gjithë se tradhti e vërtetë është të provokosh në Komunën e Likovës me aventura të tilla të pseudo-patriotëve që shërbejnë interesave të këtyre strukturave politike.

Tradhti është të sjellësh Stoiloviqin në Mateç, në një manastir që për 23 vjet nuk ka qenë objekt vizitash nga askush, e ta përdorësh këtë për qëllime politike dhe provokuese.

Banorët e Likovës kanë treguar gjithmonë qartësisht se nuk frikësohen nga askush dhe nuk lejojnë që provokime të tilla të cenojnë dinjitetin, vlerat dhe qetësinë e tyre. Ne jemi të bashkuar dhe të vendosur të mos biem pre e asnjë provokimi”, ka përfunduar Shaqiri.

Partia “Levicа” në një reagim publik shënjestron kryetarin e Tetovës, Bilall Kasami, duke e akuzuar për menaxhim të dështuar të qytetit dhe përfshirje në skema të dyshimta financiare, ndërsa akuzon VMRO-DPMNE-në se po e mbështet këtë mënyrë të qeverisjes, duke zëvendësuar “kriminelët e BDI-së me kriminelët e VLEN-it”. Sipas partisë së Dimitar Apasievit, Kasami ka ndarë tenderë në vlerë prej mbi 114 mijë eurosh për kompaninë “I-Point Marketing”, në pronësi të personave të afërt me partinë e tij. Kjo, sipas Levicës, tregon për lidhje të drejtpërdrejta mes buxhetit të Tetovës dhe financimit të subjektit politik të Kasamit.

“Kasami ka ndarë katër tenderë (në vlerë të përgjithshme prej 114.000 eurosh) për kompaninë ‘I-Point Marketing’, e cila është në pronësi të Mensur Alitit dhe Amir Alitit. Bashkëpronar i kompanisë – Mensuri, njihet si njeri i afërt me sekretarin e Besës dhe bashkëpartiak të Kasamit, Adnan Azizi. Pikërisht Ajeti ka dhuruar 3000 euro për partinë e Kasamit në vitin 2023. Kjo tregon për skema kriminale ku paratë tërhiqen nga buxheti i Tetovës, të cilat më pas përfundojnë në xhepat privatë të donatorëve dhe aktivistëve të Kasamit”, theksojnë nga Levica.

Ndërkohë që Tetova po fundoset në deponi të paligjshme, ndërtime pa leje dhe kaos urbanistik, nga partia e Apasievit akuzojnë se partneri koalicionues i Mickoskit vazhdon aty ku ka mbetur BDI-ja. “Mbështetja e Mickoskit për një mandat të ri të Kasamit konfirmon se këto parti vazhdojnë me matricën e tyre kriminale, ku mandatin e marrë nga populli e keqpërdorin për pasurim personal, ashtu siç kanë qeverisur për 35 vjet”, theksojnë nga kjo parti. Nga ana tjetër, VMRO-DPMNE, u përgjigj me akuza të drejtpërdrejta ndaj vetë Levicës dhe deputetes Jagoda Mojsoska. Sipas partisë së Mickoskit, Mojsoska dhe udhëheqësia e Levicës kanë përfituar shuma të mëdha parash nga vetë llogaria e partisë nën arsyetim të shpenzimeve për udhëtime. VMRO-DPMNE publikoi edhe data dhe shuma të përfituara, duke e cilësuar këtë si hipokrizi nga një subjekt që publikut i paraqitet si i thjeshtë dhe i pakorruptuar.

“Sipas asaj që kemi marrë nga sinjalizues brenda Levicës, Mojsoska e tregoi fytyrën e saj të vërtetë. Konkretisht, më 26.04.2024 ajo ka marrë 123.000 denarë, më 03.02.2023 ka marrë 96.862 denarë, ndërsa vetëm këtë vit, gjatë muajve qershor dhe korrik, Mojsoska si deputete ka marrë tri herë nga 54.000 denarë. A nuk është më se e mjaftueshme paga e deputetes? A nuk është hipokrizi që nga njëra anë të shtireni si askete, ndërsa nga ana tjetër ta shtrydhni partinë tuaj politike?”, theksojnë nga VMRO-DPMNE. Ndërkohë që po afrohen zgjedhjet të përdithsme janë bërë akuzat dhe kundërakuzat mes VMRO-DPMNE-së dhe “Levicës”, edhe për faktin se partia e Apasievit ka dalur me kandidatë në komunat me shumicë shqiptare si ajo e Tetovës, Gostivarit dhe Strugës.

Komuniteti shqiptar në Irlandë shënoi një moment historik me hapjen e shkollës së parë shqipe në Dublin, nismë e Albanian Book Lovers Club dhe themeluar nga zonjat Liljana Picari dhe Arjana Rama, transmeton albinfo.ch.

Shkolla nisi aktivitetin më 21 shtator 2025 në Blanchardstown Library, Dublin 15, ku morën pjesë prindër, nxënës dhe përfaqësues të komunitetit shqiptar. Në mungesë të tij fizike, ambasadori i Shqipërisë në Irlandë, Sh.T.Z. Uran Ferizi, përshëndeti përmes një mesazhi zyrtar dhe konfirmoi mbështetjen e Ambasadës me paketa mësimore.

Nxënësit e parë zhvilluan mësime mbi alfabetin shqip, flamurin kombëtar dhe historinë e shkollës së parë shqipe në Korçë. Mësimi u bazua në materiale nga Qendra e Botimeve për Diasporën, ndërsa pritet të mbërrijnë edhe paketa të tjera nga Ambasada në Londër.

Kjo shkollë konsiderohet një hap i rëndësishëm për ruajtjen dhe promovimin e gjuhës, kulturës dhe traditës shqiptare ndër brezat e rinj në diasporë./Albinfo.ch/