Një nga prioritetet e ministrit të ri të Shëndetësisë do të jetë zgjidhja e statusit të punës jo vetëm për infermieret e Tetovës por për të gjithë punonjësit në shëndetësi. Këtë mes tjerash e tha vetë Azir Aliu në daljen e tij të parë si ministër i Shëndetësisë, shkruan Portalb.mk.

Kur u pyet se si parashihet të rregullohet statusi i infermiereve të Tetovës të cilat kërkojnë vendime pune, pasi me vite punojnë me kontrata dhe së fundmi dolën edhe në protesta, Aliu tha se problemi me kapacitetin njerëzor është në të gjithë klinikat.

“Në përgjithësi, në ditën e dytë si ministër i Shëndetësisë pata takim me drejtorët e klinikave, një nga pyetjet ishte me çfarë sfida ballafaqoheni në moment dhe kush është zgjidhja më e shpejtë për atë sfidë. Besoni se të gjithë drejtorët në klinika një prej sfidave e kanë kapacitetin njerëzor, pra duke pasur sfidë kapacitetin njerëzor dhe duke qenë ministër i shëndetësisë nënkuptohet se kjo është një prej prioriteteve unë që duhet ta bëj”, tha Aliu.

Ai tha se nesër (e martë) do të jetë në Tetovë ku do të takohet edhe me drejtorin e spitalit ku do të shqyrtohet edhe çështja e të punësuarve me kontrata dhe pa vendime.

“Gjithsesi është në prioritet edhe do duhet të zgjidhet sa më shpejtë për të gjithë të punësuarit në ekosistemin e shëndetësisë”, tha Aliu.

Javët e kaluara punonjësit shëndetësorë me kontrata të cilët janë rreth 140 protestuan pasi nuk kishin marrë rroga ndërsa kërkuan edhe vendime pune.

Pas protestave, nga Spitali Klinik i Tetovës u premtuan se do tu paguhen pagat e prapambetura si dhe kontrata në vepër deri në fund të vitit.

Megjithatë, personeli mjekësor nuk është i kënaqur me këtë zgjidhje, ata kërkojnë vendime pune.

Kujtojmë që drejtori i Spitalit të Tetovës, Agim Berisha para tre javëve theksoi se ky problem pritet të zgjidhet brenda këtij muaji dhe se kjo çështje varet nga Ministria e Shëndetësisë dhe e Financave.

Ndërsa para dy javëve, ministrja e Financave Gordana Dimitrievska Koçoska ka thënë se Ministria e Financave është përgjigjur në kohë dhe pozitivisht për punësimet në Spitalin e Tetovës. Ajo u bëri thirrje institucioneve shëndetësore që të respektojnë procedurën kur kërkojnë pëlqimin për punësim.

Lëvizjet në Shëndetësi kanë bërë që ky sektor të mos gjejë “qetësi”.

Nga ana tjetër, sistemi shëndetësor në Maqedoninë e Veriut po zbrazet dita ditës. Në vitin 2024, sistemi i kujdesit shëndetësor primar në Maqedoninë e Veriut shënoi ulje të ndjeshme si në numrin e kontratave të lidhura ashtu edhe në numrin e mjekëve të përgjithshëm. Sipas të dhënave të publikuara në Fondit për Sigurim Shëndetësor, numri i përgjithshëm i kontratave të lidhura në kujdesin shëndetësor primar ishte 2.077, që përfaqëson një ulje prej 55 kontratash krahasuar me vitin 2023. Gjithashtu, numri total i mjekëve në këtë sektor në vitin 2024 ishte 2.796, që është 45 më pak se një vit më parë. Vetëm në kategorinë e mjekëve të përgjithshëm, këtë vit janë regjistruar 1.499 mjekë aktivë, 8 më pak se në vitin 2023./Portalb.mk/

Përvjetori i parë i Qeverisë Mickoski, i shënuar me dështime në integrimin evropian dhe përfaqësimin e shqiptarëve. Në një reagim, Aleanca për Shqiptarët ka shprehur zhgënjimin e thellë për njëvjetorin e formimit të Qeverisë së udhëhequr nga Hristijan Mickoski, duke theksuar se ky vit nuk solli përparim, por stagnim dhe zvarritje në rrugën drejt Bashkimit Evropian.

