Anketa e fundit e Agjencisë Market Vision, porositur nga MKD.mk, tregon se lideri i Aleancës për Shqiptarët (ASH), Arben Taravari është pothuajse me besueshmëri më të lartë se të gjithë liderët e partive të tjera politike të koaliconit VLEN.

Sipas anketës në fjalë, Taravari gëzon besueshmëri prej 3,8% i vetëm, kundrejtë Mexhitit me 2,1%, Kasmit 1,7% dhe Gashit me vetëm 0,8%.

Pra, vlerësimi i përgjithshëm i liderëve të partive në koalicionin VLEN, nxjerr në pah se vlerësimin më të lartë e ka Taravari, i cili ka paralajmëruar se në zgjedhjet lokale do të garojë me lista të veçanta për këshilltarë komunal.

Taravari para vendimit për të garuar i vetëm, kishte kërkuar anketa dhe kishte prezantuar disa anketa të brendshme të partisë së tij, por kjo nuk u pranua nga tre liderët e tjerë të koalicionit, me çka edhe kjo anketë i jep të drejtë atij mbi vendimet e fundit të sjellura në Kryesinë më të ngushtë partiake, dhe sqaron qartë se pa Taravarin, VLEN nuk ka besueshmëri te popullata.

Pastaj, pa Taravarin VLEN nuk ka vlerësim më të lartë se Ali Ahmeti, ndërsa me të lideri i BDI-së, mbetet pas.

Sa u takon partive politike, edhe aty ASH e drejtuar nga Taravari është forca kryesore politike për nga mbështetja kundrejtë LD, BESA dhe Alteranativa.

Në pyetjen se cilën parti politike do ta votoni në zgjedhjet lokale, 5,8% janë shprehur për ASH-në, për Besën 2,6%, për LD 3,6% dhe për AAA 1,0%.

Sa i përket liderëve të partive politike te kampi politik maqedonas, Mickoskit i besojnë 25.4% e të anketuarve, ndërsa në vendin e dytë është Venko Filipçe me 3.8%.

Anketa e Market Vision është realizuar nga 20 marsi deri më 17 prill duke përdorur metodën CATI – anketim telefonik me ndihmën e kompjuterit – në një mostër prej 1,200 të anketuarish (gabim statistikor: 3%; intervali i besimit: 95%).

Mostra është përfaqësuese në nivel të Maqedonisë sipas: rajonit, gjinisë, moshës dhe përkatësisë etnike sipas të dhënave mbi popullsinë rezidente nga regjistrimi i vitit 2021.

Sekretari Organizativ i Aleancës për Shqiptarët, Gadaf Uzeiri, ka reaguar përmes një postimi në rrjete sociale duke i rikujtuar opinionit publik se ishte pikërisht kjo parti që e bëri hapin vendimtar drejt ndryshimit politik në vend, duke e çuar BDI-në në opozitë dhe duke hapur një faqe të re për shqiptarët në Maqedoninë e Veriut.

“Nën udhëheqjen e Arben Taravarit, Aleanca për Shqiptarët e solli ndryshimin që të gjithë e prisnin: BDI në opozitë,” theksoi Uzeiri.

Ai shtoi se Aleanca u përball me refuzime të njëpasnjëshme kur kërkoi marrëveshje të drejtë për komunat, lista të ndara për këshilltarë dhe matje reale politike. “Kur kërkuam drejtësi dhe barazi, na u mbyll dera. Kur kërkuam matje të ndershme, na quajtën përçarës,” shkruan ai.

Në postimin e tij, Uzeiri kritikon qasjen e partnerëve të koalicionit VLEN, të cilët sipas tij e kanë harruar zotimin për bashkim të plotë dhe janë kthyer në kundërshtarë me fushata të organizuara nga profile të rreme dhe me gjuhë fyese, e jo me ide dhe vlera.

“Ne nuk do të tërhiqemi. Do të matemi me qytetarët, jo me klikën e radhës. Ne jemi këtu për ta mbrojtur parimin, jo për ta ruajtur karrigen,” përfundon reagimin e tij Gadaf Uzeiri, duke theksuar se Aleanca për Shqiptarët mbetet e përkushtuar ndaj parimeve dhe vlerave të sinqerta.

Deputeti i ASH-së, Halil Snopçe, në intervistë për TV Koha, tha se qeveria nuk mund të jetë stabile e funksionale pa pjesëmarrjen e deputetëve shqiptarë në të. Sipas tij, pa ata nuk arrihet badinteri dhe qeveri pa badinter nënkupton qeveri jo funksionale.

“Qeveria pa deputetët shqiptarë do të jetë jo funksionale e jo stabile, sepse nuk arrihet badinteri. Nuk do të jetë afatgjate logjikisht jo numerikisht. Por, në fakt praktikisht vështirë që do të funksiononte”, tha Halil Snopçe.