“Ky vit qeverisës është karakterizuar nga mosrealizimi i zotimeve thelbësore që ishin pjesë e marrëveshjes mes VMRO-DPMNE-së dhe koalicionit VLEN, veçanërisht për miratimin e ndryshimeve kushtetuese brenda gjashtë muajve të parë,” thuhet në reagimin e ASH-së.

Sipas tyre, një nga arsyet kryesore për largimin nga kjo qeveri ishte pikërisht dështimi për të përmbushur këtë zotim politik, i cili ishte edhe premtim i drejtpërdrejtë ndaj shqiptarëve në vend.

“Siç ka theksuar me të drejtë lideri i Aleancës për Shqiptarët, Arben Taravari, ky dështim përbën jo vetëm shkelje të marrëveshjes politike, por edhe një zhgënjim të thellë për qytetarët shqiptarë,” thuhet më tej në deklaratë.

Aleanca vlerëson se qeveria aktuale ka humbur orientimin evropian, duke mos bërë asnjë hap konkret në përmbushjen e kritereve të BE-së. Në vend të reformave dhe përfaqësimit të drejtë të shqiptarëve, sipas AS-së, koalicioni qeverisës i është kthyer retorikës boshe dhe premtimeve të pambuluara.

“Koalicioni VLEN, në vend që të jetë faktor ndryshimi, ka zgjedhur heshtjen përballë shkeljeve të premtimeve dhe dështimeve të njëpasnjëshme,” thekson Aleanca, duke akuzuar partnerët e mëparshëm se kanë zëvendësuar premtimet për reforma me kompromise politike që ulin aspiratat për barazi të shqiptarëve.

Në përmbyllje, ASH jep një paralajmërim të qartë:

“Kjo nuk është vetëm një dështim i një qeverie – është një sinjal alarmi për gjithë shoqërinë dhe për partnerët ndërkombëtarë se rruga drejt BE-së po bllokohet qëllimisht.”

Aleanca për Shqiptarët rithekson përkushtimin për të qenë “zëri i paepur për një të ardhme me dinjitet, ku premtimet mbahen dhe interesi kombëtar nuk përdoret si mjet për marketing politik.

Kryetari i Aleancës për Shqiptarët, Arben Taravari sonte ka takuar strukturat dhe aktivin politik të Sarajit në kuadër të fushatës “Tetori është afër”.

Pritja ka qenë madhështore, të cilën e konfirmon edhe Sekretari Organizativ i ASH, Blerant Ramadani i cili vjen nga komuna e Sarajit, e i cili thotë se fytyrat e vërteta të ASH-së janë me kryetarin Arben Taravari.

“Sonte, në zemër të Sarajit, bashkë me kryetarin Arben Taravari, zhvilluam një takim me strukturat e ASH-së në Saraj! Aktivistët tanë të palëkundur, fytyrat e vërteta të Aleancës, e mbushën sallën me entuziazëm, dashuri dhe besim. Të tillë janë njerëzit e Sarajit, krenarë, të vendosur dhe të gatshëm për të mbrojtur të drejtën dhe për të ndërtuar një të nesërme më të mirë për çdo shqiptar”, shkruan Ramadani në rrjetet sociale.

Ramadani më tej thekson se ky takim u ka treguar qartë se fryma e Aleancës është e fuqishme, idealet e saj janë të pastra, dhe rruga e tyre është drejt fitores.

“Sot nuk folëm vetëm për zgjedhje, por për një mision. Një mision për ta rikthyer dinjitetin, për ta ndërtuar një qeverisje që del nga populli dhe punon për popullin.
Me Taravarin në krye dhe me secilin prej jush krah për krah, bashkë do të shkruajmë një kapitull të ndritshëm!”.